လါအီကူး ၂၄ သီႇ ၂၀၂၁ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဖဲလါအီကူး ၂၁ သီဒီး ၂၂ သီအနံၤ လီၢ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးမီၤစိရိၤအသုးတဖၣ်အဘၢၣ်စၢၤ တၢ်ဒုးကဲထီၣ်ပာ်ဖှိၣ်အိၣ်၀ဲ(၉)ဘျီဒီး ဖဲန့ၣ်သုးမီၤစိရိၤအၦၤသံ၀ဲ(၁၂)ဂၤအဂ့ၢ်န့ၣ် KNU မုၢ်တြီၢ်ကီၢ်ရ့ၣ် ထုးထီၣ်ပာ်ဖျါ၀ဲဖဲမဟါ(လါအီကူး ၂၃)သီအနံၤန့ၣ်လီၤႉ
တၢ်ဒုးကဲထီၣ်လၢခံသီအတီၢ်ပူၤအံၤ သုးမီၤစိရိၤအၦၤသံ ၁၂ ဂၤႇ ဘၣ်ဒိ ၁၉ ဂၤ ဘၣ်ဆၣ် မ့မ့ၢ်လီၢ်က၀ီၤ(KNLA)တကပၤတၢ်ဘၣ်ဒိဘၣ်ထံးသံတအိၣ်၀ဲဘၣ်အဂ့ၢ်န့ၣ် မုၢ်တြီၢ်ကီၢ်ရ့ၣ်တကပၤစံး၀ဲန့ၣ်လီၤႉ
ဖဲအပူၤကွံာ်(လါအီကူး ၂၀)သီအနံၤစ့ၢ်ကီး သုးမီၤစိရိၤအသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ–၈)အဖီလာ် ခီၣ်ချ့သုးရ့ၣ်(ခမရ-၄၀၇)ဒီးသုးခိးကီၢ်ဆၢ(BGF) သုးတဖၣ်အိၣ်ခိးကျဲတၢ်ဘံၣ်တၢ် ဘၢလၢဖၣ်ပူၣ်– ကမၤမိၢ်ကျဲဖးဒိၣ်တဖၣ်အံၤ ခးလီၤ၀ဲကျိဖးဒိၣ်(၃၀)ဖျၢၣ်ဒီးကျိဖိဆံးအထံၣ် (၁ႇ၀၀၀)ဘျဲၣ်လၢ ခ့ၣ်အဲၣ်ယူၣ် ဒွဲၣ်လိကီၢ်ဆၣ် မးထီႇသွၣ်ခိၣ်လီၢ်ႇထွံၣ်သံအုၣ်ႇပူၤဘီခိၣ်သ၀ီပူၤတဖၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ခီဖျိတၢ်ဒုးကဲထီၣ်တပယူာ်ဃီအဃိ တကီၢ်ခါခဲအံၤလီၢ်က၀ီၤဖိလၢအအိၣ်ဖဲဖၣ်ပူၣ်–ကမၤမိၢ်ကျဲကပၤတဖၣ် အိၣ်လၢသ၀ီပူၤတဘူၣ်လၢၤဘၣ်ဒီးလဲၤစံၣ်အိၣ်ခူသူၣ်၀ဲလၢသ၀ီအဂၤလံအဂ့ၢ်န့ၣ် လီၢ်က၀ီၤဖိလၢ အအိၣ်ဘူးဖဲန့ၣ်တဂၤ စံးဘၣ်ခ့ၣ်အဲးစံၣ်ဖဲ(လါအီကူး ၂၃)သီအနံၤန့ၣ်လီၤႉ
“ခဲအံၤလၢဖၣ်ပူၣ်–ကမၤမိၣ်ကျဲန့ၣ်ခးကိးမုၢ်နံၤဒဲးလီၤႉ ပယီၤသုးတကပၤမ့ဟဲထီၣ်ဒု(KNLA)ကခး၀ဲလီၤႉ ပယီၤသုးတကပၤနါက့ခးတၢ်တပယူာ်ဃီလီၤႉ ဂီၤခီမ့တမ့ၢ်မုၢ်ထူၣ်န့ၣ်နၢ်ဟူကျိသီၣ်ထီၣ်လံလီၤႉ လီၢ်က၀ီၤဖိလၢ အအိၣ်ဘူးဖဲန့ၣ်တဖၣ်သုးလီၢ်သုးကျဲလံမီၤနီၤႉ ဟဲအိၣ်ကဒုသးလၢပသ၀ီစ့ၢ်ကီးအိၣ်လီၤ” အဂ့ၢ်န့ၣ် လီၢ်က၀ီၤဖိတဂၤစံး၀ဲန့ၣ်လီၤႉ
လၢန့ၣ်အမဲာ်ညါ ဖဲအပူၤကွံာ်(လါအီကူး ၁၉)သီအနံၤစ့ၢ်ကီး သုးမီၤစိရိၤအသုး(စကခ–၈) စုဒုၣ်တီၤအဖီလာ်(ခမရ–၄၁၀)ဒီး(ခမရ–၃၄၁)အသုးတဖၣ် တီၢ်မၤဒၢၣ်မၤပျံၤမၤဖုး၀ဲဒၣ်ဘုသိၣ်ကီၢ်ဆၣ် ထိၣ်ဖိပါဒၢသ၀ီပူၤ ပိာ်မုၣ်(၃)ဂၤစ့ၢ်ကီးအိၣ်၀ဲအဂ့ၢ်န့ၣ် KNU မုၢ်တြီၢ်ကီၢ်ရ့ၣ် ထုးထီၣ်ပာ်ဖျါ၀ဲန့ၣ်လီၤႉ
KNU သုးက့ ၅ ဟီၣ်က၀ီၤအပူၤ ဖဲစှၤသီအတီၢ်ပူၤအံၤသုးမီၤစိရိၤအသုးဟူးဂဲၤအါထီၣ်တကးဘၣ် လၢန့ၣ်အမဲာ်ညါဟဲဃုသ့ၣ်ညါတၢ်ဒီးကဘီယူၤအိၣ်၀ဲကိးမုၢ်နံၤဒဲးဃၣ်ဃၣ်ညါအဂ့ၢ်န့ၣ် KNU မုၢ်တြီၢ်ကီၢ်ရ့ၣ် ထုးထီၣ်ပာ်ဖျါ၀ဲန့ၣ်လီၤႉ
