ဒ်သိးကထီဒါဒီးဒုးလီၤၦီၢ်သကိးပယီၤသုးမီၤစိရိၤတဖၣ်ဒူဒူအဂီၢ် သုးခိၣ်ကျၢၢ်စိ စီၤဘီကၠီၣ်ဟဲ ဆီၣ်တခူထီၣ် ကညီဖီၣ်စုက၀ဲၤကရူၢ်တဖၣ်

လါမ့ၤ ၃ သီႇ ၂၀၂၁ နံၣ်ႇ ခ့ၣ်အဲးစံၣ်

ဒ်သိးကထီဒါဒီးဒုးလီၤၦီၢ်သကိးပယီၤသုးမီၤစိရိၤတဖၣ်ဒူဒူအဂီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးရိၣ်မဲခိၣ်ကျၢၢ်(၂) သုးခိၣ်ကျၢၢ်စိ စီၤဘီကၠီၣ်ဟဲ ဆီၣ်တခူထီၣ်ကညီဖီၣ်စုက၀ဲၤကရူၢ် ၄ ဒူၣ် ဖဲမဟါ(လါမ့ၤ ၂ သီ)အနံၤန့ၣ်လီၤႉ

ဘၣ်ထွဲပယီၤသုးမီၤစိရိၤအသုးတၢ်ဟဲကွံာ်လီၤမ့ၣ်ပိၢ်ဒီးတၢ်ဟဲထီၣ်ဒုးကညီကီၢ်စဲၣ်ကလံၤစိး ဖၣ်ပူၣ်ဟီၣ်က၀ီၤပူၤတၢ်ဂ့ၢ်အံၤ KNLA သုးရိၣ်မဲခိၣ်ကျၢၢ်=၂ သုးခိၣ်ကျၢၢ်စိ စီၤဘီကၠီၣ်ဟဲ ဆှၢန့ၢ်၀ဲ လံာ်တၢ်ကတိၤဟ့ၣ်ဂံၢ်ဟ့ၣ်ဘါတဘ့ၣ်ဆူ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA, တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် -DKBA, ကညီတၢ်မုာ်တၢ်ခုၣ်ကီၣ်ကး -KNU/KNLA-PC ဒီး ကညီသုးခိးကီၢ်ဆၢ -BGF တဖၣ် ဖဲလါမ့ၤ ၂ သီအနံၤန့ၣ်လီၤႉ

“ခိၣ်နၢ်သိၣ်ဒူလၢ KNLA,DKBA, KNU/KNLA-PC ဒီး BGF ခဲလၢာ်သ့ၣ်သုဧၢႇ လၢကညီအတၢ်ပၢၢ်ဆၢအနံၣ် ၇၀ ဘျဲၣ်အတီၢ်ပူၤ တၢ်ခွဲးတၢ်ယာ်ဂ့ၤဒ်သိးမုၢ်မဆါတနံၤအံၤ တအိၣ်နီတဘျီဒံးဘၣ်ႉ မ်ပကဟံးန့ၢ်သကိးတၢ်ခွဲးဂ့ၤယာ်ဘၣ်အံၤႉ ပကဂဲၤဆၢ ထၢၣ်သကိးဃူဃူဒူဒူလၢတၢ်ပၢၢ်ဆၢ ဒုးလီၤၦီၢ်ကွံာ်ပယီၤသုးမီၤစိရိၤအသနူဖဲပစိၤအံၤ ဒ်သိးစိၤလၢခံတဖၣ်ကဒိးန့ၢ်ဘၣ်တၢ်ထူၣ်ဖျဲးတၢ်သဘျ့အဂီၢ်တက့ၢ်ႉ မ်ပကၦဲၤဒီး တၢ်ပၢၢ်ဆၢသးသဟီၣ်ဂံၢ်ဘါႇကညီၦၤဒူၦၤဃိၤအတၢ်သူၣ်ဒူသးဒူႇဒီးမ်တၢ်ထံတၢ်တီကစၢ်ကအိၣ်ၦိၤၦၤထီဘိတုၤပတုၤဆူပတၢ်မၤနၢၤဖီတၢၣ်တစုတက့ၢ်”အဂ့ၢ်န့ၣ် သုးခိၣ်ကျၢၢ်စိ စီၤဘီကၠီၣ်ဟဲ ဆီၣ်တခူထီၣ်၀ဲန့ၣ်လီၤႉ

တကီၢ်ခါဆၢကတီၢ်ခဲအံၤ အရ့ဒိၣ်ကဒီးအသီတဘျီလၢပကဘၣ်စၢဖှိၣ်သွံၣ်အဂ့ၢ် ႇ ဒုၣ်ဒါအတၢ်ဒုးထီဒါၦၤလၢကီၢ်သူလ့ၤကလံၤစိးကီၢ်ရ့ၣ်သုးက့ဟီၣ်က၀ီၤတဖၣ် ပထံၣ်သ့ၣ်ညါဘၣ်အ၀ဲသ့ၣ်အတၢ်အိၣ်သး=အသုးဂံၢ်ဘါႇတၢ်စုက၀ဲၤဂံၢ်ဘါႇအ၀ဲသ့ၣ်ဒွဲပူၤတၢ်ဂ့ၢ်ကီဒီးတၢ်သဘံၣ်သဘုၣ်တဖၣ်န့ၣ်လီၤႉ အိၣ်ဒၣ်တၢ်မၤဆူူၣ်ထီၣ်က့ၤအသုးလၢပဟီၣ်က၀ီၤပူၤတဖၣ်အသးသဟီၣ်ဂံၢ်ဘါ ဒီးမၤပျံၤမၤဖုးပကမျၢၢ်တဖၣ်လီၤအဂ့ၢ်န့ၣ် ဆဲးစံး၀ဲန့ၣ်လီၤႉ

ဒုၣ်ဒါသူအါထီၣ်ကဘီယူၤတၢ်ဒုးအံၤ ပာ်ဖျါထီၣ်အ၀ဲသ့ၣ်အတၢ်ဂံၢ်စၢ်လၢခိခိၣ်တၢ်ဒုးသုးတကပၤ= လၢကဆှၢအါထီၣ်သုးဂံၢ်ဘါဒီးမၤစၢၤက့ၤအသုးတၢ်မဲာ်ညါသုးလၢပက၀ီၤတံၢ်ဃာ်အီၤတဖၣ်အဂီၢ်လီၤအဂ့ၢ်န့ၣ် စံး၀ဲန့ၣ်လီၤႉ

ဒ်သိးတၢ်ကမၤအါထီၣ်သုးဂံၢ်ဘါအဂီၢ် ပသ့ၣ်ညါဘၣ်လၢအ၀ဲသ့ၣ်မၢ၀ဲဒၣ် ကညီသုးခိးကီၢ်ဆၢ(BGF) လၢကမၤစၢၤအ၀ဲသ့ၣ်အဂီၢ်ဒီး ဒုၣ်ဒါအတၢ်ကူၣ်အံၤတမၤဂ့ၤပ၀ဲကညီဖိနီတမံၤဘၣ်အမဲာ်ညါ ၦၤလၢအဘၣ်သံဘၣ်ၦၢ်ႇဘၣ်ဒိဘၣ်ထံးဒီးဘၣ်ကီဘၣ်ခဲန့ၣ် မ့ၢ်ဒၣ်ပၦၤကလုာ်ကညီဖိတဖၣ်လီၤအဂ့ၢ်န့ၣ် သုးခိၣ်ကျၢၢ်စိ စီၤဘီကၠီၣ်ဟဲစံး၀ဲန့ၣ်လီၤႉ

လၢတၢ်န့ၣ်အဃိစးထီၣ်မုၢ်တနံၤဒီးဆူညါ ယအဲၣ်ဒိးလၢသုကမၤသုၦၤကလုာ်အတၢ်မၤတီတီႇ အိၣ်ဆၢထၢၣ်လၢတၢ်အဘၣ်တကပၤကျၢၤကျၢၤႇပဲာ်ထံနီၤဖးတၢ်ဂ့ၤဒီးတၢ်အၢအဆၢရှဲရှဲႇဃုထံၣ်န့ၢ်သကိးတၢ်ဃူတၢ်ဖိးအ ကျဲႇထီဒါဒီးဒုးလီၤၦီၢ်သကိးပယီၤသုးမီၤစိရိၤတဖၣ်ဒူဒူအဂ့ၢ်န့ၣ် သုးရိၣ်မဲခိၣ်ကျၢၢ်= ၂ ဆီၣ်တခူဟ့ၣ်ဂံၢ်ဟ့ၣ်ဘါ၀ဲန့ၣ်လီၤႉ