လါမ့ၤ ၁၈ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲအပူၤကွံာ်စှၤသီအတီၢ်ပူၤ တၢ်ကစီၣ်ရၤလီၤသးလၢစိၣ်ရှၢၣ်မံၣ်ဒံၣ်ယၢၣ် (Social Media) အပူၤလၢ DKBA သုးခိၣ်ဒိၣ်စိ စီၤဆါအီၤႇ သုးခိၣ် ၄ ဂၤဃုာ်ဒီးသုးဖိဂံၢ်ဘါခံကထိဘျဲၣ် က့ၤပာ်ဖှိၣ်မၤသကိးတၢ်ဒီး KNU-ကညီဒီကလုာ်စၢဖှိၣ်ကရၢအံၤန့ၣ် မ့ၢ်တၢ်ကစီၣ်လၢအကမၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးခိၣ်ဒိၣ်စိ စီၤဆါအီၤအံၤ လၢအပူၤကွံာ်မ့ၢ်၀ဲ(DKBA)ထုးဖးသးကရူၢ်ဒီးခးလိာ်သးဒီး ပယီၤသုးအိၣ်၀ဲလၢအနံၣ်တဖၣ်ညါ၀ံၤအလီၢ်ခံ ဖဲအပူၤကွံာ် ၂၀၂၀ နံၣ် လါမးရှး ၁၂ သီအနံၤန့ၣ် အ၀ဲဃုာ်ဒီးအၦၤသုးဖိ(၁၃)လဲၤပာ်လီၤတၢ်စုက၀ဲၤလၢပယီၤသုးအအိၣ်န့ၣ်လီၤႉ
သုးခိၣ်ဒိၣ်စိ စီၤဆါအီၤလဲၤပာ်လီၤစုက၀ဲၤလၢ မုၢ်ထီၣ်ကလံၤထံးကီၢ်ခီသုး၀ဲၤလီၢ်သ့ၣ် မၠၣ်၀တံၣ်ကီၢ်ရ့ၣ်ႇ စုကလံၣ်၀့ၢ် ဆိၣ်စံမၠဲၣ်သ၀ီတၢ်လီၢ်တတီၤဒီး လဲၤစိာ်ဃုာ်၀ဲဒီး ကျိဖိ ၁၇ ခိၣ် ဃုာ်ဒီး ၆၀ မမႇ မ့ၣ်ပိၢ်ဒီးကျိချံၦာ်သၣ်တဖၣ်န့ၣ်လီၤႉ
တကီၢ်ခါခဲအံၤ သုးခိၣ်ဒိၣ်စိ စီၤဆါအီၤအံၤ အ၀ဲမ့ၢ်ၦၤတဂၤလၢတဖံးမၤ၀ဲလၢာ်တၢ်ဒ် DKBA (ထုးဖးသး) ကရူၢ်အသိးႇတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် -DKBA ကရူၢ်ဘၣ်အသိး တၢ်ကစီၣ်ရၤလီၤသးလၢ DKBA အသုးခံကထိဘျဲၣ် က့ၤပၣ်ဖှိၣ်မၤသကိးတၢ်ဒီး(KNU)တၢ်ဂ့ၢ်အံၤစ့ၢ်ကီး ပထံၣ်ဘၣ်လၢ KNU တကပၤ ပာ်ဂၢၢ်ပာ်ကျၢၤထုးထီၣ်ပာ်ဖျါ၀ဲတအိၣ်နီတမံၤဘၣ်န့ၣ်လီၤႉ
ဒ်န့ၣ်အသိး ခ့ၣ်အဲၣ်ယူၣ် သုးက့(၆)သုးခိၣ်တဂၤစ့ၢ်ကီး ဘၣ်ထွဲဒီး(DKBA)တၢ်ကစီၣ်ဟးထီၣ်တၢ်ဂ့ၢ်အံၤ မ့ၢ်ဒၣ်တၢ်ကစီၣ်လၢအကမၣ်လီၤအဂ့ၢ်န့ၣ် စံးဘၣ်ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ
