လါအီကူး ၂၅ သီႇ ၂၀၂၂ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဖဲလါအီကူး ၂၃ သီအနံၤန့ၣ်(KNLA)သုးပာ်ဖှိၣ်ထီၣ်မၤန့ၢ်၀ဲကတၢၢ်တံာ်သုးခိးကီၢ်ဆၢ(BGF)သုးကလၢၤဖိတၢ်လီၢ်တခါဒီး မၤန့ၢ်ဃုာ်ကျိချံၦာ်သၣ်တနီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲဖဲမဟါလါအီကူး ၂၄ သီအနံၤန့ၣ်လီၤႉ
သုးခိးကီၢ်ဆၢ(BGF)သုးကလၢၤဖိတဖျၢၣ်လၢအိၣ်ကတၢၢ်တံာ်သ၀ီကရူၢ် ဘီကၠိၣ်ထၣ်သ၀ီကပၤ ကည့ၤဒိၤတိၤ ကတၢၢ်တံာ်သ၀ီပူၤအံၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ထီၣ်ခး၀ဲယံၤတနၣ်ရံၣ်ဃၣ်ဃၣ်ဒီးဖဲတၢ်နုာ်လီၤမၤရှဲလဲတၢ်လီၢ်အခါ(BGF)သုးသံ(၄)ဂၤဒီးဘၣ်ဒိ၀ဲ(၂)ဂၤအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဖဲတၢ်မၤရှဲလဲသုးကလၢၤအခါတၢ်မၤန့ၢ်၀ဲကျိ(M-16)ခံခိၣ်ႇ(AK-47)တခိၣ်ႇစဲးကတိၤတၢ်(၂)ဖျၢၣ်ႇ စုကွံာ်မ့ၣ်ပိၢ်(၆)ဖျၢၣ်ႇ(RPG-7)ချံ(၄)ဖျၢၣ်ႇ(M-16)ဆၣ်ဒၢ(၁)ဘ့ၣ်ႇ(AK-47)ဆၣ်ဒၢ(၃)ဘ့ၣ်ဒီး နးတိချံ(၉၄)ဖျၢၣ်အဂ့ၢ်န့ၣ်ခ့ၣ်အဲၣ်ယူၣ်–မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲန့ၣ်လီၤႉ
တၢ်ခးလိာ်သးကဲထီၣ်၀ံၤအလီၢ်ခံလီၢ်က၀ီၤကမျၢၢ်လၢအိၣ်ဘူးဖဲကတၢၢ်တံာ်သ၀ီခိၣ်ဃၢၤတဖၣ်ဘၣ်ယိၣ်လၢတၢ်ကလူၤဖီၣ်ပီၣ်တၣ်ႇတၢ်ကကိးသူအ၀ဲသ့ၣ်ဒ်တၢ်ဒီသဒၢစုက၀ဲၤတခါအသိးအဂ့ၢ်န့ၣ် ကတၢၢ်တံာ်သ၀ီဖိတဂၤစံး၀ဲန့ၣ်လီၤႉ
“ဖဲတၢ်ကဲထီၣ်သးတဂီၤန့ၣ်ၦၤခးလီၤကျိဖးဒိၣ်ဒီတနံၤလီၤႉခဲအံၤတနၢ်ဟူတၢ်နီတမံၤလၢၤဘၣ်ႉဘၣ်ဆၣ်လၢညါခါန့ၣ်ၦၤလူၤဖီၣ်ပီၣ်တၣ်လၢ၀ဲပၠၣ်သ၀ီတကပၤန့ၣ်အိၣ်မီၤနီၤႉဖဲအံၤနါက့တၢ်ဒုးကဲထီၣ်အဃိဘၣ်ယိၣ်လၢၦၤကလူၤဖီၣ်တၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါအီကူး ၂၄ သီအနံၤန့ၣ်လီၤႉ
(KNLA)သုးပာ်ဖှိၣ်ထီၣ်ခးသုးကလၢၤဖိဒီးမၤန့ၢ်ကျိချံၦာ်သၣ်၀ံၤဟးထီၣ်က့ၤလၢသုးကလၢၤဖဲန့ၣ်အပူၤ၀ံၤအလီၢ်ခံ ဖဲမဟါလါအီကူး ၂၄ သီ ဂီၤခီအဆၢကတီၢ်န့ၣ် သုးခိးကီၢ်ဆၢ(BGF)မၤအါထီၣ်အသုးဂံၢ်ဘါလၢ သုးကလၢၤ၀ဲန့ၣ်အပူၤအဂ့ၢ်န့ၣ် ကတၢၢ်တံာ်သ၀ီဖိတဂၤစံး၀ဲဒ်အံၤန့ၣ်လီၤႉ
“(BGF)သုးကလၢၤအံၤအိၣ်ဒီးၦၤဘူးဘူးလီၤအဃိပထံၣ်လၢအဟဲမၤအါထီၣ်သုးဂံၢ်ဘါမီၤနီၤႉမ့မ့ၢ်(ခ့ၣ်အဲၣ်ယူၣ်)ခီဖဲတၢ်တနံၤန့ၣ်နုာ်လီၤလၢသုးကလၢၤပူၤဒီးမၤန့ၢ်၀ဲကျိတဖၣ်၀ံၤဟးထီၣ်ကဒါလီၤအဃိဖဲတဂီၤညါအံၤဂီၤခီန့ၣ်အ၀ဲသ့ၣ်မၤအါထီၣ်အသုးဂံၢ်ဘါႉ(BGF)ဟဲက့ၤအိၣ်လၢသုးကလၢၤပူၤလံ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ
လၢန့ၣ်အမဲာ်ညါဖဲအပူၤကွံာ်လါအီကူး ၂၀ သီအနံၤစ့ၢ်ကီး သုးခိးကီၢ်ဆၢ(BGF–၁၀၁၃) သုးခိၣ်လၣ်ကၠဲၤအံၤမၢ၀ဲဒွဲၣ်လိကီၢ်ဆၣ် ကတၢၢ်တံာ်သ၀ီဒီးလ့ဖိထၣ်သ၀ီကရူၢ်ပူၤ ကတၢၢ်တံာ်ႇကဲတီႇဘီကၠိၣ်ထၣ်ႇတီၤသူၤကလ့ဒီးဘီကၠိၣ်လဲၤသ၀ီဖိအဂၤ(၅၀၀)ဃၣ်ဃၣ်လၢကလဲၤဒိထံကီၢ်ခိၣ်ဂီၤ(မၣ်ပိၤတ့ၤ)လၢကမးမိၢ်၀့ၢ်ပူၤဒီးဃ့၀ဲစ့တဂၤန့ၣ်(၃၀၀ႇ၀၀၀)ကလီၢ်ကၠးအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
