လါမ့ၤ ၁၄ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ်ႇ ကၠၤအ့စ့ၣ်ကၠံကီၢ်ဆၣ် ကူၣ်သ့၀ဲၤကျိၤၦၤမၤတၢ်ဖိအဂၤ ၂၀၀ ဘျဲၣ် ခီဖျိလဲၤတလၢ၀ဲတၢ်ဃ့ခွဲးတၢ်သိၣ်တၢ်သီဒီးမူဒါတၦဲၤ၀ဲဘၣ်အဃိ ဒ်ၦၤမၤတၢ်ဖိတၢ်သိၣ်တၢ်သီအသိး တၢ်ဆိကတီၢ်ကွံာ်အမူအဒါတစိၢ်တလီၢ်အဂ့ၢ်န့ၣ် ကီၢ်စဲၣ်ကူၣ်သ့ၦၤနဲၣ်တၢ်မူဒါခိၣ် ဒုးသ့ၣ်ညါထုးထီၣ်ပာ်ဖျါ၀ဲ ဖဲလါမ့ၤ ၁၁ သီအနံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကၠိသရၣ်သရၣ်မုၣ် ၂၀၀ လၢ အသိၣ်လိ၀ဲဂံၢ်ခီၣ်ထံးကၠိတဖၣ်အံၤ ဒ်ထံကီၢ်ၦၤမၤတၢ်ဖိတၢ်ဘျၢသဲစး ၁၇၀(က)အသိး တၢ်ဆိကတီၢ်ကွံာ်၀ဲလၢမူဒါတစိၢ်တလီၢ်ဒီး ၦၤလၢတၢ်ပာ်ပတုာ်ကွံာ်လၢမူဒါအပူၤတဖၣ် ကဘၣ်လဲၤဘှါရှဲ၀ဲလၢကူၣ်သ့၀ဲၤကျိၤအအိၣ်အဂ့ၢ်န့ၣ် ကၠိသရၣ်မုၣ်လၢတအဲၣ်ဒိးပာ်ဖျါအမံၤတဂၤ စံးဘၣ် ကညီတၢ်ကစီၣ်၀ဲၤလီၢ်ခိၣ်သ့ၣ် ဖဲလါမ့ၤ ၁၃ သီအနံၤန့ၣ်လီၤႉ
“တဲ၀ဲလၢ မူဒါတလၢၦဲၤဘၣ်အဃိဆိကတီၢ်ကွံာ်၀ဲလီၤႉ စးထီၣ်လၢပနုာ်လီၤ(CDM)အပူၤန့ၣ် တဟံလၢၤလါလဲလၢၤဘၣ်ႉ တလဲၤလၢရူဘၣ်ႇတဆဲးလီၤစုမုၢ်ကျၢၢ်လၢၤဘၣ်ႉ ကကဲထီၣ်ဒ်အံၤန့ၣ်ဆိမိၣ်ဃာ်ပာ်စၢၤလံလီၤႉ ကက့ၤကဒါလီၢ်ခံအဂီၢ်တအိၣ်လၢၤဘၣ်ႉ ကမျၢၢ်တၢ်စိတၢ်ကမီၤ ဒ်သိးကတုၤကဒါလၢကမျၢၢ်စုပူၤအဂီၢ် ပကဆဲးပၢၢ်ဆၢတၢ်လီၤ” အဂ့ၢ်န့ၣ် ကၠိသရၣ် စီၤထံၣ်ချ့ လၢတၢ်ပာ်ပတုာ်ကွံာ်အမူဒါတဂၤ စံးဘၣ်ခ့ၣ်အဲးစံၣ်န့ၣ်လီၤႉ
ကၠၤအ့စ့ၣ်ကၠံကီၢ်ဆၣ်အပူၤ ကူၣ်သ့ၦၤမၤတၢ်ဖိလၢအနုာ်လီၤလၢ(CDM)ပူၤ အိၣ်၀ဲအဂၤ(၅၀၀)ဘျဲၣ်ဒီး ခီဖျိတၢ်ကီတၢ်ခဲအကလုာ်ကလုာ်အဃိ တနီၤန့ၣ်က့ၤနုာ်လီၤက့ၤတၢ်မၤအိၣ်၀ဲအသိး ၦၤလၢတၢ်ထုးထီၣ်အမံၤလၢတၢ်ကဖီၣ်၀ဲဒီးၦၤလၢအဘၣ်စံၣ်အိၣ်ခူသူၣ်တဖၣ်စ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်လၢ တၢ်တိစၢၤမၤစၢၤအံးထွဲကွၢ်ထွဲ ၦၤနုာ်လီၤ(CDM)ပူၤ တဖၣ်အအိၣ်န့ၣ်လီၤႉ
