လါအီကူး ၉ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ်အပူၤ ခီဖျိထံဒိၣ်ဃိၣ်ယွၤဒီးတၢ်ဆူးတၢ်ဆါအဃိ ကမျၢၢ်ထံဖိကီၢ်ဖိလၢအလီၤဘၣ်တၢ်ကီတၢ်ခဲသ့ၣ်တဖၣ် ဖဲလါအီကူး ၇ သီအနံၤန့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရီကီၢ်ဆၣ် ၦၤဘၣ်မူဘၣ်ဒါတဖၣ် လဲၤဆီၣ်ထွဲမၤစၢၤ၀ဲဒၣ်ဟုသးဒီး ဂံၢ်ခီၣ်ထံးတၢ်အီၣ်တၢ်အီတဖၣ်အဂ့ၢ်န့ၣ် သ့ၣ်ညါဘၣ်လၢၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ
ခီဖျိထံဒိၣ်ဃိၣ်ယွၤႇတၢ်ဆူးတၢ်ဆါဒီးထံရူၢ်ကီၢ်သဲးတၢ်အိၣ်သးတဂၢၢ်တကျၢၤ၀ဲအဃိ တၢ်ဖံးတၢ်မၤဒီးတၢ်လုၢ်အီၣ်နီၢ်ခိသးသမူတဖၣ် ဟဲကီခဲထီၣ်၀ဲဒိၣ်မးန့ၣ်လီၤႉ ခီဖျိဟီၣ်က၀ီၤတဖၣ်အပူၤစ့ၢ်ကီးထံဒိၣ်အဃိ ၦၤသူၣ်အီၣ်ဖျးအီၣ်တၢ်တသ့ဒံးဘၣ်ဒီး ဒ်သိးၦၤလၢအလီၤဘၣ်တၢ်ကီတၢ်ခဲသ့ၣ်တဖၣ်ကဘၣ်ဂီၢ်ဘၣ်ဒွါအဂီၢ် ပပညိၣ်ဒီးမၤစၢၤ၀ဲလီၤအဂ့ၢ်န့ၣ် KNU ၀ီၢ်ရီကီၢ်ဆၣ် ၦၤဘၣ်မူဘၣ်ဒါ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ
“ဖဲကမျၢၢ်ထံဖိကီၢ်ဖိတဖၣ်လီၤဘၣ်တၢ်ကီတၢ်ခဲအဆၢကတီၢ် ပ၀ဲခ့ၣ်အဲၣ်ယူၣ်အံၤ ဒ်တၢ်သ့အိၣ်ၦၤအသိး အမၤစၢၤ၀ဲဒၣ်ဂံၢ်ခီၣ်ထံးတၢ်အီၣ်တၢ်အီတဖၣ်မီၤနီၤႉ ကယဲၢ်မ့ၢ်ကမျၢၢ်လၢအလီၤဘၣ်တၢ်ကီ တၢ်ခဲတဖၣ်အဲၣ်ဒိးမၤစၢၤခဲလၢာ်လီၤႉ ဖဲထံဒိၣ်ဃိၣ်ယွၤတၢ်ဆူးတၢ်ဆါဒီးထံရူၢ်ကီၢ်သဲးတဂၢၢ်တကျၢၤဒံးဘၣ်အကတီၢ် အ၀ဲသ့ၣ်လီၤဘၣ်တၢ်ကီတၢ်ခဲန့ၣ်ပသ့ၣ်ညါလီၤႉ ဒ်သိးဆဲးမၤစၢၤကန့ၢ်ဒီးအဂီၢ်ကဂုာ်ကျဲးစၢး၀ဲလီၤ” အဂ့ၢ်န့ၣ် KNU ၀ီၢ်ရီကီၢ်ဆၣ် ပၢပြးကရူၢ် ၦၤဘၣ်မူဘၣ်ဒါတဂၤလၢအမ့ၢ် စီၤကၠီၤဟ့ စံး၀ဲန့ၣ်လီၤႉ
၀ီၢ်ရီကီၢ်ဆၣ် မၠဲၣ်သၣ်ယၣ်သ၀ီအပူၤ တၢ်လဲၤမၤစၢၤ၀ဲဟုသးဒီးဂံၢ်ခီၣ်ထံးတၢ်အီၣ်တၢ်အီတဖၣ်လၢသိလ့ၣ် ၂ ခိၣ်ဒီး KYO ကညီသးစၢ်ကရူၢ်လၢအအိၣ်ကီၢ်ချၢအံၤစ့ၢ်ကီး မၤစၢၤ၀ဲဒၣ်တၢ်လီၢ်လၢ ၦၤဘၣ်ဃ့ၢ်မှံဟးဖျိးအိၣ်အလီၢ်ဒီးဂံၢ်ခီၣ်ထံးကမျၢၢ်ထံဖိကီၢ်ဖိတဖၣ်လၢဂံၢ်ခီၣ်ထံးတၢ်အီၣ်တၢ်အီလၢအလီၤလၢလၢစ့ပယီၤအကလီၢ်(၃၀၀)ကၠးစ့ၢ်ကီးအဂ့ၢ်န့ၣ် သ့ၣ်ညါဘၣ်လၢ KNU ၀ီၢ်ရီကီၢ်ဆၣ် ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ
မၠဲၣ်သၣ်ယၣ်သ၀ီ စီၤအဲမံၤ စံး၀ဲ“ပ၀ဲဒၣ်သ့ၣ်တဖၣ်အါဒၣ်တက့ၢ်န့ၣ်မၤတနံၤအီၣ်တနံၤလီၤႉ ဖဲတၢ်ဆါအကတီၢ်ၦၤတငါတၢ်မၤလၢၤဘၣ်အဃိ ကအီၣ်ကအီအဂီၢ်ထံၣ်ဘၣ်တၢ်ကီတၢ်ခဲလီၤႉ ကမၤအီၣ်ခုးမၤအီၣ်စံာ်စ့ၢ်ကီးထံဒိၣ်ထီၣ်အဃိ တုၤလၢခဲအံၤသူၣ်တၢ်တသ့ဒံးဘၣ်မီၤနီၤႉ KNU ဟဲဆီၣ်ထွဲမၤစၢၤဟုသးဒ်အံၤတၢ်ဘျုုးဖးဒိၣ်ညါမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ကၠၤအ့စ့ၣ်ကၠံကီၢ်ဆၣ်အပူၤခီဖျိထံဒိၣ်ထီၣ်အဃိ ဘုဟးဂီၤ၀ဲဒၣ်လၢအအ့ကၢၣ်ညါဒီး ခီဖျိတၢ်ဆူးတၢ်ဆါအဃိတၢ်ကးတံၢ်ဃာ်တၢ်ဖံးတၢ်မၤဒီးတၢ်လဲၤထီၣ်က့ၤလီၤအဃိ ဂံၢ်ခီၣ်ထံးကမျၢၢ်တဖၣ်အါဒၣ်တက့ၢ်န့ၣ်ထံၣ်ဘၣ်တၢ်လုၢ်အီၣ်နီၢ်ခိသးသမူတၢ်ကီတၢ်ခဲတဖၣ်အဂ့ၢ်န့ၣ် သ့ၣ်ညါဘၣ်လၢသ၀ီၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ
