Home တၢ်ကစီၣ် လူၢ်ပျဲၢ်ကီၢ်ဆၣ် သ၀ီတနီၤအပူၤ တၢ်အိးထီၣ်တၢ်တၤကျိၣ်တၤစ့ကိးမုၢ်နံၤဒဲး

လူၢ်ပျဲၢ်ကီၢ်ဆၣ် သ၀ီတနီၤအပူၤ တၢ်အိးထီၣ်တၢ်တၤကျိၣ်တၤစ့ကိးမုၢ်နံၤဒဲး

963
0

လါယူၤ ၂၃ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ်ႇ လူၢ်ပျဲၢ်ကီၣ်ဆၣ် ဒူသ၀ီတနီၤအပူၤန့ၣ် လီၢ်က၀ီၤသုးခိးကီၢ်ဆၢ(BGF)ကရူၢ်ဒီး သ၀ီၦၤဘၣ်မူ ဘၣ်ဒါတဖၣ််တီခိၣ်ရိၣ်မဲ၀ဲဒီး အိးထီၣ်၀ဲတၢ်ဂဲၤလိာ်ကွဲတၢ်တၤကျိၣ်တၤစ့တဖၣ်ကိးမုၢ်နံၤကိးမုၢ်နၤဒဲးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤႉ

စးထီၣ်ဖဲအပူၤကွံာ်လါမးရှးထီၣ်တၢတနွံတုၤလၢခဲအံၤတစုန့ၣ် လူၢ်ပျဲၢ်ကီၢ်ဆၣ် ကၠိၣ်ခၠီဒိဂ့ၤသ၀ီဒီး ၀ဲလၣ်သ၀ီအဘၢၣ်စၢၤတၢ်လီၢ်တတီၤ သုးခိးကီၢ်ဆၢ(BGF)သုးခိၣ်စိ အူမံတပိၤ(ကိး)ကဘီယူၤႇသုးခိၣ်စိ ကိၤလၣ်သ့ဒီးဒူသ၀ီၦၤဘၣ်မူဘၣ်ဒါတဖၣ်တီခိၣ်ရိၣ်မဲဒီးအိးထီၣ်၀ဲ တၢ်ဒုးတဖှံဆီလီၢ်(ကြက်၀ိုင်း) ဒီးအၣ်ကလိၣ်(အံကလုံ)တၢ်တၤကျိၣ်တၤစ့တဖၣ်လီၤအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ“ တၢ်ဒုးတဖှံဆီလီၢ်အိၣ််ကၦဲၤထီၣ်၀ဲတလါလီၤႉ ဆီတဖှံလီၢ်အံၤ မၤ၀ဲလၢသုးခိၣ်စိမံတပိၤအမံၤလီၤႉ မၤ၀ဲတၢ်လီၢ်ခီန့ၣ်ဖဲကၠိၣ်ခၠီဒီး၀ဲလၣ်သ၀ီအဘၢၣ်စၢၤလီၤႉ ခဲအံၤန့ၣ်အိးထီၣ်ပာ်၀ဲအၣ်ကလိၣ်(အံကလုံ)လီၤႉ တၢ်ခဲလၢာ်ခဲဆ့န့ၣ်သုးခိၣ်စိလၣ်သ့ဟံးဃာ်၀ဲမူဒါဒီးပၢဆှၢရဲၣ်ကျဲၤ၀ဲလီၤႉ ၦၤသ၀ီလၢအဂၤန့ၣ်မးတအိၣ်ဒ်အံၤန့ၣ်ႉ တၢ်အိးထီၣ်၀ဲဆီတဖှံလီၢ်ဘၣ်ဆၣ် ၦၤအိၣ်လၢသ၀ီပူၤတဖၣ်တလဲၤ၀ါအါအါဘၣ်”အဂ့ၢ်န့ၣ်စံး၀ဲန့ၣ်လီၤႉ

တၢ်ဒုးတဖှံဆီလီၢ်ဒီးအၣ်ကလိၣ်တၢ်တၤကျိၣ်တၤစ့တဖၣ်အံၤ အပူၤကွံာ်တၢ်အိးထီၣ်မၤ၀ဲဒၣ်ဖဲ(BGF)သုးကလၢၤအလီၢ်ခံဘၣ်ဆၣ် ခီဖျိအိၣ်၀ဲဒၣ်လၢကမျၢၢ်ထံဖိကီၢ်ဖိဟးထီၣ်ဟးလီၤကျဲမုၢ်ဖးဒိၣ်အကပၤအဃိ တၢ်ဆီတလဲက့ၤအလီၢ်ဖဲတၢ်ကလဲၤ၀ဲလၣ်သ၀ီတကပၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

လၢန့ၣ်အမဲာ်ညါ တၢ်မၤ၀ဲတၢ်တၤကျိၣ်တၤစ့လၢဒူသ၀ီပူၤအံၤ လီၢ်က၀ီၤဖိတဖၣ်တအဲၣ်ဒိး၀ဲဘၣ်အသိး ဘၣ်ယိၣ်၀ဲလၢကကဲထီၣ်တၢ်မၤကမၣ်ကွီၢ်မ့ၣ်တၢ်မူးတၢ်ရၢ်တဖၣ်န့ၣ်လီၤႉ တကီၢ်ခါခဲအံၤခီဖျိခိ၀ံၣ်တၢ်ဆါဘၣ်ကူဘၣ်ဂာ်အိၣ်ဒံးဒီး ၦၤလၢအဟဲတၤကျိၣ်တၤစ့တဖၣ်မ့ၢ်ၦၤတဖၣ်လၢအိၣ်ဟဲလၢတၢ်ချၢအဃိ ဘၣ်ယိၣ်လၢခိ၀ံၣ်တၢ်ဆါကဘၣ်ကူဘၣ်ဂာ်အဂ့ၢ်န့ၣ် လီၢ်က၀ီၤဖိလၢအဂၤတဂၤစံး၀ဲန့ၣ်လီၤႉ

တၢ်တၤကျိၣ်တၤစ့သ့ၣ်တဖၣ်အံၤ လီၢ်က၀ီၤဖိတဖၣ်လဲၤဂဲၤလိာ်ကွဲ၀ဲတအိၣ်ဘၣ်ဒီး ၦၤလၢအဟဲဂဲၤလိာ်ကွဲတဖၣ်မ့ၢ်ၦၤလၢအအိၣ်ဟဲလၢဖၣ်အၣ်ႇစွ့ၣ်ကိႇလူၢ်ပျဲၢ်ဒီးဒူသထူၣ်၀့ၢ်တဖၣ်လီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

အၣ်ကလိၣ်တၢ်တၤကျိၣ်တၤစ့လီၢ်လၢအအိၣ်ဖဲသ၀ီပူၤတဖၣ်အံၤ BGF သုးတဖၣ်အိၣ်ခိး၀ဲတၢ်ဘံၣ်တၢ်ဘၢဒီး တၢ်ဟဲဂဲၤလိာ်ကွဲ၀ဲကိးမုၢ်နံၤကိးမုၢ်နၤဒဲးဒီး မ့မ့ၢ်ဆီတဖှံအလီၢ်န့ၣ်အိးထီၣ်၀ဲကိးနွံဒဲးဖဲမုၢ်ဃုနံၤႇမုၢ်နွံနံၤဒီး မုၢ်ခီၣ်ထံးတနံၤန့ၣ်လီၤႉ ဒ်န့ၣ်သိးကီၢ်ဆၢ၀့ၢ်တဖျၢၣ်လၢအမ့ၢ် မၠၣ်၀တံၣ်၀့ၢ်ပူၤစ့ၢ်ကီး စးထီၣ်ဖဲအပူၤကွံာ်လါန့ၣ် ၀့ၢ်ချၢက၀ီၤဒ့တနီၤအပူၤ ကလုာ်ဒူၣ်ဖီၣ်စုက၀ဲၤကရူၢ်တဖၣ်တီခိၣ်ရိၣ်မဲဒီး အိးထီၣ်၀ဲတၢ်တၤကျိၣ်တၢ်စ့ဒ်အံၤစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ