လါစဲးပထ့ဘၢၣ် ၃ သီႇ ၂၀၂၁ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် သုးက့(၁) ဖၣ်အၣ်ကီၢ်ဆၣ် တကီၤဘိသ၀ီကရူၢ် လဲၤတီကၠံသ၀ီကပၤန့ၣ် ဖဲတနံၤအံၤ(လါစဲးပထ့ဘၢၣ် ၃)သီ ဂီၤခီအဆၢကတီၢ် ခီဖျိသုးမီၤစိရိၤအသုးဟဲထီၣ်တလၢတၢ်ပာ်ပနီၣ်တၢ်လီၢ်အဃိ တၢ်ခးလိာ်သးဟဲကဲထီၣ်၀ဲဒီး KNLA သုးက့(၁) ဒီးဖဲန့ၣ်သုးမီၤစိရိၤအၦၤသံ(၃)ဂၤႇ ဘၣ်ဒိ(၅)ဂၤအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ
ဖဲတနံၤအံၤ(လါစဲးပထ့ဘၢၣ် ၃)သီ ဂီၤခီ ၆ နၣ်ရံၣ်တခီဃၣ်ဃၣ်အဆၢကတီၢ်န့ၣ် သုးမီၤစိရိၤအသုးခီၣ်ချ့သုးရ့ၣ်(ခမရ–၂၀၁) ဟဲထီၣ်၀ဲဆူလဲၤတီကၠံသ၀ီကပၤလၢအတအိၣ်ဒီးတၢ်ဟ့ၣ်ဒုး သ့ၣ်ညါဘၣ်အဃိ တၢ်ဘၣ်သဂၢၢ်ခးလိာ်သးဟဲကဲထီၣ်၀ဲဒီး KNLA သုးရ့ၣ်(၁) သုးဒ့–၂ လီၤအဂ့ၢ်န့ၣ် ခ့ၣ်အဲၣ်ယူၣ် ဖၣ်အၣ်ကီၢ်ဆၣ် ၦၤဘၣ်မူဘၣ်ဒါတဂၤစံးဘၣ်ခ့ၣ်အဲးစံၣ်န့ၣ်လီၤႉ
အ၀ဲစံး၀ဲလၢ“တၢ်ကဲထီၣ်သးဖဲတနံၤညါအံၤဂီၤခီ ၆ နၣ်ရံၣ်တခီလီၤႉ မ့ၢ်ပယီၤသုးတကပၤ အနီၣ်ဂံၢ်ပၣ်စံးအါလဲၣ်ဒုတသ့ၣ်ညါဘၣ််ႉ လၢအဘၣ်ဒိ ၅ ဂၤန့ၣ်ၦၤဆှၢလၢကမၤမိၢ်တၢ်ဆါဟံၣ်လီၤႉ ပယီၤသုးတဖၣ်အိၣ်ဒံး၀ဲဖဲန့ၣ်လီၤႉ ဟးထီၣ်ဟးလီၤလၢကီၢ်သူလ့ၤဟီၣ်က၀ီၤပူၤမ့ဟ့ၣ်ဒုးသ့ၣ်ညါ၀ဲဒု ကီၢ်သူလ့ၤတကပၤကဆိကမိၣ်၀ဲတမၠိမီၤနီၤႉ ခဲအံၤန့ၣ်တတဲတၢ်နီတမံၤဘၣ်အဃိ တၢ်ခးလိာ်သးဘၣ်ဟဲကဲထီၣ်လီၤ”အဂ့ၢ်န့ၣ် စံး၀ဲန့ၣ်လီၤႉ
တၢ်ခးလိာ်သးကဲထီၣ်လၢဘျီ၀ဲအံၤန့ၣ် KNLA သုးက့(၁)တကပၤတၢ်သံတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် ဖၣ်အၣ်ကီၢ်ရ့ၣ်ၦှၤဘၣ်မူဘၣ်ဒါတဂၤဃီအ၀ဲန့ၣ်စံးအါထီၣ်၀ဲန့ၣ်လီၤႉ
ဖဲအပူၤကွံာ်(လါအီကူး ၂၉)သီအနံၤစ့ၢ်ကီး သုးမီၤစိရိၤအသုးဂံၢ်ဘါအဂၤ(၂၀)ဃၣ်ဃၣ်လၢအဟဲထီၣ်၀ဲ ဖဲတကီၤဘိသ၀ီကရူၢ် မံဘိသ၀ီကပၤအံၤ ခီဖျိ KNLA သုးက့(၁)အိၣ်ခိးခးအ၀ဲသ့ၣ်အဃိ သုးမီၤစိရိၤအၦၤသံ(၃)ဂၤႇ ဘၣ်ဒိ ၂ ဂၤဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
