လါစဲးပထ့ဘၢၣ် ၂၉ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲတနံၤအံၤလါစဲးပထ့ဘၢၣ် ၂၉ သီအနံၤ သ့ၣ်ညါဘၣ်လၢ ကညီကီၢ်စဲၣ်သုးကီၣ်ကးအခိၣ် စီၤမၠ့ၣ်အူကလဲၤ၀ဲဒၣ်လၢတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုး၀ဲၤလီၢ်ခိၣ်သ့ၣ်ဆိၣ်စံမၠဲၣ်တၢ်လီၢ်အဃိ ကျဲလၢတၢ်ကလဲၤဆိၣ်စံမၠဲၣ်ဒီတကျိၤန့ၣ်(DKBA)မၤအါထီၣ်ကျဲတၢ်ဘံၣ်တၢ်ဘၢအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိလၢအထံၣ်ဒီးအမဲာ်တဖၣ်အအိၣ်န့ၣ်လီၤႉ
တၢ်ကစီၣ်ဟူထီၣ်လၢ ကီၢ်စဲၣ်သုးကီၣ်ကးအခိၣ် စီၤမၠ့ၣ်အူလၢသုးမီၤစိရိၤတီၣ်ထီၣ်၀ဲအံၤ ကဟဲ၀ဲဒၣ်လၢလ့က့ၣ်ကီာ်၀့ၢ်သီဒီးဆိၣ်စံမၠဲၣ်တၢ်လီၢ်အဃိ တကီၢ်ခါခဲအံၤဖဲလီၢ်က၀ီၤ၀ဲန့ၣ်အပူၤ ပယီၤသုးဃုာ်ဒီး(DKBA)သုးတဖၣ်မၤအါထီၣ်တၢ်ဘံၣ်တၢ်ဘၢအဂ့ၢ်န့ၣ် လီၢ်က၀ီၤဖိလၢအထံၣ်၀ဲဒီးအမဲာ်တဂၤစံး၀ဲဒ်အံၤန့ၣ်လီၤႉ
“ဖဲတနံၤအံၤဂီၤခီဂီၤဂီၤန့ၣ် စးထီၣ်လၢဆိၣ်စံမၠဲၣ်တုၤလၢဖလူကျဲဒီတကျိၤန့ၣ် ပထံၣ်လၢ(DKBA)သုးအိၣ်၀ဲတဒူၣ်တဒူၣ်လီၤႉ ဘၣ်မနုၤအဃိလဲၣ်န့ၣ်တသ့ၣ်ညါဘၣ်ႉ ၀ံၤဘျီပထံၣ်ဘၣ်လၢသိၣ်လ့ၣ်(၆)ပၣ်တခိၣ်လဲၤထီၣ်၀ဲဒၣ်လီၤႉ လဲၤထီၣ်၀ဲဒၣ်ဆူဖလူတကပၤလီၤႉ လၢသိလ့ၣ်ပူၤန့ၣ်သုးၦဲၤၦဲၤလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
ဒ်ပဒိးန့ၢ်ပာ်တၢ်ကစီၣ်အသိးန့ၣ် ကီၢ်စဲၣ်သုးကီၣ်ကးအခိၣ်အံၤကနုာ်လီၤဆီၣ်ထွဲမၤစၢၤတၢ်လၢလ့က့ၣ်ကီာ်၀့ၢ်သီတခါဒီး ဖဲန့ၣ်အ၀ံၤအလီၢ်ခံ ကဆဲးလဲၤ၀ဲဆူ(DKBA)သုး၀ဲၤလီၢ်ခိၣ်သ့ၣ်ဆိၣ်စံမၠဲၣ်တၢ်လီၢ်န့ၣ်လီၤႉ
ဒ်န့ၣ်အသိးဖဲမဟါ(လါစဲးပထ့ဘၢၣ် ၂၈)သီအနံၤစ့ၢ်ကီး ပယီၤသုးတဖၣ်နုုာ်လီၤသမံသမိးသံဒိးသံကွၢ်တၢ်လၢလ့က့ၣ်ကီာ်၀့ၢ်သီပူၤတၢ်ဂ့ၢ်အံၤ ကဘၣ်ထွဲလိာ်အသးဒီး ကီၢ်စဲၣ်သုးကီၣ်ကးခိၣ်ကဟဲ၀ဲတၢ်ဂ့ၢ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
