လါယနူၤအါရံၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲလါယနူၤအါရံၤ ၁၁ သီအနံၤန့ၣ် (Ba Nyunt)Telegram Channel တီၣ်ထီၣ်ရၤလီၤတၢ်ကစီၣ်လၢ ကညီကီၢ်စဲၣ် မၠၣ်၀တံၣ်–ကီးတရံးအ့ရှါကျဲ တီနီၢ်ထံလီၤဆှူဒီးစ့ၣ်ဖူကစၢၢ်အဘၢၣ်စၢၤန့ၣ် (KNLA)ဒီး(PDF)တမျာ်၀ဲ(စွ့ၤလၣ်ယီၤ)သိလ့ၣ်တီၣ်ၦၤလဲၤတၢ်ဖိဒီးမၤပိၢ်ဖးထီၣ်ကျဲအံၤမ့ၢ်တၢ်ကစီၣ်လၢအကမၣ်လီၤအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ
(Ba Nyunt) Telegram Channel ပာ်ဖျါ၀ဲလၢ (KNLA)ဒီး (PDF)တဖၣ်ကိးတီၢ်၀ဲသိလ့ၣ်တီၣ်ၦၤလဲၤတၢ်ဖိ၀ံၤ တမျာ်ဟံကွံာ်၀ဲၦၤထူၦၤစ့ႇလီတဲစိႇတၢ်ဖိတၢ်လံၤလၢအလုၢ်ဒိၣ်ၦ့ၤဒိၣ်တဖၣ်ဒီး မၤပိၢ်ဖးထီၣ်၀ဲကျဲမုၢ်ဖးဒိၣ်အံၤအဃိ သိလ့ၣ်အမဲာ်ထံကလၤဟးဂီၤ၀ဲ (၃) ဘ့ၣ်အသိးတီၣ်ဖျါထီၣ်ဃုာ်၀ဲ ကျဲဟးဂီၤတၢ်ဂီၤ (၂) ဘ့ၣ်ဒီးစွ့ၤလၣ်ယီၤသိလ့ၣ် တၢ်ဂီၤ (၃) ဘ့ၣ် န့ၣ်လီၤႉ
တၢ်ပိၢ်ဖးကဲထီၣ်သးလၢမၠၣ်၀တံၣ်–ကီးတရံးအ့ရှါကျဲမုၢ်ခိၣ်အိၣ်၀ဲဘၣ်ဆၣ် ဘၣ်ဃးဒီးတၢ်တမျာ်တၢ်ဂ့ၢ်ကဲထီၣ်သးအံၤ တနၢ်ဟူ၀ဲဘၣ်အဂ့ၢ်န့ၣ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲအသိး သ့ၣ်ညါဘၣ်န့ၣ်လီၤႉ
ဘၣ်ဃးဒီးတၢ်ဂ့ၢ်ကဲထီၣ်သးအံၤၦၤနီသိလ့ၣ်တီၣ်ၦၤလဲၤတၢ်ဖိလၢအဟးထီၣ်က့ၤလီၤဖဲန့ၣ်တဂၤစံး၀ဲလၢ“မ့ၢ်မတဂၤမၤပိၢ်ဖးထီၣ်၀ဲလဲၣ်ဒုတသ့ၣ်ညါဘၣ်ႉဘၣ်၀ဲဒၣ်သိလ့ၣ်တခိၣ်န့ၣ်အမဲာ်ညါမီၤနီၤႉခဲအံၤၦၤက့ၤစိာ်ကွံာ်သိလ့ၣ်အံၤလံႉလၢကျဲခၢၣ်သးန့ၣ်ကျဲလီၤၦီၢ်ဘၣ်ဆၣ်ကျဲလဲၢ်အဃိလၢတၢ်ကပၤန့ၣ်ၦၤလဲၤက့ၤသ့ဒံးႉမ့၀ံၤဖဲမဂီၤန့ၣ်ကျိဖးဒိၣ်ကလုၢ်သီၣ်ႉၦၤတဲလၢတၢ်ဒုးကဲထီၣ်အဃိၦၤကးတံၢ်ဃာ်ကျဲတစိၢ်တလီၢ်၀ံၤခဲအံၤၦၤက့ၤအိးထီၣ်ကဒါလံ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါယနူၤအါရံၤ ၁၁ သီအနံၤန့ၣ်လီၤႉ
လၢန့ၣ်အမဲာ်ညါဖဲဒုးယၤတၢ်ဟူးတၢ်ဂဲၤအတီၢ်ပူၤအံၤန့ၣ်(ခ့ၣ်အဲၣ်ယူၣ်)ဟ့ၣ်ပလီၢ်ကမျၢၢ်လၢတဘၣ်ဟးထီၣ်က့ၤလီၤလၢမၠၣ်၀တံၣ်–ကီးတရံးကျဲအံၤဘၣ်အိၣ်၀ဲဘၣ်ဆၣ် မ့မ့ၢ်ၦၤလၢအဘၣ်ထွဲဘၣ်ဃးလိာ်သးဒီးပယီၤသုးတဖၣ်န့ၣ် ဟးထီၣ်က့ၤလီၤ၀ဲအိၣ်အဂ့ၢ်န့ၣ် ကီးတရံးဟီၣ်က၀ီၤ(KNLA)ၦၤဘၣ်မူဘၣ်ဒါတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ပၦၤဒုတမျာ်တၢ်တအိၣ်ဘၣ်ႉပယီၤသုးဟးတီၣ်ထီၣ်နါစိၤတၢ်ကစီၣ်လီၤႉလၢအ့ရှါကျဲမုၢ်ခိၣ်န့ၣ်ၦၤခိးထၢတၢ်ခိတၢ်သွဲလၢကမျၢၢ်အအိၣ်န့ၣ်အိၣ်ဒၣ်အ၀ဲသ့ၣ်ၦၤလီၤႉတၢ်အိၣ်သးမ့တဂ့ၤဘၣ်န့ၣ်ပဒုးသ့ၣ်ညါလီၢ်က၀ီၤကမျၢၢ်လၢတဘၣ်ဟးထီၣ်က့ၤလီၤလၢကျဲအံၤဘၣ်န့ၣ်ထီဘိလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
(Ba Nyunt) Telegram Channel အံၤန့ၣ် အါဒၣ်တက့ၢ်ဟးရၤလီၤတီၣ်ထီၣ်တၢ်ကစီၣ်လၢအတမ့ၢ်တတီ အကမၣ်သ့ၣ်တဖၣ်လီၤဒီး Channel အံၤၦၤ (Subscribe)အီၤအိၣ်၀ဲ (၄၀၀၀၀) ဘျဲၣ်န့ၣ်လီၤႉ
