လါမ့ၤ ၁၄ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲမဟါ(လါမ့ၤ ၁၃)သီ ဟါခီအဆၢကတီၢ် ကညီကီၢ်စဲၣ်ႇသုးခိးကီၢ်ဆၢ(BGF)သုးကရူၢ်ဒီး သုးကီၣ်ကးအသုးကရူၢ်တဖၣ်အဘၢၣ်စၢၤ ကဒဲကဒဲတၢ်ခးကမၣ်လိာ်သးကဲထီၣ်ဒီး BGF ကတပၤသံ၀ဲ ၁၂ ဂၤ ဒီး သုးကီၣ်ကးအသုးသံ၀ဲ ၃ ဂၤအဂ့ၢ်န့ၣ် KNU သုးက့(၅)တကပၤ စံး၀ဲန့ၣ်လီၤႉ
BGF နီၣ်ဂံၢ်(၁၀၁၃)သုးရ့ၣ် စုဒုၣ်တီၤအဖီလာ်သုးတဖၣ်ဒီး သုးကီၣ်ကး ခီၣ်ချ့သုးရ့ၣ်(ခမရ-၄၀၈)တဖၣ်အဘၢၣ်စၢၤ ဖဲမဟါမုၢ်ဟါလီၤ ၃ နၣ်ရံၣ်ဘျဲၣ်အဆၢကတီၢ် ကဒဲကဒဲတၢ်ခးကမၣ်လိာ်သးကဲထီၣ်၀ဲလၢ KNU သုးက့(၅)ဟီၣ်က၀ီၤ ဒွဲၣ်လိကီၢ်ဆၣ်အပူၤအဂ့ၢ်န့ၣ် KNU သုးက့(၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲဒ်အံၤန့ၣ်လီၤႉ
“ဖဲမဟါမုၢ်ဃ့ၢ်လီၤ ၃ နၣ်ရံၣ် ၅၀ မံးနံးန့ၣ် ပယီၤသုး ခမရ(၄၀၈)ဒီး BGF (၁၀၁၃) ခးကမၣ်လိာ်အသးဖဲမီလီၤကျိအကပၤန့ၣ်လီၤႉ ခးကမၣ်လိာ်သးဘျီန့ၣ် BGF သံ၀ဲ ၁၂ ဂၤႇ ပယီၤသုးန့ၣ်သံ၀ဲ ၃ ဂၤ သံဃုာ်၀ဲဒီးသ၀ီဖိ ၃ ဂၤလီၤ”အဂ့ၢ်န့ၣ် စံးဘၣ်ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ
လၢန့ၣ်အမဲာ်ညါ ဖဲမဟါမုၢ်ဃ့ၢ်လီၤ ၃ နၣ်ရံၣ် ၂၃ မံးနံးအဆၢကတီၢ်စ့ၢ်ကီး ကညီတၢ်ထူၣ်ဖျဲး သုးမုၢ်ဒိၣ် (KNLA) သုးက့ ၅ အသုးရ့ၣ်(၁၀၂)ႇသုးဒ့(၃)သုးတဖၣ်ဒီး သုးကီၣ်ကးအသုး ခီၣ်ချ့သုးရ့ၣ်(ခမရ-၄၀၈)တဖၣ်အဘၢၣ်စၢၤ တၢ်ခးလိာ်သးကဲထီၣ်ဒီး သုးကီၣ်ကးတကပၤသံ၀ဲ ၉ ဂၤ ဒီး ဘၣ်ဒိ၀ဲ ၆ ဂၤအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စိၤကျၢၤဒိၣ် စံးအါထီၣ်၀ဲန့ၣ်လီၤႉ
တကီၢ်ခါခဲအံၤ ခ့ၣ်အဲၣ်ယူၣ် သုးက့(၅)ဟီၣ်က၀ီၤအပူၤ ခီဖျိသုးတၢ်သဘံၣ်သဘုၣ်ဟဲဆူၣ်ထီၣ်အဃိ စးထီၣ်ဖဲတလါအံၤထီၣ်သီန့ၣ် BGF သုးလၢအကယၤဟဲတုၤ၀ဲဒၣ်လၢဟီၣ်က၀ီၤဖဲန့ၣ်အပူၤဒီး KNLA သုးတဖၣ်ဒီး သုးကီၣ်ကးႇ BGF သုးတဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲကိးမုၢ်နံၤဒဲးဃၣ်ဃၣ်ညါန့ၣ်လီၤႉ
ဒ်န့ၣ်အသိး KNU သုးက့(၅)ဟီၣ်အက၀ီၤအပူၤ သုးကီၣ်ကးအသုးပာ်တ့ၢ်ကွံာ်သုးကလၢၤတနီၤဒီး လဲၤပာ်ဖှိၣ်ထီၣ်သးဒီးသုးကလၢၤဖးဒိၣ်လၢအအိၣ်ဘူးဖဲန့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢ သုးက့(၅)ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ
