လါယူၤလံ ၁၄ သီႇ ၂၀၂၁ နံၣ်ႇ ခ့ၣ်အဲးစံၣ်
သုးမီၤစိရိၤရၤလီၤတၢ်ကစီၣ်လၢ(KNDO)ကကူၣ်အၢကူၣ်သီ ခ့ၣ်အဲၣ်ယူၣ်– ကညီဒီကလုာ်စၢဖှိၣ်ကရၢခိၣ်နၢ်တဖၣ်တၢ်ကစီၣ်အံၤ တဘၣ်လိၣ်ကနၣ်အီၤဘၣ်ဒီး တၢ်အ၀ဲန့ၣ်မ့ၢ်ဒၣ် ဒုၣ်ဒါအတၢ်ဂိာ်စုဂိာ်ခီၣ်တခါလီၤအဂ့ၢ် ကညီဒီကလုာ်ဂၢၤသး ကရၢ(KNDO)ထုးထီၣ်ပာ်ဖျါစံး၀ဲဖဲတနံၤအံၤ(လါယူၤလံ ၁၄)သီအနံၤန့ၣ်လီၤႉ
ဖဲစှၤသီအတီၢ်ပူၤလၢ(social media)အပူၤ လံာ်ဟဲဖျါထီၣ်၀ဲတဘ့ၣ်လၢ(KNDO) ကကူၣ်အၢကူၣ်သီ(KNU)ခိၣ်နၢ်တဖၣ်တၢ်ဂ့ၢ်အံၤ လ့ၤတက့ၤတမ့ၢ်တတီဘၣ်အဂ့ၢ်န့ၣ် (KNDO)သုးရိၣ်မဲခိၣ်ကျၢၢ် သုးခိၣ်ကျၢၢ်ဖိ စီၤနၢၤဒါမၠး စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ
“ဘၣ်ပလီၢ်သးလၢဒုၣ်ဒါတၢ်ဂိာ်စုဂိာ်ခီၣ်မီၤနီၤႉ အတဲ၀ဲလၢၦၤကဟးကူၣ်(ခ့ၣ်အဲၣ်ယူၣ်)ခိၣ်နၢ်တဖၣ်န့ၣ် တဘၣ်ဃးတၢ်နီတမံၤဘၣ်ႇ မ့ၢ်ဒၣ်ဒုၣ်ဒါဆဲးတိဆဲးဂိာ်တၢ်ခဲလၢာ်လီၤႉ တၢ်ကူၣ်အၢကူၣ်သီန့ၣ်တအိၣ်လၢပသးကံၢ်ပူၤဘၣ်ႉ အိၣ်ဒၣ်လၢဒုၣ်ဒါအ တၢ်ဂိာ်စုဂိာ်ခီၣ်န့ၣ်အစးထီၣ်မၤတၢ်အမၠိမၠိလီၤႉ ယအဲၣ်ဒိးတဲလၢဘၣ်ပလီၢ်သးတၢ်တခါန့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ဒ်လံာ်လၢအရၤလီၤသးလၢ(social media)ပူၤပာ်ဖျါ၀ဲအသိး ဖဲ ၂၀၂၁ နံၣ်ႇ လါမ့ၤ ၃၁ သီ မၠၣ်၀တံၣ်ကီၢ်ရ့ၣ် ၀ီၤလ့ကီၢ်ဆၣ်အပူၤ ဘၣ်ထွဲဒီးတၢ်ကဲထီၣ်သးလၢတၢ်မၤသံ၀ဲၦၤအဂၤ(၂၅)ဂၤတၢ်ဂ့ၢ်အံၤ (ခ့ၣ်အဲၣ်ယူၣ်)ဃိထံသမံသမိးစံၣ်ညီၣ်ဆၢတဲာ်လီၤ၀ဲဒ်အံၤအဖီခိၣ် စီၤနၢၤဒါမၠး လ့ၤတက့ၤတတူၢ်လိာ်၀ဲဘၣ်အမဲာ်ညါ ရဲၣ်ကျဲၤ၀ဲလၢကကူၣ်အၢကူၣ်သီ(ခ့ၣ်အဲၣ်ယူၣ်)ခိၣ်နၢ်တဖၣ်အဂ့ၢ်န့ၣ် ပာ်ဖျါဃာ်၀ဲန့ၣ်လီၤႉ
ဒ်တနံၤညါအံၤ(KNDO)လံာ်ခီၣ်ဆၢအပူၤအသိး တၢ်မၤသံဆှုၣ်မဲာ်ကဲၤမဲာ်တၢ်ဂီၤမူ လၢအရၤလီၤသးလၢ(media Platform)အပူၤအံၤ မ့ၢ်၀ဲဒၣ်တၢ်ဂိာ်စုဂိာ်ခီၣ်တၢ်ကစီၣ်အသိး (KNDO)ရဲၣ်ကျဲၤလၢကကူၣ်အၢကူၣ်သီ(KNU)ခိၣ်နၢ်တဖၣ်တၢ်ကစီၣ်အံၤစ့ၢ်ကီး လ့ၤတက့ၤတမ့ၢ်တတီ၀ဲဘၣ်ဒီး သုးမီၤစိရိၤအတၢ်ဂိာ်စုဂိာ်ခီၣ်လၢအတအဲၣ်ဒိးကညီဒီတကလုာ်ကအိၣ်ဃူအိၣ်ဖိးဘၣ်အံၤ အဲၣ်ဒိးဟ့ၣ်ပလီၢ်လၢ တဘၣ်ကနၣ်အီၤဘၣ်အဂ့ၢ် ပာ်ဖျါ၀ဲန့ၣ်လီၤႉ
ဘၣ်ထွဲဒီးတၢ်ဂ့ၢ်၀ဲအံၤ ကညီတၢ်တိစၢၤမၤစၢၤတၢ်မုာ်တၢ်ခုၣ်ၦၤဘျးစဲ(KPSN)ၦၤကတိၤတၢ်ပၢ နီၢ်၀ါခုၣ်ရှံ စံး၀ဲလၢ“ပ၀ဲဒၣ်ၦၤကညီသ့ၣ်တဖၣ်န့ၣ်ပမ့ၢ်ဘၣ်ကွၢ်န့ၣ်တၢ်လီၤမုၢ်လီၤဖးန့ၣ်အိၣ်အါဘျီလံမီၤနီၤႉ တၢ်လၢပယီၤအတၢ်ဂိာ်စုဂိာ်ခီၣ်န့ၣ်တမ့ၢ်ခဲအံၤတဘျီဘၣ်ႉ အပူၤကွံာ်န့ၣ်အိၣ်ပာ်စၢၤအဃိ -ကၢးဟံန့ၢ် ၀ဲတၢ်မၤလိမီၤနီၤႉ ဒီးပထံၣ်ဘၣ်စ့ၢ်ကီးလၢညါအပူၤကွံာ်န့ၣ်ပၦၤကညီကဒဲကဒဲဘၣ်မၤသံမၤ၀ီလိာ်သးန့ၣ် အခီပညီလၢပမၤန့ၢ်ပယီၤအတၢ်မၤအဃိႇ အဃိန့ၣ်တၢ်သ့ၣ်တဖၣ်အံၤ တကဲ၀ဲတၢ်လၢအဂ့ၤလၢ ပၦၤကလုာ်အဂီၢ်ဘၣ်ႉ ဒီးပယီၤသ့ၣ်တဖၣ်မ့ၢ်ဟ့ၣ်ကူၣ်ၦၤဒ်လဲၣ်ဒ်လဲၣ်ဂ့ၤန့ၣ် ပၦၤကညီကဒဲကဒဲန့ၣ်-ကၢးလၢပကဘၣ်ထံၣ်လိာ်သးတဲသကိးတၢ််မဲာ်သကိးမဲာ်ဒီး ရှဲသကိးလၢပကစၢ်ဒၣ်၀ဲအကိပူၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ
ဖဲအပူၤကွံာ်လါယူၤအတီၢ်ပူၤ ဘၣ်ထွဲဒီး၀ီၤလ့ၤဟီၣ်က၀ီၤပူၤတၢ်မၤသံၦၤအဂၤ(၂၅)ဂၤတၢ်ဂ့ၢ်အံၤ ဖဲလါယူၤလံ ၅ သီအနံၤ ခ့ၣ်အဲၣ်ယူၣ်လီၢ်ခၢၣ်သးပၢဆှၢတၢ်ကမံးတံာ်ကိး၀ဲတၢ်အိၣ်ဖှိၣ်ဒီး ဒ်သိးတၢ်ကဃိထံသမံသမိး၀ဲအဂီၢ် ဖဲလါယူၤလံ ၈ သီအနံၤ KNU ဘိးဘၣ်ရၤလီၤဒုးသ့ၣ်ညါ၀ဲလၢပတုာ်ပ-တီာ်ကွံာ်(KNDO)ခိၣ်နၢ်ခံဂၤအံၤ အမူအဒါန့ၣ်လီၤႉ
ဘၣ်ထွဲဒီးလံာ်ဒုးသ့ၣ်ညါအဖီခိၣ်တူၢ်လိာ်အီၤတသ့ဘၣ်အဂ့ၢ် ဖဲလါယူၤလံ ၁၁သီအနံၤ သုးခိၣ်ကျၢၢ်ဖိ စီၤနၢၤဒါမၠး က့ၤထုးထီၣ်ပာ်ဖျါလံာ်တၢ်ပာ်သးတဘ့ၣ်န့ၣ်လီၤႉ လၢတၢ်ဂ့ၢ်အံၤအဖီခိၣ် ကီၢ်ပူၤႇကီၢ်ချၢကညီကမျၢၢ်သ့ၣ်တဖၣ် ပာ်ဖျါထီၣ်အတၢ်ထံၣ်သ့ၣ်တဖၣ်လၢ(social media)အပူၤအိၣ်၀ဲအကလုာ်ကလုာ်အသိး တကကီၢ်ဃီတၢ်ကစီၣ်ရၤလီၤသးလၢ(KNDO)ကကူၣ်အၢကူၣ်သီ(KNU)ခိၣ်နၢ်တဖၣ်ဟဲအိၣ်ဖျါထီၣ်၀ဲန့ၣ်လီၤႉ
