လါအီကူး ၂၅ သီႇ ၂၀၂၁ နံၣ်ႇ ခ့ၣ်အဲးစံၣ်
သုးမီၤစိရိၤအသုးကလၢၤ(၅)ဖျၢၣ်လၢအအိၣ်ဆီလီၤသး ဖဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ (KNU)ဒူပျာ်ယာ်ကီၢ်ရ့ၣ် ကီၢ်ဆၣ်တၢ်ပၢဟီၣ်က၀ီၤတဘ့ၣ်စုာ်စုာ်အပူၤအံၤ စးထီၣ်ဖဲလါယူၤန့ၣ် အ၀ဲသ့ၣ်ပာ်တ့ၢ်ကွံာ်အသုးကလၢၤ၀ံၤအလီၢ်ခံ စးထီၣ်မၤ၀ဲဒုးယၤတၢ်ဟူးတၢ်ဂဲၤတဖၣ်အဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ် ၦၤဘၣ်မူဘၣ်ဒါအအိၣ်န့ၣ်လီၤႉ
လၢ(KNU)သုးက့(၆) သုးရ့ၣ် ၁၆ႇ၁၇ တၢ်ပၢဟီၣ်က၀ီၤတဖၣ်အပူၤ စးထီၣ်လၢအ၀ဲသ့ၣ်ပာ်တ့ၢ်ကွံာ်သုးကလၢၤတဖၣ်လၢအမ့ၢ် စံနၤပ့ၤႇအၣ်ပလိၤႇဘူၣ်ယါတီၤႇကျ့းသုးကလၢၤဒီးကၠီၣ်ထၣ်သုးကလၢၤတဖၣ်၀ံၤအလီၢ်ခံ စးထီၣ်ဖဲလါအီကူး(၂၀)သီအလီၢ်ခံန့ၣ် စးထီၣ်မၤ၀ဲဒုးယၤတၢ်ဟူးတၢ်ဂဲၤဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢ KNU လီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ
KNU သုးက့ ၆ ကီၢ်ရ့ၣ်နဲၣ်ရွဲၣ် ပဒိၣ်စီၤလ့ၣ်စတၣ် စံး၀ဲ“အ၀ဲသ့ၣ်ဟဲထီၣ်ဒုတၢ်ခးလိာ်သးဟဲကဲထီၣ်လီၤႉ မ့သ့မ့ဘၣ်န့ၣ်အ၀ဲသ့ၣ်မ့ၢ်က့ၤကဒါလီၢ်ခံဒုကဂ့ၤဒိၣ်လီၤႉ သုးလၢအလီၤဆီလိာ်သး(၂)ဒူၣ် မ့အိၣ်လၢဟီၣ်က၀ီၤတဘ့ၣ်ဃီအပူၤန့ၣ် မ့တကဲထီၣ်တဘျီန့ၣ်ကဲထီၣ်တဘျီလီၤမီၤနီၤႉ ခဲအံၤခီဖျိအ၀ဲသ့ၣ်ဟူးဂဲၤအဃိကဲထီၣ်လီၤမီၤနီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
လၢ(KNU)ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်ဒီးကၠဲးဒိကီၢ်ဆၣ်အပူၤ စးထီၣ်ဖဲလါအီကူး(၂၃)သီအလီၢ်ခံန့ၣ် သုးမီၤစိရိၤအသုးဒီးကညီကီၢ်စဲၣ်သုးခိးကီၢ်ဆၢ(BGF)သုးတဖၣ်ပာ်ဖှိၣ်ထီၣ်အသးဒီး မၤ၀ဲသုးတၢ်ဟူးတၢ်ဂဲၤလၢကွ့ကလ့ႇအီးဖးဖိႇထံဂုၢ်သီႇကမဲၤကိသ၀ီပူၤတဖၣ််အဃိ တၢ်ခးလိာ်သးဘၣ်ဟဲကဲထီၣ်ဒီးလီၢ်က၀ီၤ(KNLA)သုးမုၢ်ဒိၣ်တလီၢ်လီၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
လီၢ်က၀ီၤဖိ နီၢ်စ့စ့ စံး၀ဲ“ပၢၤကီၢ်သုးဒီးသုးကလၢၤလၢအအိၣ်ဆီလီၤသးလၢကလုာ်ဒူၣ်ဟီၣ်က၀ီၤအပူၤတဖၣ် တနီၤန့ၣ်ပာ်တ့ၢ်ကွံာ်အသုးကလၢၤဒီးဂုၤကဒါလီၢ်ခံအိၣ်ဘၣ်ဆၣ် ခဲအံၤလၢကမၤ၀ဲသုးတၢ်ဟူးတၢ်ဂဲၤအဂီၢ် ဟဲဃုကဒီးတၢ်ဂ့ၢ်လီၤႉ ခီဖျိခိ၀ံၣ်အဃိတၢ်ကီတၢ်ခဲအိၣ်ဒီး ခဲအံၤပယီၤသုးတဖၣ်စ့ၢ်ကီးဟဲထီၣ်အဃိ ဘၣ်စံၣ်ဘၣ်ဃ့ၢ်ၦၤခဲလၢာ်လီၤဘၣ်တၢ်ကီတၢ်ခဲလီၤႉ မၤ၀ဲတၢ်မုာ်တၢ်ခုၣ်ဒီးဟဲဟူးဂဲၤ၀ဲလၢပဟီၣ်က၀ီၤအပူၤဒ်အံၤ လ့ၤတက့ၤနာ်အီၣ်တသ့လၢၤဘၣ်”အဂ့ၢ်န့ၣ်် စံးဘၣ်ခ့ၣ်အဲးစံၣ်ဖဲလါအီကူး ၂၄ သီအနံၤန့ၣ်လီၤႉ
တကီၢ်ခါခဲအံၤဟီၣ်က၀ီၤဖဲန့ၣ်အပူၤတဖၣ် ခီဖျိသုးမီၤစိရိၤအသုးဟူးဂဲၤအါထီၣ်အဃိ တၢ်ခးလိာ်သးကဲထီၣ်ကိးမုၢ်နံၤဒဲးဃၣ်ဃၣ်ဒီး လီၢ်က၀ီၤဖိတနီၤဘၣ်ဟးဃ့ၢ်အိၣ်ခူသူၣ်၀ဲဒၣ်အဂ့ၢ်န့ၣ် သ့ၣ်ညါဘၣ်လၢသ၀ီၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ
