၀ါခဲၤမၣ်ကီၢ်ဆၣ်ပူၤတၢ်ထၢသုးအသီအဂီၢ် ၦၤလၢအဖီၣ်မဲဘၣ်ဒီးတအဲၣ်ဒိးလဲၤ၀ဲတဖၣ် ဘၣ်ဟ့ၣ်စ့ခံကလီၢ်ဘျဲၣ်

လါယူၤ ၂၂ သီႇ ၂၀၂၁ နံၣ်ႇ ခ့ၣ်အဲးစံၣ်

အ့ၣ်ယၣ်၀တံၣ်ကီၢ်ခီဒိၣ်ႇမၠီမၠးကီၢ်ရ့ၣ်ႇ၀ါခဲၤမၣ်ကီၢ်ဆၣ်အပူၤ သ၀ီတနီၤအပူၤန့ၣ် လၢတၢ်ထၢသုးဖိသီအဂီၢ် ၦၤလၢအဖီၣ်မဲဘၣ်လၢကဘၣ်လဲၤသုးဒီးမ့ၢ်တအဲၣ်ဒိးလဲၤဘၣ်န့ၣ် ဘၣ်ဟ့ၣ်လီၤ၀ဲစ့ခံကလီၢ်ဘျဲၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

“သ၀ီတနီၤန့ၣ်ဖီၣ်၀ဲမဲမီၤနီၤႉ ဖီၣ်မဲဘျီတနီၤန့ၣ်ဘၣ်၀ဲလီၤႉ ဘၣ်၀ဲနါက့တအဲၣ်ဒိးလဲၤ၀ဲဘၣ်ႇလဲၤတဘူၣ်ဘၣ်ႉ ၀ံၤဘျီသ၀ီသးၦၢ်တဲလၢ မ့ၢ်တလဲၤဘၣ်န့ၣ်မၢဟ့ၣ်လီၤစ့ခံကလီၢ်ဘျဲၣ်လီၤႉ တဲ၀ဲလၢစ့တဖၣ်န့ၣ်ဘၣ်က့ၤငါၦၤ လၢအဂၤလီၤႉ ခဲအံၤၦၤလၢအသ့ၣ်ညါလိာ်သးဒီးယၤတဂၤဖီၣ်ဘၣ်မဲဒီး လဲၤဟ့ၣ်လီၤ၀ဲစ့ဒ်သ၀ီသးၦၢ်ဃ့ ၀ဲအသိးလီၤ”အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ

လၢန့ၣ်အမဲာ်ညါ သ၀ီသးၦၢ်ဟးတဲ၀ဲလၢ ၦၤလၢအဘၣ်လဲၤလၢၦၤအလီၢ်တဖၣ်န့ၣ်စ့ၢ်ကီး ကဒိးန့ၢ်ဘၣ်တၢ်ဆီၣ်ထွဲစ့ ၃ ကလီၢ်ကၠးအဂ့ၢ်ဒီး ဘၣ်ထွဲဒီးတၢ်ကဟ့ၣ်၀ဲစ့ ၃ ကလီၢ်တၢ်ဂ့ၢ်အံၤအဖီခိၣ် ၦၤတနီၤသးအိၣ်လဲၤ၀ဲဒၣ်ဒီး ၦၤလၢအလဲၤလၢၦၤအလီၢ်တဖၣ်စ့ၢ်ကီးအိၣ်၀ဲအါမးအဂ့ၢ်န့ၣ် လီၢ်က၀ီၤဖိတဂၤဃီအ၀ဲန့ၣ်စံးအါထီၣ်၀ဲန့ၣ်လီၤႉ

စးထီၣ်ဖဲအပူၤကွံာ်လါယူၤထီၣ်သီအခါ တၢ်ဟးလူၤထၢသုးအသီလၢ၀ါခဲၤမၣ်ကီၢ်ဆၣ် သ၀ီအပူၤတဖၣ်ဒီး မ့ၢ်သုးမီၤစိရိၤအသုးရ့ၣ်ကရူၢ်မနုၤထၢ၀ဲလဲၣ်န့ၣ် လီၢ်က၀ီၤသ၀ီဖိတဖၣ်တသ့ၣ်ညါ၀ဲဘၣ်အသိး တၢ်ထၢသုးအသီဒ်အံၤစ့ၢ်ကီး တၢ်ဘၣ်ယိၣ်ဘၣ်ဘှီအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

တၢ်ထၢသုးအသီအံၤန့ၣ် ကဘၣ်ကဲ၀ဲဒၣ်ကမျၢၢ်သုးအဂ့ၢ်ႇၦၤလၢတၢ်ကိး၀ဲသ့ၣ်တဖၣ်န့ၣ် သုးမီၤစိရိၤကဟ့ၣ်၀ဲသုးတၢ်မၤလိဒီး ထီၣ်တၢ်မၤလိမ့ၢ်၀ံၤန့ၣ်ကဘၣ်က့ၤအိၣ်လၢအကစၢ်သ၀ီပူၤဒီး ကဘၣ်ဟံးမူဒါလၢသ၀ီတၢ်ဘံၣ်တၢ်ဘၢအဂီၢ်လီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဘၣ်ထွဲဒီးတကီၢ်ခါတၢ်ထၢစ့တၢ်ဂ့ၢ်အံၤ ဒ်ၦၤလၢအဘူးဒီးသ၀ီသးၦၢ်တဖၣ်စံး၀ဲအသိးန့ၣ် လၢကဘၣ်ထၢစ့အဂီၢ်သုးမီၤစိရိၤတဲဃာ်၀ဲတအိၣ်ဘၣ်ဒီး ရဲၣ်ကျဲၤဃာ်၀ဲလၢ ၦၤလၢအလဲၤသုး လၢၦၤအလီၢ်တဖၣ်န့ၣ် ကဘၣ်ဟ့ၣ်စ့အီၣ်လိးဟံၣ်တဖျၢၣ်န့ၣ်ထဲ ၃၀၀၀ ကၠးလီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

သုးမီၤစိရိၤမၤ၀ဲဒၣ်တၢ်ထၢသုးအသီအံၤ တကီၢ်ခါတုၤလၢခဲအံၤကဲထီၣ်သးလၢအ့ၣ်ယၣ်၀တံၣ်ဟီၣ်က၀ီၤ ၀ါခဲၤမၣ်ကီၣ်ဆၣ်အပူၤလီၤဒီး ကီၢ်ဆၣ်လၢအဂၤဟီၣ်က၀ီၤအပူၤတဖၣ် တနၢ်ဟူလၢတၢ်ထၢသုးအသီဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

ကီၢ်ပယီၤအပူၤ ဒ်တၢ်ပာ်ပနီၣ်ပာ်လီၤတၢ်သိၣ်တၢ်သီလၢတကဲသုးတန့ၢ်တအိၣ်၀ဲဘၣ်အသိး တကီၢ်ခါသုးမီၤစိရိၤထၢသုးအသီအံၤစ့ၢ်ကီးတဖိး၀ဲသဲစးဘၣ်ဒီး မၢဆူၣ်ဒီးထၢသုးဖိအသီလၢအတပၣ်ဒီး ကမျၢၢ်အတၢ်ဘၣ်သးဘၣ်အံၤန့ၣ် မ့ၢ်တၢ်လၢအမၤကမၣ်၀ဲၦၤဂ့ၢ်၀ီခွဲးယာ်တခါလီၤအဂ့ၢ်န့ၣ် ၦၤဃုသ့ၣ်ညါထံရူၢ်ကီၢ်သဲးဖိတဖၣ်စံး၀ဲန့ၣ်လီၤႉ