လါယူၤ ၁၇ သီႇ ၂၀၂၁ နံၣ်ႇ ခ့ၣ်အဲးစံၣ်
တၢ်ကစီၣ်ရၤလီၤသးလၢကညီဒီကလုာ်ဂၢၤသးကရၢ(KNDO)အသုးမၤ၀ံ၀ဲဒၣ်ကမျၢၢ်တၢ်ဂ့ၢ်အံၤ ဒ်သိးတၢ်ကဲထီၣ်သးအမ့ၢ်အတီကဟဲဖျါထီၣ်အဂီၢ် KNU- ကညီဒီကလုာ်စၢဖှိၣ်ကရၢ(လီၢ်ခၢၣ်သး) ကဒုးအိၣ်ထီၣ်၀ဲတၢ်ဃိထံသ့ၣ်ညါတၢ်ကရူၢ်တဖုဒီး ကမၤ၀ဲတၢ်သမံသမိးတဖၣ်အဂ့ၢ်န့ၣ် ထုးထီၣ်ပာ်ဖျါ၀ဲတၢ်ကစီၣ်ဖဲ(လါယူၤ ၁၆)သီအနံၤန့ၣ်လီၤႉ
ဖီၣ်စုက၀ဲၤတၢ်ခးလိာ်သးကဲထီၣ်အပူၤ ခ့ၣ်အဲၣ်ယူၣ်အံၤကလူၤပိာ်မၤထွဲ(Geneva Convention)လၢအတတူၢ်လိာ်၀ဲတၢ်မၤသံကမျၢၢ်တဖၣ်ဘၣ်အံၤဒီး ဘၣ်ထွဲဒီးတၢ်ဂ့ၢ်ကဲထီၣ်သးတဖၣ်အံၤစ့ၢ်ကီး ဒ်သဲစးတၢ်ဘျၢလၢအဘၣ်ထွဲအိၣ်၀ဲအသိး ကဘၣ်ဟံးဂ့ၢ်၀ီအဂီၢ်တၢ်ပာ်ပနီၣ်ဃာ်၀ဲအိၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
KNU နဲၣ်ရွဲၣ်သဃဲၤ(၂)ပဒိၣ်စီၤလၣ်ထိ စံး၀ဲလၢ“တၢ်ဂ့ၢ်တခါအံၤ ခ့ၣ်အဲၣ်ယူၣ် တၢ်ဒီတဒၢ၀ဲၤကျိၤဒီး သုး၀ဲၤလီၢ်ခိၣ်သ့ၣ်ကပာ်ဖှိၣ်ထီၣ်သးဒီး ကဟံးထီၣ်ဖီၣ်ထီၣ်၀ဲအိၣ်လီၤႉ ခဲအံၤခီဖျိတၢ်ကစီၣ်ပာ်ဖျါ၀ဲ အကလုာ်ကလုာ်အဃိ တၢ်ကဲထီၣ်သးနီၢ်နီၢ်ႇ တၢ်ဂ့ၢ်တၢ်ကျိၤမ့ၢ် အအိၣ်ဒ်လဲၣ်န့ၣ်ႇ လံာ်ထီဒါစ့ၢ်ကီးမ့ၢ်အမ့ၢ်ထဲလဲၣ်ႇမ့ၢ်အဘၣ်ထဲလဲၣ်န့ၣ် ခီဖျိတသ့ၣ်ညါဒံးဘၣ်အဃိ ပမၤတသ့နီတမံၤဒံးဘၣ်ႉ ဒ်တၢ်ကရၢကရိတၢ်ဘျၢသဲစးအသိး ကဘၣ်ဆဲးဃိထံသမံသမိးလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ဖဲအပူၤကွံာ်(လါယူၤ ၁၃)သီအနံၤ သုးမီၤစိရိၤတၢ်ကစီၣ်အပူၤပာ်ဖျါ၀ဲလၢ မၠၣ်၀တံၣ်ကီၢ်ရ့ၣ်အပူၤ ဖဲလါမ့ၤ ၃၁ သီအနံၤန့ၣ် KNDO မၤသံ၀ဲဒၣ်ကမျၢၢ်(၂၅)ဂၤ လၢအတ့ထီၣ်(အူဟူၤကျိ) တိၤဖဲကနဲလ့=မီၤခံအဘၢၣ်စၢၤန့ၣ်လီၤႉ
ဘၣ်ထွဲဒီးတၢ်ဂ့ၢ်အံၤ KNDO ဂၢၤသးခိၣ်ကျၢၢ်စ့ၢ်ကီးစံး၀ဲလၢ ၦၤလၢအသံတဖၣ်အံၤတမ့ၢ်၀ဲၦၤကမျၢၢ်ဘၣ်ဒီး မ့ၢ်၀ဲဒၣ်သုးမီၤစိရိၤအသုးဖိတဖၣ်လီၤအဂ့ၢ်န့ၣ် စံးဘၣ်ခ့ၣ်အဲးစံၣ်ဖဲ(လါယူၤ ၁၄)သီအနံၤန့ၣ်လီၤႉ
ဖဲအပူၤကွံာ်(လါယူၤ ၁၃)သီအနံၤ သုးမီၤစိရိၤမုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်ဆှၢထီၣ်လံာ်ဆူ KNU လီၢ်ခၢၣ်သးအအိၣ်ဒီးစံး၀ဲလၢ ၀ီၤလ့ၤတၢ်မၤသံမၤ၀ီတၢ်ဂ့ၢ်အံၤ မၤကမၣ်၀ဲဒၣ်ထံကီၢ်ဒီဘ့ၣ်တၢ်ပတုာ်တၢ်ခးအလံာ်ဆဲးပနီၣ် အဆၢဒိၣ်(၃)ႇအဆၢဖိ(၉) အဆၢဖိနီၤဖး(ခ)တၢ်သိၣ်တၢ်သီတဖၣ်ဒီး ခ့ၣ်အဲၣ်ယူၣ်အစုဒုၣ်တီၤကရူၢ်တဖၣ်ကလူၤပိာ်မၤထွဲဒ်လံာ်ဆဲပနီၣ်တၢ်သိၣ်တၢ်သီဒီး ကဖီၣ်ဟံးဂ့ၢ်၀ီၦၤလၢအမၤကမၣ်တၢ်တဖၣ်န့ၣ်လီၤႉ
“ကယဲၢ်မ့ၢ်တၢ်ကရၢကရိခဲလၢာ်န့ၣ် အိၣ်၀ဲဒီးတၢ်သိၣ်တၢ်သီႇတၢ်ဘျၢသဲစးလၢတၢ်ပာ်လီၤ၀ဲတဖၣ်လီၤႉ ပခ့ၣ်အဲၣ်ယူၣ်စ့ၢ်ကီးအိၣ်၀ဲဒီးကီၢ်သူလ့ၤတၢ်ဘျၢသဲစးလီၤႉ တၢ်ဘျၢသဲစးစ့ၢ်ကီးအိၣ်၀ဲဒီးအတၢ်ပနီၣ်တဖၣ်လီၤႉ တၢ်ကရၢကရိဒၣ်၀ဲန့ၣ်အိၣ်ဒီးတၢ်သိၣ်တၢ်သီလီၤႉ တၢ်ကရၢကရိတခါအတၢ်အိၣ်ဆၢထၢၣ်လၢအဂၢၢ်အကျၢၤႇ တၢ်သိၣ်တၢ်သီတၢ်ဘျၢအိၣ်လီၤမီၤနီၤ” အဂ့ၢ်န့ၣ် ပဒိၣ်စီၤလၣ်ထိ စံးအါထီၣ်၀ဲန့ၣ်လီၤႉ
