Home တၢ်ကစီၣ် သုးမီၤစိရိၤအသုးဒီး(BGF)သုးပာ်ဖှိၣ် ဖီၣ်၀ဲလီၢ်က၀ီၤဖိအသိလ့ၣ်ႇသိလ့ၣ်ယီၢ်တဖၣ်လၢတၢ်ဂ့ၢ်တအိၣ်

သုးမီၤစိရိၤအသုးဒီး(BGF)သုးပာ်ဖှိၣ် ဖီၣ်၀ဲလီၢ်က၀ီၤဖိအသိလ့ၣ်ႇသိလ့ၣ်ယီၢ်တဖၣ်လၢတၢ်ဂ့ၢ်တအိၣ်

734
0

လါယူၤ ၂၈ သီႇ ၂၀၂၁ နံၣ်ႇ ခ့ၣ်အဲးစံၣ်

မိၣ်ကီၢ်စဲၣ်ႇ ဒူသထူၣ်ကီၢ်ရ့ၣ်ႇ ဘံလ့ကီၢ်ဆၣ် စွ့ၣ်လီအ့သ၀ီကရူၢ် နးကၠံသ၀ီအပူၤ ဖဲတနံၤအံၤ(လါယူၤ ၂၈) သီအနံၤ မီၤစိရိၤအသုးဒီးသုးခိးကီၢ်ဆၢ BGF သုးပာ်ဖှိၣ်သုးတဖၣ် ဖီၣ်၀ဲဒၣ်လီၢ်က၀ီၤသ၀ီဖိအသိလ့ၣ်ႇသိလ့ၣ်ယီၢ်လၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤၦၤမၤတၢ်ကစီၣ်ဖိအအိၣ်န့ၣ်လီၤႉ

သုးမီၤစိရိၤအသုး နီၣ်ဂံၢ်(၁၂)ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ=၅၄၉)ႇ နီၣ်ဂံၢ်(၈)ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ် (စကခ)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ=၄၀၂)သုးကရူၢ်တဖၣ်ဒီး သုးခိးကီၢ်ဆၢ(BGF)နီၣ်ဂံၢ်(၁၀၁၁)သုးရ့ၣ် သုးခိၣ်ဒိၣ်ဖိ ဟ့ၤနရံၤတီခိၣ်ရိၣ်မဲသုးကရူၢ်တဖၣ်ကးတံၢ်ဃာ်၀ဲကျဲဒီး ဖီၣ်၀ဲဒၣ်သိလ့ၣ်ႇသိလ့ၣ်ယီၢ်လၢအဟးထီၣ်ဟးလီၤတဖၣ်ခဲလၢာ်လၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ခဲအံၤနါက့တၢ်ကးတံၢ်၀ဲဒၣ်လီတဲစိအကျိၤလီၤႉ ၀ံၤဘျီအ၀ဲသ့ၣ်ကးတံၢ်၀ဲကျဲဒီး ကယဲၢ်မ့ၢ်သိ လ့ၣ်ႇသိလ့ၣ်ယီၢ်လၢအဟဲတဖၣ်န့ၣ်ဖီၣ်၀ဲခဲလၢာ်လီၤႉ ခဲအံၤဖီၣ်၀ဲသိလ့ၣ်ယီၢ်ကအိၣ်၀ဲလၢအခိၣ် ၆၀ ညါလံႉ သိလ့ၣ်ဒုကအိၣ်၀ဲ ၅ ခိၣ် ၆ ခိၣ်ညါလီၤႉ ခဲအံၤပာ်၀ဲဒၣ်ဖဲနးကၠံကၠိကရၢၢ်ပူၤလီၤႉ ဖဲန့ၣ်မီၤစိရိၤအသုးနါက့အိၣ်ႇ BGF အသုးနါက့အိၣ်ႇ သိလ့ၣ်အကစၢ်နါက့အိၣ်ခဲလၢာ်လီၤႉ ကဟဲကးတံၢ်ကျဲဒ်အံၤစ့ၢ်ကီးတတဲဆိပာ်၀ဲလီၢ် က၀ီၤဖိဘၣ်အသိး ဘၣ်မနုၤအဃိဘၣ်ဖီၣ်၀ဲလဲၣ်န့ၣ်တတဲ၀ဲဘၣ်ႉ ဘၣ်ဆၣ်တဲ၀ဲတခါလၢ ဆၢကတီၢ်ခဲအံၤတဟ့ၣ်လဲၤသိလ့ၣ်ဒီးသိလ့ၣ်ယီၢ်တဖၣ်ဘၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဟီၣ်က၀ီၤ၀ဲအံၤအိၣ်၀ဲဒၣ်လၢကညီဒီကလုာ်စၢဖှိၣ်ကရၢ -KNU သုးက့(၁)ဟီၣ်က၀ီၤအပူၤဒီး တကီၢ်ခါခဲအံၤလၢပနွဲၢ်ကျါတကပၤ တၢ်ကးတံၢ်ဃာ်၀ဲစ့ၢ်ကီးကျဲတဖၣ်ခဲလၢာ်ဒီး သုးမီၤစိရိၤအသုးခဲအံၤတဖၣ်မ့ၢ်သုးရ့ၣ်ကရူၢ်လၢအဟဲသီတဖၣ်န့ၣ်လီၤႉ သုးမီၤစိရိၤအသုးကရူၢ်၀ဲအံၤ ပာ်ဖှိၣ်မၤသကိးတၢ်ဒီးသုးခိၣ်ဒိၣ်ဖိဟ့ၤနရံၤတီခိၣ်ရိၣ်မဲဟီၣ်က၀ီၤ(BGF)သုးကရူၢ်တဖၣ်ဒီး သုးနီၣ်ဂံၢ်အိၣ်၀ဲ(၁၈၀)ဃၣ်ဃၣ်အဂ့ၢ်န့ၣ် KNU တကပၤ စံး၀ဲန့ၣ်လီၤႉ

စးထီၣ်ဖဲသုးမီၤစိရိၤဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤ၀ံၤအလီၢ်ခံ KNU သုးက့(၁)ဟီၣ်က၀ီၤအပူၤ သုးမီၤစိရိၤအသုးႇသုးခိးကီၢ်ဆၢ(BGF)သုးပာ်ဖှိၣ်ဒီး KNU စုဒုၣ်တီၤအဖီလာ်သုးကရူၢ်တဖၣ်အဘၢၣ်စၢၤ တၢ်ခးလိာ်သးကဲထီၣ်အိၣ်၀ဲတလီၢ်လီၢ်န့ၣ်လီၤႉ တကီၢ်ခါခဲအံၤစ့ၢ်ကီး သုးမီၤစိရိၤတကပၤမၤအါထီၣ်၀ဲသုးဂံၢ်ဘါဒီးဒီၣ်တဲာ်ဃာ်၀ဲတၢ်ဆဲးကျိးလီတဲစိအကျိၤတဖၣ်အသိး ကးတံၢ်ဃုာ်စ့ၢ်ကီးဒီးကျဲတဖၣ်အဃိ ဘၣ်ယိၣ်လၢတၢ်ဒုးကကဲထီၣ်လီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ