လါယူၤ ၂၃ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ် မၠၣ်၀တံၣ်၀့ၢ်ပူၤ ဖဲတနံၤအံၤ(လါယူၤ ၂၃)သီ ဂီၤခီ ၆ နၣ်ရံၣ်တခီအဆၢကတီၢ် သးၦၢ်လၢသုးမီၤစိရိၤတီၣ်ထီၣ်၀ဲတဂၤ တၢ်ဟဲခးအီၤဒီးကျိခံထံၣ်ဒီးသံ၀ဲဒၣ်န့ၣ်လီၤႉ
သးၦၢ်အူသါထ့(၅၈)နံၣ်လၢအဘၣ်တၢ်ခးသံအီၤအံၤ တၢ်ဟဲခးသံအီၤဖဲမၠၣ်၀တံၣ်၀့ၢ် နီၣ်ဂံၢ်(၂)က၀ီၤဒ့ႇနီၣ်ဂံၢ်(၂) ကျဲ ဘၣ်ဖဲအဆ့ၣ်နီၤအိၣ်လၢအဟံၣ်မဲာ်ညါအဆၢကတီၢ် ၦၤခးကျိဖိလၢအဟဲဒိးဒီးသိလ့ၣ်အသူတခိၣ်ဟဲခးသံအီၤလီၤအဂ့ၢ်န့ၣ် အဟံၣ်ဖိဃီဖိတဖၣ်စံး၀ဲန့ၣ်လီၤႉ
အူသါထ့လၢတၢ်ခးသံအီၤအံၤ ကျိဘၣ်၀ဲအဟၢဖၢအသးနါၦၢ်ခံထံၣ်ဒီး ဖဲတၢ်လဲၤဆှၢအီၤဆူမၠီၣ်လမၠဲၣ်တၢ်ဆါဟံၣ်အဆၢကတီၢ်သံ၀ဲဒၣ်လၢကျဲပူၤအဃိ ဘၣ်တၢ်ဟဲက့ၤကိးကဒါအီၤဆူမၠၣ်၀တံၣ်န့ၣ်လီၤႉ
ဘၣ်ထွဲဒီးတၢ်ခးသံအူသါထ့တၢ်ဂ့ၢ်အံၤ ကဘၣ်ထွဲလိာ်သးဒီးအပူၤကွံာ်(လါမးရှး)သၢနွံတနွံအခါ ဖဲသးစၢ်တဖၣ်မၤ၀ဲတၢ်ထီဒါသုးမီၤစိရိၤတၢ်ပာ်ဖျါထီၣ်သးအဆၢကတီၢ် သးၦၢ်အူသါထ့အံၤဟ့ၣ်၀ဲတၢ်ကဆီၣ်ဆူသုးမီၤစိရိၤအအိၣ်ဒီး တၢ်ဖီၣ်၀ဲန့ၢ်၀ဲသးစၢ်လၢအပာ်ဖျါထီၣ်သး တနီၤအဂ့ၢ် ၦၤလၢအဘူးဒီးၦၤသံအဟံၣ်ဖိဃီဖိတဂၤစံး၀ဲန့ၣ်လီၤႉ
စးထီၣ်ဖဲလါဖ့ၤဘြူၤအါရံၤ ၁ သီ သုးမီၤစိရိၤဟံးဆူၣ်ကွံာ်ထံကီၢ်တၢ်စိတၢ်ကမီၤ၀ံၤအလီၢ်ခံ ကညီကီၢ်စဲၣ် မၠၣ်၀တံၣ်၀့ၢ်ပူၤ တၢ်မၤ၀ဲတၢ်ထီဒါသုးမီၤစိရိၤတၢ်ပာ်ဖျါထီၣ်သးအိၣ်၀ဲန့ၣ်လီၤႉ လၢတၢ်ပာ်ဖျါထီၣ်သးအပူၤ တၢ်ဖီၣ်၀ဲကမျၢၢ်အိၣ်အဂၤ(၁၀၀)ဘျဲၣ်ဒီး တၢ်တီၣ်ထီၣ်သဲစးတၢ်ဘျၢနီၣ်ဂံၢ် ၅၀၅(က) ဃုာ်ဒီးသဲစးတၢ်ဘျၢနီၣ်ဂံၢ်အကလုာ်ကလုာ်ဒီး တုၤလၢခဲအံၤတၢ်ဖီၣ်ဃာ်ဒံး အ၀ဲသ့ၣ်ဒီးဘၣ်ထီၣ်၀ဲတၢ်မူးတၢ်ရၢ်အဖၢမုၢ်ဒံးန့ၣ်လီၤႉ
