ပိာ်မုၣ်ၦၤဃ့ၢ်မှံဟးဖျိးဖိလၢအက့ၤကဒါဆူအဟံၣ်တဂၤသံခီဖျိဘၣ်ဒီးပယီၤသုးကျိဖးဒိၣ်

လါယနူၤအါရံၤ ၄ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲမဟါလါယနူၤအါရံၤ ၃ သီ ဟါခီအဆၢကတီၢ် ခီဖျိပယီၤသုးမီၤစိရိၤအသုးခးလီၤကျိဖးဒိၣ်လၢမၠၣ်၀တံၣ်ကလံၤထံးလ့က့ၣ်ကိာ်ဟီၣ်က၀ီၤပူၤအဃိ ဖလူလီၢ်က၀ီၤဖိပိာ်မုၣ်လၢအသးနံၣ်အိၣ်(၄၀)နံၣ်တဂၤဘၣ်၀ဲဒီးကျိဖးဒိၣ်သံကွံာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ၦၤမၤစၢၤၦၤဃ့ၢ်မှံဟးဖျိးဖိလၢတအဲၣ်ဒိးပာ်ဖျါအမံၤတဂၤစံး၀ဲ“ဖဲမဟါမုၢ်ဟါလီၤ ၃ နၣ်ရံၣ်တခီအဆၢကတီၢ်န့ၣ် တၢ်ဒုးကဲထီၣ်ႇပယီၤသုးခးလီၤကျိဖးဒိၣ်အဃိဘၣ်၀ဲဒၣ်လီၤႉ ခဲအံၤၦၤပိာ်မုၣ်လၢအသံတဂၤန့ၣ် ခီဖျိ(BGF)သုးခိၣ်မိၣ်သိၤတဲလၢက့ၤအိၣ်လၢဟံၣ်န့ၢ်လံအဃိ က့ၤ၀ဲဒၣ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဖဲတၢ်ဒုးကဲထီၣ်လၢလ့က့ၣ်ကိာ်ဟီၣ်က၀ီၤအဆၢကတီၢ် သုးခိးကီၢ်ဆၢ(BGF)သုးဟီၣ်က၀ီၤ(၄)ခိၣ် သုးခိၣ်ဒိၣ်ဖိစီၤမိၣ်သိၤတီခိၣ်ရိၣ်မဲအၦၤ ဟဲတုၤ၀ဲဒၣ်ဖဲၦၤလီၢ်အိၣ်ကမှံဖိအိၣ်တၢ်လီၢ်တစိၢ်တလီၢ်အံၤဒီး ခီဖျိလၢဆီၣ်တခူထီၣ်၀ဲၦၤဃ့ၢ်မှံဟးဖျိးဖိတဖၣ်လၢက့ၤအိၣ်လၢဟံၣ်သ့လံအဃိ ၦၤဃ့ၢ်မှံဟးဖျိဖိတနီၤက့ၤအိၣ်လၢအဟံၣ်အဃီအဒူသ၀ီပူၤန့ၣ်လီၤႉ

“အနီၢ်နီၢ်ခီန့ၣ်ကမျၢၢ်တဖၣ်အိၣ်၀ဲဒၣ်လၢတၢ်ပူၤဖျဲးအလီၢ်လံႇတဲ၀ဲဒၣ်လၢတဘၣ်တၢ်နီတမံၤဘၣ်ႉ သုးခိၣ်မိၣ်သိၤမၢဟဲက့ၤဘျီ လၢကမျၢၢ်ထံဖိကီၢ်ဖိတၢ်ဘံၣ်တၢ်ဘၢအဂီၢ် ဟံ၀ဲမူဒါတအိၣ်နီတမံၤဘၣ်အဃိ ဘၣ်ဟဲကဲထီၣ်သးဒ်အံၤလီၤမီၤနီၤ”အဂ့ၢ်န့ၣ် ကမျၢၢ်ၦၤဃ့ၢ်မှံဟးဖျိးတဂၤစံး၀ဲန့ၣ်လီၤႉ

ဖဲအပူၤကွံာ်လါဒံၣ်စ့ဘၢၣ် ၁၅ သီအနံၤ တၢ်ဒုးစးထီၣ်ကဲထီၣ်၀ဲဒၣ်လၢ KNU(သုးက့ ၆)ဟီၣ်က၀ီၤ လ့က့ၣ်ကိာ်ဟီၣ်က၀ီၤအပူၤဒီး တုၤလၢတနံၤအံၤလါယနူၤအါရံၤ ၄ သီအနံၤတစု တၢ်ဒုးကဲထီၣ်ဒံး၀ဲကွ့ၢ်ကွ့ၢ်န့ၣ်လီၤႉ

ဒ်န့ၣ်အသိးလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤ ကၠၤအ့စ့ၣ်ကၠံႇကီးတရံးႇဃိၣ်သၢဖျၢၣ်ဟီၣ်က၀ီၤဒီး မၠၣ်၀တံၣ်-ကီးတရံးအ့ရှါကျဲမုၢ်သီဒီတကျိၤန့ၣ်စ့ၢ်ကီး တၢ်ဒုးကဲထီၣ်၀ဲဒၣ်လၢ(KNLA)သုးပာ်ဖှိၣ်ဒီးပယီၤသုးမီၤစိရိၤအသုးတဖၣ်အဘၢၣ်စၢၤခဲအံၤခဲအံၤန့ၣ်လီၤႉ

ဒ်သိးပယီၤသုးမီၤစိရိၤမၤရှဲလဲကွံာ် KNU သုးက့(၆)ဟီၣ်က၀ီၤကန့ၢ်အဂီၢ် မၤ၀ဲတၢ်ထီၣ်ဒုးလၢကလံၤကျါႇခးလီၤ၀ဲကျိဖးဒိၣ်ဒီးအိးထီၣ်၀ဲတၢ်ဒုးမဲာ်သၣ်လၢဟီၣ်က၀ီၤပူၤအဃိ လီၢ်က၀ီၤထံဖိကီၢ်ဖိကမျၢၢ်ခံကလးဘျဲၣ်ဘၣ်ဃ့ၢ်မှံဟးဖျိး၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ