လါဒံၣ်စ့ဘၢၣ် ၂၇ သီႇ ၂၀၂၁ နံၣ်ႇ ခ့ၣ်အဲးစံၣ်
ပယီၤသုးမီၤစိရိၤအသုးလၢအအိၣ်ဆီလီၤသးဟူးဂဲၤဖဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် သုးက့(၅)ဒွဲၣ်လိကီၢ်ဆၣ်ပူၤအံၤ အသုးစကီၤပြံတဂၤဟဲဃ့ၢ်ထီၣ်ဆူကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့(၅)အအိၣ်ဃုာ်ဒီးတၢ်စုက၀ဲၤတဖၣ်အဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ်ထုး ထီၣ်ပာ်ဖျါ၀ဲဖဲမဟါလါဒံၣ်စ့ဘၢၣ် ၂၆ သီအနံၤန့ၣ်လီၤႉ
ဖဲအပူၤကွံာ်လါဒံၣ်စ့ဘၢၣ် ၂၄ သီအနံၤ ပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်အစုဒုၣ်တီၤအဖီလာ်ခီၣ်သချ့သုးရ့ၣ်(ခမရ-၄၀၇)လၢအအိၣ်ဖဲဖၣ်ပူၣ်၀့ၢ် နါကူနါသုးကလၢၤ သုးစကီၤပြံမီၤညိၣ်(၃၀)နံၣ် ကစၢ်နီၣ်ဂံၢ်(တ/၃၉၂၉၇၈)အံၤ ဟဲဃ့ၢ်ထီၣ်၀ဲလၢ KNLA သုးရ့ၣ်(၁၀၂)ႇ သုးဒ့(၁)အအိၣ်အဂ့ၢ်န့ၣ် မုၢ်တြီၢ်တၢ်ကစီၣ်ပာ်ဖျါ၀ဲန့ၣ်လီၤႉ
“အတဲ၀ဲဒၣ်န့ၣ်ဖဲအ၀ဲထီၣ်သုးတၢ်သိၣ်လိအခါတၢ်သိၣ်လိ၀ဲလၢကဘၣ်တြီဆၢဒီသဒၢကမျၢၢ်ထံဖိကီၢ်ဖိမီၤနီၤႉ အနီၢ်ကီၢ်ကီၢ်ဖဲအတုၤလၢတၢ်ဒုးအမဲာ်ဖံးခိၣ်န့ၣ်ခိၣ်နၢ်သ့ၣ်တဖၣ်တမ့ၢ်လၢအတြီဆၢဒီသဒၢကမျၢၢ်ထံဖိကီၢ်ဖိသ့ၣ်တဖၣ်လၢၤဘၣ်ႉဟံးဆူူၣ်၀ဲထံကီၢ်တၢ်စိတၢ်ကမီၤဒီးဖီၣ်ထၢနုာ်၀ဲဒၣ်ထံကီၢ်ခိၣ်နၢ်လၢဃိာ်ပူၤလၢကမျၢၢ်ဃုထၢထီၣ်၀ဲတဖၣ်မီၤနီၤႉ လၢန့ၣ်အမဲာ်ညါ ကမျၢၢ်ထံဖိကီၢ်ဖိဃ့ထီၣ်က့ၤတၢ်ခွဲးတၢ်ယၤဒီး အခိၣ်အနၢ်တဖၣ်ဟ့ၣ်လီၤတၢ်ကလုၢ်လၢဘၣ်ခးသံ၀ဲအဃိ ထံဖိကီၢ်ဖိတဖၣ်ဘၣ်သံႇဘၣ်ဃ့ၢ်မှံဟးဖျိးတူၢ်ဘၣ်၀ဲတၢ်ကီကီခဲခဲဒ်န့ၣ်မီၤနီၤႉ ထံၣ်၀ဲဒီးအသးတမုာ်ဘၣ်ႇ လၢခံန့ၣ်တဲ၀ဲလၢအမိအပါနါက့န့ၣ်သုးကီၣ်ကးအၦၤခးသံ၀ဲအဃိတူၢ်၀ဲတန့ၢ်လၢၤဘၣ်ဒီး ဃ့ၢ်ထီၣ်ကွံာ်၀ဲလၢသုးကီၣ်ကးအတၢ်တီခိၣ်ရိၣ်မဲဖီလာ်ဒီးဟဲဃ့ၢ်ထီၣ်၀ဲလီၤ”အဂ့ၢ်န့ၣ် သုးက့(၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံး၀ဲန့ၣ်လီၤႉ
လၢန့ၣ်အမဲာ်ညါသုးစကီၤပြံမီၤညိၣ်အံၤဟဲက့ၤစိာ်ဃုာ်၀ဲဒီး(MA 1)တခိၣ်ႇ ကျိချံဒၢ(၅)ခါႇအချံ(၂၅၀)ဖျၢၣ်ႇမ့ၣ်ပိၢ်(၁)ဖျၢၣ်ႇမ့ၣ်ပိၢ်(M 14)တဖျၢၣ်ဒီး တကီၢ်ခါခဲအံၤ KNLA သုးက့(၅)ပာ်အီၤလၢတၢ်ပူၤဖျဲးအလီၢ်ဂ့ၤဂ့ၤလီၤအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်၀ဲန့ၣ်လီၤႉ
လါဖ့ၤဘြူၤအါရံၤထီၣ် ၁ သီ သုးဟံးန့ၢ်တၢ်စိိတၢ်ကမီၤ၀ံၤအလီၢ်ခံ ပယီၤသုးမီၤစိရိၤအၦၤဟဲဃ့ၢ်ထီၣ်လၢ(KNU)သုးက့ ၅ ဟီၣ်က၀ီၤပူၤအိၣ်ခဲလၢာ်(၁၄)ဂၤလံအဂ့ၢ်န့ၣ် ခ့ၣ်အဲၣ်ယူၣ် သုးက့(၅)တၢ်မၤနီၣ်မၤဃါပူၤအသိးသ့ၣ်ညါဘၣ်န့ၣ်လီၤႉ
