လါမ့ၤ ၂၇ သီႇ ၂၀၂၁ နံၣ်ႇ ခ့ၣ်အဲးစံၣ်
ထံဂုၤကီၢ်ဂၤဒီးကီၢ်ပူၤတၢ်ကရၢကရိတဖၣ်ဃ့ထီၣ်၀ဲ ဒ်သိးကယဲၢ်မ့ၢ်တၢ်စုဆူၣ်ခီၣ်တကးကပတုာ်ကွံာ် တဘျီဃီအဂီၢ် သုးမီၤစိရိၤအံၤကွၢ်ကပာ်ကွံ၁်၀ဲအဂ့ၢ်န့ၣ် တၢ်တီခိၣ်ရိၣ်မဲတၢ်မုာ်တၢ်ခုၣ်တၢ်မၤအကျဲ (PPST) တစိၢ်တလီၢ်ၦၤပၢၤလီၢ်ဆ့ၣ်နီၤ သုးခိၣ်ကျၢၢ်စိ ယွဲၣ်စ့ၣ် စံး၀ဲန့ၣ်လီၤႉ
ဖဲတနံၤအံၤ(လါမ့ၤ ၂၇)သီအနံၤ တၢ်စးထီၣ်မၤ၀ဲဒၣ် ကလုာ်ဒူၣ်ဖီၣ်စုက၀ဲၤတၢ်ကရၢကရိ(EAO)အဒူၣ်(၁၀) လၢအဆဲးလီၤ၀ဲဒၣ်ထံကီၢ်ဒီဘ့ၣ်တၢ်ပတုာ်တၢ်ခး(NCA)တဖၣ် မၤ၀ဲ PPST တၢ်အိၣ်ဖှိၣ်လၢ Video Conferencing တၢ်ကတိၤအိးထီၣ်အပူၤ တစိၢ်တလီၢ်ၦၤပၢၤလီၢ်ဆ့ၣ်နီၤ သုးခိၣ်ကျၢၢ်စိ ယွဲၣ်စ့ၣ် စံးလီၤ၀ဲဒ်အံၤန့ၣ်လီၤႉ
“သုးမီၤစိရိၤပၢတၢ်အတီၢ်ပူၤ ခီဖျိသုးဒီးပၢၤကီၢ်သုးတဖၣ်သူ၀ဲဒၣ်တၢ်စုဆူၣ်ခီၣ်တကးခးသံ၀ဲထံဖိကီၢ်ဖိ ကမျၢၢ်တဖၣ်အဃိ ကမျၢၢ်ထံဖိကီၢ်ဖိ ၈၀၀ ဘျဲၣ်ဘၣ်သံ၀ဲဒၣ်ဒီး အဂၤ ၅ႇ၀၀၀ ဘျဲၣ် တၢ်ဖီၣ်ဟံးဂ့ၢ်၀ီအ၀ဲသ့ၣ်န့ၣ်လီၤႉ ကပတုာ်ကွံာ်ကယဲၢ်မ့ၢ်တၢ်စုဆူၣ်ခီၣ်တကးတၢ်ဖံးတၢ်မၤခဲလၢာ်လၢ ထံဂုၤကီၢ်ဂၤဒီးကီၢ်ပူၤတၢ်ကရၢကရိဃ့ထီၣ်၀ဲအံၤ သုးမီၤစိရိၤကွၢ်ကပာ်ကွံာ်ဒီးတပာ်သ့ၣ်ညါသးဘၣ်”အဂ့ၢ်န့ၣ် သုးခိၣ်ကျၢၢ်စိ ယွဲၣ်စ့ၣ် စံး၀ဲန့ၣ်လီၤႉ
သုးမီၤစိရိၤပၢဆှၢတၢ်လၢအတဖိးသဲစးအတီၢ်ပူၤ ထံရူၢ်ကီၢ်သဲးႇ တၢ်မုာ်တၢ်ခုၣ်ႇ ပၢပြးႇ မုၢ်ကျိၤ၀ဲၤကွာ်ႇတၢ်ဆါတၢ်ၦ့ၤႇကျိၣ်စ့ႇတၢ်ကူၣ်ဘၣ်ကူၣ်သ့ႇၦၤဂ့ၢ်၀ီႇတၢ်ဘံၣ်တၢ်ဘၢႇသဲစးတၢ်ဒိၣ်စိ ဒီး အသနၢၣ်လၢအဂၤတဖၣ်လီၤထုးကွံာ်၀ဲခီဖျိလၢ သုးမီၤစိရိၤ ပၢဆှၢရဲၣ်ကျဲၤတၢ်အကျိၤအကျဲတဘၣ်ဘၣ်အဃိလီၤအဂ့ၢ်န့ၣ် သုးခိၣ်ကျၢၢ်စိ ယွဲၣ်စ့ၣ် စံးအါထီၣ်၀ဲန့ၣ်လီၤႉ
လၢန့ၣ်အမဲာ်ညါ တကီၢ်ခါထံရူၢ်ကီၢ်သဲးတၢ်ဃံးတၢ်စ့ၤအံၤ ခီဖျိသုးမီၤစိရိၤဘှါရှဲ၀ဲဒၣ်လၢ တၢ်စုဆူၣ်ခီၣ်တကးအကျိၤအကျဲအဃိ ထံလီၢ်ကီၢ်ပူၤတၢ်ဒုးတၢ်ယၤဟဲဆူၣ်ထီၣ်ဒိၣ်ထီၣ်သ့၀ဲအဂ့ၢ်န့ၣ် (PPST)တစိၢ်တလီၢ် ၦၤပၢၤလီၢ်ဆ့ၣ်နီၤ သုးခိၣ်ကျၢၢ်စိ ယွဲၣ်စ့ၣ် ဟ့ၣ်ပလီၢ်စံး၀ဲန့ၣ်လီၤႉ
ခီဖျိတကီၢ်ခါသုးမီၤစိရိၤအတၢ်ဟူးတၢ်ဂဲၤတၢ်ဖံးတၢ်မၤတဖၣ်အဃိ ကီၢ်ပယီၤအံၤလၢဟီၣ်ခိၣ်ဒီဘ့ၣ်အမဲာ်ညါ အသူးသ့ၣ်လၤကပီၤဘၣ်ဟးဂီၤ၀ဲႇမဲာ်သၣ်ဘၣ်ဆံးဘၣ်အံၣ်၀ဲဒၣ်ဒီး ဘၣ်တၢ်နီၤဖးၦၤအဒူၣ်အဆၢအဂ့ၢ်န့ၣ် သုးခိၣ်ကျၢၢ်စိ ယွဲၣ်စ့ၣ် ပဲာ်ထံနီၤဖးစံးလီၤ၀ဲလၢတၢ်အိးထီၣ်တၢ်အိၣ်ဖှိၣ်မူးအပူၤန့ၣ်လီၤႉ
(PPST)တၢ်အိၣ်ဖှိၣ်အပူၤ တၢ်တၢၣ်ပီၣ်တဲသကိးဘၣ်ထွဲဒီး တၢ်ဖံးတၢ်မၤလၢတၢ်မၤ၀ဲလၢတကီၢ်ခါခဲအံၤတဖၣ်ဒီး ခါဆူညါတၢ်မၤအကျဲတဖၣ်န့ၣ်လီၤႉ တၢ်အိၣ်ဖှိၣ်အံၤတၢ်ကမၤ၀ဲ ၂ သီ တုၤလၢခဲမုၢ်ဆ့ၣ်(လါမ့ၤ ၂၈)သီအနံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်အိၣ်ဖှိၣ်ဘျီ၀ဲအံၤအပူၤ ကီၢ်ပယီၤဒီဘ့ၣ် ကၠိဖိဒံၣ်မိၣ်ကရဲၣ်တ့ၣ်သုးမုၢ်(ABSDF)ႇ ရၢၣ်ခၢၣ်ကီၢ်တၢ်ထူၣ်ဖျဲးပၣ်တံၣ်(ALP)ႇ ခၠီဒီကလုာ်သုးမုၢ်(CNF)ႇ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ႇ ကညီဒီကလုာ်စၢဖှိၣ်ကရၢ (KNU)ႇ တၢ်မုာ်တၢ်ခုၣ်ကီၣ်ကး(KNU§KNLA PC)ႇ ပအိၣ်ဒီကလုာ်တၢ်ထူၣ်ဖျဲးသုးမုၢ်ဒိၣ်(PNLO)ႇ တၢ်သူၣ်ထီၣ်က့ၤယိၤဒိၣ်ကီၢ်ကီၣ်ကး §ယိၤဒိၣ်ကီၢ်သုးမုၢ်ဒိၣ်(RCSS§SSA)ႇမိၣ်ကီၢ်သီပၣ်တံၣ်(NMSP) ဒီး လါဟူၣ်ဒံၣ်မိၣ်ကရဲၣ်တ့ၣ်ကရၢ(LDU)ခိၣ်နၢ်ခၢၣ်စးတဖၣ်ဟဲထီၣ်၀ဲန့ၣ်လီၤႉ
