လါမ့ၤ ၁၁ သီႇ ၂၀၂၂ နံၣ်ႇ ခ့ၣ််အဲးစံၣ်
ဖဲမဟါလါမ့ၤ ၁၀ သီအနံၤန့ၣ် သုးခိးကီၢ်ဆၢ(BGF)သုးသိလ့ၣ်အခိၣ်(၆၀)ဘျဲၣ်ဟးထီၣ်ကွံာ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅)ဟီၣ်က၀ီၤအပူၤဒီး တၢ်ရဲၣ်တၢ်ကျဲၤအိၣ်လၢတၢ်ကမၤလၤကပီၤအ၀ဲသ့ၣ်လၢမၠၣ်၀တံၣ်ကီၢ်ရ့ၣ် စွ့ၤကိၣ်ကိၤသ၀ီပူၤအဂ့ၢ်န့ၣ် တၢ်စံး၀ဲန့ၣ်လီၤႉ
တကီၢ်ခါခဲအံၤသုးခိၣ်ဒိၣ်စိစီၤခၠ့ၣ်သူၤတီခိၣ်ရိၣ်မဲ(BGF)သုးဟီၣ်က၀ီၤ(၃)စုတီၤအဖီလာ်သုးဖိတဖၣ် ဟဲက့ၤတုၤ၀ဲလၢစွ့ၤကိၣ်ကိၤလံဒီး လၢကဟဲလါမ့ၤ ၁၅ သီအနံၤန့ၣ် နၢ်ဟူလၢတၢ်ကမၤလၤကပီၤ(BGF)သုးဖိတဖၣ်ဖဲစွ့ၤကိၣ်ကိၤအဂ့ၢ်န့ၣ် KNLA(သုးက့ ၁)သုးခိၣ်တဂၤစံး၀ဲန့ၣ်လီၤႉ
“(BGF)သုးလၢအလဲၤမၤစၢၤတၢ်လၢ(သုးက့ ၅)တဖၣ်န့ၣ်ပနၢ်ဟူလၢအက့ၤလၢာ်လံႉ ပနၢ်ဟူလၢအိၣ်တ့ၢ်က့ၤထဲပယီၤသုးလီၤႉ(BGF)သုးလၢအိၣ်(သုးက့ ၁)အပူၤတဖၣ်အိၣ်တ့ၢ်ဒံးႉ အ၀ဲသ့ၣ်ဟဲက့ၤန့ၣ်တနုာ်လီၤလၢ(သုးက့ ၁)တကပၤဘၣ်ႉက့ၤကျဲ၀ဲဒၣ်လၢခီတီၣ်–အိတီကျဲမီၤနီၤႉ ပနၢ်ဟူလၢ ၁၅ သီန့ၣ်ကဒုးဖျီၣ်၀ဲဖီကွီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ဖဲမဟါတၢ်ကစီၣ်ရၤလီၤသးလၢ(social media)အပူၤဒီးပထံၣ်ဘၣ်လၢ( BGF)သုးလၢအကယၤဟဲက့ၤဒီးသိလ့ၣ်အါအါဂီၢ်ဂီၢ်ဘၣ်ဆၣ် ခ့ၣ်အဲးစံၣ်ပာ်ဂၢၢ်ပာ်ကျၢၤအီၤလီၤလီၤဆီဆီတအိၣ်ဒံး၀ဲဘၣ်န့ၣ်လီၤႉ
(BGF)သုးလၢအလဲၤမၤစၢၤတၢ်ဖဲ(သုးက့ ၅)ဟီၣ်က၀ီၤလၢပယီၤသုးအဂီၢ်အံၤ အါဒၣ်တက့ၢ်န့ၣ်ဟးထီၣ်က့ၤလံဘၣ်ဆၣ် မ့မ့ၢ်ဟီၣ်က၀ီၤ(BGF)၁၀၁၃ သုးရ့ၣ်လၢအအိၣ်ဖဲဘီကၠိၣ်လဲၤသ၀ီပူၤအံၤအိၣ်တ့ၢ်ဒံး၀ဲအမဲာ်ညါပယီၤသုးဃုာ်ဒီး(BGF)သုးလၢအအိၣ်ဖဲတၤပီႇလ့က့ၣ်သုးကလၢၤတဖၣ်စ့ၢ်ကီးအိၣ်တ့ၢ်ဒံး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဘၣ်ဃးဒီးတၢ်ဂ့ၢ်အံၤအဖီခိၣ်(KNLA)သုးခိၣ်တဂၤလၢအသ့ၣ်ညါ(BGF)တၢ်အိၣ်သးအံၤစံး၀ဲလၢ“အ၀ဲသ့ၣ်လီၤမူဒါလၢ(သုးက့ ၅)န့ၣ်ယံၤလံအဃိကမ့ၢ်အဟဲက့ၤအိၣ်ဘှံးန့ၣ်ပတဲသ့၀ဲအသိး ပမ့ၢ်ကွၢ်လၢအ၀ဲတကပၤန့ၣ်တအဲၣ်ဒိးမၤထွဲပယီၤသုးအတၢ်နဲၣ်လီၤဘၣ်မီၤနီၤႉမ့မ့ၢ်တၢ်အိၣ်သးခီန့ၣ်ပအိၣ်ခိးကွၢ်အဖၢမုၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ဘၣ်ဃးဒီးသုးခိးကီၢ်ဆၢ(BGF)သုဟးထီၣ်ကွံာ်လၢ(သုးက့ ၅)ဟီၣ်က၀ီၤပူၤအါအါဂီၢ်ဂီၢ်တၢ်ဂ့ၢ်အံၤ ခ့ၣ်အဲးစံၣ်ဂုာ်ကျဲးစၢးဆဲးကျိး(BGF)ၦၤဘၣ်မူဘၣ်ဒါတဖၣ်ဘၣ်ဆၣ် ဆဲးကျိးတန့ၢ်၀ဲဘၣ်န့ၣ်လီၤႉ
