လါအီကူး ၁၉ သီႇ ၂၀၂၁ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ သုးက့(၅)ဟီၣ်က၀ီၤ မုၢ်တြီၢ်ကီၢ်ရ့ၣ်အပူၤ စးထီၣ်ဖဲလါအီကူး ၁ သီတုၤလၢ ၁၅ သီအနံၤ သုးမီၤစိရိၤအသုးဒီး ကညီတၢ်ထူၣ်ဖျဲးသုးမုၢ်ဒိၣ် -KNLA အဘၢၣ်စၢၤ တၢ်ခးလိာ်သးကဲထီၣ်ပာ်ဖှိၣ်ခဲလၢာ်(၅၆)ဘျီဒီး ဖဲန့ၣ်သုးမီၤစိရိၤအၦၤသံ ၃၄ ဂၤအကျါပၣ်ဃုာ်ဒီးသုးရ့ၣ်ခိၣ်တဂၤအဂ့ၢ်န့ၣ် KNU သုးက့(၅)ထုးထီၣ်ပာ်ဖျါ၀ဲဖဲလါအီကူး ၁၇ သီအနံၤန့ၣ်လီၤႉ
လၢန့ၣ်အမဲာ်ညါသုးမီၤစိရိၤအၦၤဘၣ်ဒိ ၁၅ ဂၤဒီး မ့မ့ၢ် သုးက့ ၅ တကပၤန့ၣ်အၦၤဘၣ်ဒိ ၃ ဂၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢတၢ်ခးလိာ်သးကဲထီၣ်အပူၤ သုးမီၤစိရိၤအသုးခး၀ဲကျိဖးဒိၣ်(၈၈)ဖျၢၣ်ဒီး ကျိဖိဆံး(၁ႇ၅၀၀)ဖျၢၣ်ဒီး လၢန့ၣ်အမဲာ်ညါခီဖျိခးလီၤကျိဖးဒိၣ်တဖၣ်ဆူလီၢ်က၀ီၤဒူဖိသ၀ီဖိတၢ်ဖံးအီၣ်မၤအီၣ်လီၢ်ကျဲအဃိ လီၢ်က၀ီၤဖိသံ၀ဲ ၁ ဂၤဒီးဘၣ်ဒိ ၁ ဂၤအဂ့ၢ်န့ၣ် ခ့ၣ်အဲၣ်ယူၣ် သုးက့(၅)ထုးထီၣ်ပာ်ဖျါ၀ဲန့ၣ်လီၤႉ
တကီၢ်ခါခဲအံၤ လၢသုးက့(၅)ဟီၣ်က၀ီၤအပူၤ သုးမီၤစိရိၤအသုးဒီး(BGF)သုးပာ်ဖှိၣ်တဖၣ် ဟူးဂဲၤဟဲအါထီၣ်တကးဘၣ်လၢန့ၣ်အမဲာ်ညါ ခီဖျိမၤအါထီၣ်သုးဂံၢ်ဘါႇကျိဂံၢ်ဘါဒီးတၢ်အီၣ်တၢ်အီတဖၣ်အဃိ တၢ်ခးလိာ်သးဘၣ်ဟဲကဲထီၣ်ဒီးလီၢ်က၀ီၤ(KNLA)အသုးတဖၣ် ကိးမုၢ်နံၤဒဲးဃၣ်ဃၣ်ညါအဂ့ၢ်န့ၣ် KNU သုးက့ ၅ ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်န့ၣ်လီၤႉ
ဖဲလါအီကူး ၁၇ သီအနံၤစ့ၢ်ကီး သုးမီၤစိရိၤအသုးကဘီယူၤတဘ့ၣ်ဟဲဆှၣ်တၢ်လၢ KNU သုးက့(၅)အသုး၀ဲၤလီၢ်ခိၣ်သ့ၣ်တကပိၤကပၤဒံးအဂ့ၢ်န့ၣ် KNU တကပၤ စံး၀ဲန့ၣ်လီၤႉ
ဒ် KNU သုးက့(၅)ထုးထီၣ်ပာ်ဖျါ၀ဲကိးလါဒဲးတၢ်မၤနီၣ်ပူၤအသိးန့ၣ် အပူၤကွံာ်လါယူၤလံအတီၢ်ပူၤ လၢအ၀ဲသ့ၣ်ဟီၣ်က၀ီၤအပူၤန့ၣ်တၢ်ဒုးကဲထီၣ်ပာ်ဖှိၣ်ခဲလၢာ်အိၣ်၀ဲ(၁၃၃)ဘျီဒီး ဖဲန့ၣ်သုးမီၤစိရိၤအၦၤသံ၀ဲ(၆၅)ဂၤအကျါပၣ်ဃုာ်၀ဲဒီးသုးရ့ၣ်ခိၣ်တဂၤႇဘၣ်ဒိ၀ဲ(၁၀၁)ဂၤဒီး မ့မ့ၢ်(KNLA)တကပၤ အၦၤဘၣ်ဒိ(၃)ဂၤန့ၣ်လီၤႉ
တကီၢ်ခါဆၢကတီၢ်ခဲအံၤ လၢခ့ၣ်အဲၣ်ယူၣ် သုးက့(၅)ဟီၣ်က၀ီၤအပူၤ သုးမီၤစိရိၤအသုးမၤအါထီၣ်သုး ဂံၢ်ဘါဒီးဟူးဂဲၤဟဲအါထီၣ်အသိး လၢသုးက့(၁)ဒီးသုးက့(၂)တကပၤစ့ၢ်ကီး ခီဖျိမၤအါထီၣ်အသုးဂံၢ်ဘါဒီး မၤ၀ဲသုးတၢ်ဟူးတၢ်ဂဲၤအဃိ တၢ်ခးလိာ်သးဘၣ်ကဲထီၣ်၀ဲတလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
