မၠၣ်၀တံၣ်၀့ၢ် တလါအတီၢ်ပူၤ ၦၤသံလၢခိ၀ံၣ်တၢ်ဆါအဃိ အိၣ်တုၤလၢအဂၤ ၁၀၀

လါယူၤလံ ၂၆ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ် မၠၣ်၀တံၣ်၀့ၢ်ပူၤ ဖဲမဟါ လါယူၤလံ ၂၅ သီအနံၤ ၦၤသံလၢခိ၀ံၣ်တၢ်ဆါအဃိအိၣ်၀ဲ ၆ ဂၤဒီး လၢတလါညါအအံၤအတီၢ်ပူၤၦၤသံလၢခိ၀ံၣ်တၢ်ဆါအဃိအိၣ်၀ဲ(၁၀၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

မၠၣ်၀တံၣ်၀့ၢ်ပူၤ ခီဖျိခိ၀ံၣ်တၢ်ဆါဘၣ်ကူဘၣ်ဂာ်ရၤလီၤသးဟဲအါထီၣ်အဃိ စးထီၣ်ဖဲလါယူၤလံ ၁၃ သီအနံၤန့ၣ် တၢ်ဘိးဘၣ်ရၤလီၤ၀ဲလၢကဘၣ်အိၣ်လၢဟံၣ်(stay at home)အသိး စးထီၣ်ဖဲဂီၤခီ(၉) နၣ်ရံၣ်အလီၢ်ခံတဘၣ်ဟးထီၣ်တၢ်ချၢလၢာ်ဘၣ်န့ၣ်လီၤႉ

ဖဲခိ၀ံၣ်တၢ်ဆါရၤလီၤသးအါထီၣ်အကတီၢ် ဂံၢ်ခီၣ်ထံးၦၤမုၢ်ဆ့ၣ်မုၢ်ဂီၤဖိတဖၣ်အါဒၣ်တက့ၢ်န့ၣ် တဖံးတမၤဘၣ်တၢ် လၢၤဘၣ်ဒီး လၢတၢ်လုၢ်အီၣ်နီၢ်ခိသးသမူအဂီၢ်ထံၣ်ဘၣ်၀ဲတၢ်ကီတၢ်ခဲအါမးန့ၣ်လီၤႉ လၢန့ၣ်အမဲာ်ညါ လီၢ်က၀ီၤၦၤဘၣ်မူဘၣ်ဒါတဖၣ်တုၤလၢခဲအံၤတစု ကဟ့ၣ်တၢ်ဆီၣ်ထွဲမၤစၢၤလၢဂံၢ်ခီၣ်ထံး ၦၤမုၢ်ဆ့ၣ်မုၢ်ဂီၤဖိ တဖၣ်အဂီၢ်တအိၣ်နီတမံၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢတၢ်န့ၣ်အဃိ လီၢ်က၀ီၤၦၤမၤဘူၣ်လီၤတၢ်ဖိတဖၣ် ဟ့ၣ်လီၤမၤဘူၣ်ဆီၣ်ထွဲမၤစၢၤ၀ဲကမျၢၢ်တဖၣ်လၢဟုသးႇ တၢ်အီၣ်တၢ်အီအဂၤတဖၣ်အိၣ်၀ဲဒီး တၢ်အိၣ်သး(stay at home)မ့ၢ်ဆဲးလဲၤသးဒ်အံၤဒု ကတူၢ်ဘၣ်တၢ်ဆါသံ သ-တိာ်တကးဒံးဘၣ် ကသဂၢၢ်ဘၣ်ဒီးတၢ်သၣ်၀ံၤလီၤဒိတဖၣ်သ့၀ဲအဂ့ၢ်န့ၣ် ဂံၢ်ခီၣ်ထံးၦၤပတီၢ်မုၢ်ဖိတဂၤ စံး၀ဲန့ၣ်လီၤႉ

မၠၣ်၀တံၣ်၀့ၢ်ပူၤ ဒ်တၢ်ထုးထီၣ်ပာ်ဖျါ၀ဲတုၤလၢလါယူၤလံ ၂၅ သီအနံၤစရီအသိး ၦၤဘၣ်ကူဘၣ်ဂာ်လၢ ခိ၀ံၣ်တၢ်ဆါအိၣ်၀ဲ(၁ႇ၃၀၀)ဘျဲၣ်ဒီး ၦၤသံလၢခိ၀ံၣ်တၢ်ဆါအိၣ်၀ဲ(၁၀၀)ဃၣ်ဃၣ်လံဘၣ်ဆၣ် ၦၤသံဒီးၦၤဘၣ်ကူဘၣ်ဂာ်လၢခိ၀ံၣ်တၢ်ဆါလၢဟီၣ်က၀ီၤအပူၤတဖၣ် ကအါန့ၢ်ဒံးအ၀ဲအံၤသ့၀ဲအဂ့ၢ်န့ၣ် ၀့ၢ်ပူၤကမျၢၢ်တဖၣ်ပဲာ်ထံနီၤဖးစံး၀ဲန့ၣ်လီၤႉ