လါယူၤ ၂၈ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ၀ီၢ်ရီဟီၣ်က၀ီၤ တၢ်ဆဲးကျိး(mytel)အတၢၣ်လၢသုးမီၤစိရိၤထီထီၣ်ဃာ်၀ဲ လၢသ၀ီအပူၤတဖၣ် တၢ်မၤဟးဂီၤအိၣ်၀ဲ ၅ ခါတခါလံအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
၀ီၢ်ရီဟီၣ်က၀ီၤ ကၠီၣ်ဘလူသ၀ီ က၀ီၤဒ့(၂)အပူၤ ဖဲလါယူၤ ၂၇ သီႇ မုၢ်နၤခီ ၈ နၣ်ရံၣ်ဘျဲၣ်အဆၢကတီၢ် တၢ်ဟဲမၤပိၢ်ဖးထီၣ်၀ဲတၢ်ဆဲးကျိး(mytel)အတၢၣ်လၢတၢ်ထီထီၣ်ဃာ်၀ဲအံၤဒီး ဖဲန့ၣ်စဲးတၢ်ဖိတၢ်လံၤတဖၣ်မ့ၣ်အူအီၣ်ဟးဂီၤကွံာ်၀ဲအဂ့ၢ်န့ၣ် သ၀ီဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်ဖဲတနံၤအံၤ(လါယူၤ ၂၈)သီအနံၤန့ၣ်လီၤႉ
အ၀ဲစံး၀ဲလၢ“ဖဲသ၀ီပူၤအံၤအိၣ်၀ဲဒၣ်(Telenor)အတၢၣ်ဒီး(mytel)အတၢၣ်ခံခါလီၤႉ ဖဲမဟါ ၈ နၣ်ရံၣ်ဘျဲၣ်အခါန့ၣ် မ့ၣ်ပိၢ်ပိၢ်ဖးထီၣ်လၢ (mytel)လီတဲစိအတၢၣ်ခီၣ်ထံးဒီး နၢ်ဟူအကလုၢ်သီၣ်ဖးဒိၣ်ညါလီၤႉ ခီဖျိပျံၤတၢ်အဃိလဲၤကွၢ်တဘူၣ်နီတဂၤဘၣ်ႉ ပိၢ်ဖးထီၣ်၀ဲတထံၣ်လီၤႉ မ့မ့ၢ်လီတဲစိအကျိၤဒုဆဲးကျိးတဲန့ၢ်ဒံးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ဖဲအပူၤကွံာ်(လါယူၤ ၂၄)သီအနံၤစ့ၢ်ကီး ထံမွီၤထိးႇတီၣ်ဒံႇကၠိၤခ၀ိၤႇဖါပြးန့ၣ် မ့ၣ်အူအီၣ်(mytel)တၢ်ဆဲးကျိး လီတဲစိအတၢၣ်စ့ၢ်ကီးန့ၣ်လီၤႉ လၢတၢ်န့ၣ်အဃိလၢ၀ီၢ်ရီဟီၣ်က၀ီၤအပူၤ ၅ သီအတီၢ်ပူၤ မ့ၣ်အူအီၣ်ဟးဂီၤကွံာ်၀ဲ သုးမီၤစိရိၤပၢလီတဲစိအတၢၣ် ၅ ခါလံန့ၣ်လီၤႉ
“တၢ်မၤဟးဂီၤလီတဲစိအတၢၣ်ႇမ့ၣ်အူအီၣ်ဟးဂီၤ၀ဲတဖၣ်အံၤ ပဃုသ့ၣ်ညါသမံသမိး၀ဲလီၤႉ ကဆဲးမၤ၀ဲဒ် KNU တၢ်သိၣ်တၢ်သီအိၣ်၀ဲအသိးလီၤ”အဂ့ၢ်န့ၣ် KNU ၀ီၢ်ရီကီၢ်ဆၣ် ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်န့ၣ်လီၤႉ
တၢ်မၤဟးဂီၤလီတဲစိအတၢၣ်လၢသုးမီၤစိရိၤပၢ၀ဲအဖီခိၣ် ကလုာ််ဒူၣ်ဖီၣ်စုက၀ဲၤ ကရူၢ်လၢအဘၣ်ထွဲဟီၣ်က၀ီၤပူၤတဖၣ်စ့ၢ်ကီး ဃုသ့ၣ်ညါသမံသမိး၀ဲအသိး ခီဖျိမ့ၣ်အူအီၣ်ဟးဂီၤကွံာ်လီတဲစိအတၢၣ်အဃိ လီၢ်က၀ီၤဖိတဖၣ်ဘၣ်ယိၣ်၀ဲလၢတၢ်ဒုးကဟဲက့ၤကဲထီၣ်အသီတဘျီကဒီးအဂ့ၢ်န့ၣ် သ့ၣ်ညါဘၣ်လၢသ၀ီၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ
