Home တၢ်ကစီၣ် KNU Concerned Group တူၢ်လိာ်သဂၢၢ်၀ဲ CRPH ဒီး NUG

KNU Concerned Group တူၢ်လိာ်သဂၢၢ်၀ဲ CRPH ဒီး NUG

266
0

လါစဲးပထ့ဘၢၣ် ၃ သီႇ ၂၀၂၁ နံၣ်ႇ ခ့ၣ်အဲးစံၣ်

ကီၢ်စၢဖှိၣ်ဘျီၣ်ဒိၣ်ခၢၣ်စးကမံးတံာ်(CRPH)ဒီးဒီကလုာ်ဃူဖိးပဒိၣ်(NUG)အတၢ်အိၣ်ဆၢထၢၣ်အံၤ လီၤပလိာ်အသးဒီးပတၢ်အိၣ်ဆၢထၢၣ်အဃိ တူၢ်လိာ်သဂၢၢ်အ၀ဲသ့ၣ်လီၤအဂ့ၢ်န့ၣ်(KNU Concerned Group)ထုးထီၣ်ဘိးဘၣ်ရၤလီၤ၀ဲဖဲမဟါ(လါစဲးပထ့ဘၢၣ် ၂)သီအနံၤန့ၣ်လီၤႉ

CRPH ဒီး NUG ပဒိၣ်အထံရူၢ်ကီၢ်သဲးအတၢ်အိၣ်ဆၢထၢၣ်လၢအမ့ၢ် ကမၤကတၢၢ်ကွံာ်သုးမီၤစိရိၤသနူဒီး တၢ်ကသူၣ်ထီၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်အဃိ အ၀ဲသ့ၣ်အတၢ်ပာ်သးအံၤလီၤပလိာ်အသးဒီးပကလုာ်ဒူၣ်ဖီၣ်စုက၀ဲၤတၢ်ကရၢကရိအတၢ်အိၣ်ပညိၣ်ဒီး ကလုာ်ဒူၣ်နီၢ်ကစၢ်တၢ်စံၣ်ညီၣ်ပၢလီၤသးခွဲးယာ်လၢအအိၣ်ဒီးတၢ်တုၤသိးထဲသိး ကသူၣ်ထီၣ်ကီၢ်စဲၣ်ပာ်ဖှိၣ်ကီၢ်စၢဖှိၣ်အဃိ တူၢ်လိာ်သဂၢၢ်အ၀ဲသ့ၣ်ဒီး ကမၤစၢၤ၀ဲပၢပြးႇဒုးယၤဂ့ၢ်၀ီႇထံရူၢ်ကီၢ်သဲးဒီးထံကီၢ်မီၢ်သီဂ့ၢ်၀ီတၢ်ဟူးတၢ်ဂဲၤတဖၣ်အဂ့ၢ်န့ၣ် KNU Concerned Group စံး၀ဲန့ၣ်လီၤႉ

ကရူၢ်ၦၤကတိၤတၢ်ပၢ ခ့ၣ်အဲၣ်ယူၣ် ကရၢခိၣ်(၂)လီၢ်လံၤ ပဒိၣ်နီၢ်စံၤဖိရၣ်စ့ၣ် စံး၀ဲလၢ“ပတၢ်ပၢၢ်ဆၢတၢ်မုၢ်လၢ်ဖီတၢၣ်ဒီးအ၀ဲသ့ၣ်အတၢ်ပညိၣ်န့ၣ်လီၤပလိာ်အသးအဃိ အလီၢ်အိၣ်လၢပကဘၣ်ပာ်ဖှိၣ်မၤသကိးတၢ်လီၤႉ တၢ်လၢအကဒုးကဲထီၣ်၀ဲတၢ်လီၤမုၢ်လီၤဖးတဖၣ်န့ၣ် ဒ်သိးဒီးသုးမီၤစိရိၤလၢအပၢဆူၣ်ပၢဆိးထံဖိကီၢ်ဖိမၤသံမၤ၀ီမၤတရီတပါထံဖိကီၢ်ဖိကမျၢၢ်ကလုာ်ဒူၣ်သ့ၣ်တဖၣ်၀ဲၤအံၤန့ၣ် ပကဆီၣ်ဖျိးကွံာ်အီၤကန့ၢ်အဂီၢ်ပကဘၣ်ပာ်ဖှိၣ်ထီၣ်သးဒီးဖီၣ်လိာ်စုကိးဂၤဒဲးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါခီဖျိသုးမီၤစိရိၤအံၤတတူၢ်လိာ်၀ဲ(၂၀၀၈)တၢ်ဃုထၢအစၢဘၣ်ဒီး ထီဒါ၀ဲကမျၢၢ် ထံဖိကီၢ်ဖိအတၢ်ပာ်သးဒီးဟံးဆူၣ်ကွံာ်၀ဲထံကီၢ်တၢ်စိတၢ်ကမီၤအဃိ ထံကီၢ်ဒီဘ့ၣ်တၢ်ပတုာ်တၢ်ခး(NCA) လံာ်ဃံးလၢအဆဲးလီၤဃာ်၀ဲဒီးကလုာ်ဒူၣ်ဖီၣ်စုက၀ဲၤတၢ်ပၢၢ်ဆၢကရူၢ်ကရၢတဖၣ်အံၤစ့ၢ်ကီးပပာ်လၢအဟးဂီၤကွံာ်၀ဲလံ အဂ့ၢ်န့ၣ် ကရူၢ်အံၤစံး၀ဲန့ၣ်လီၤႉ

(NCA)အလံာ်ဃံးဃာ်အံၤမ့ၢ်လံာ်ဃံးဃာ်တဘ့ၣ်လၢ မၤ၀ဲဒ်သိးကလုာ်ဒူၣ်ဖီၣ်စုက၀ဲၤတၢ်ပၢဆၢကရူၢ်ကရၢသ့ၣ်တဖၣ် တတုၤ၀ဲဆူထံရူၢ်ကီၢ်သဲးအဖီတၢၣ်ဘၣ်ဒီး ဒုးအိၣ်ထီၣ်ပၣ်တံၣ်နုာ်လီၤ၀ဲတၢ်ဃုထၢဒီးကပာ်လီၤကွံာ်တၢ်စုက၀ဲၤဒီး သွီနုာ်လီၤ၀ဲဆူ(၂၀၀၈)တၢ်ဘျၢခိၣ်သ့ၣ်အဖီလာ်လီၤအဂ့ၢ်န့ၣ် (KNU Concerned Group)ထုးထီၣ်ပာ်ဖျါ၀ဲန့ၣ်လီၤႉ

ဖဲအပူၤကွံာ်(လါဖ့ၤဘြူၤအါရံၤ ၅)သီအနံၤ တၢ်စးထီၣ်ဒုးအိၣ်ထီၣ်(CRPH)အံၤဒီး ဖဲလါမးရှ ၃၁ သီအနံၤ တၢ်ဘိးဘၣ်ရၤလီၤထူးသံကွံာ်၀ဲ(၂၀၀၈)တၢ်ဘၢခိၣ်သ့ၣ်အသိး ဖဲလါအ့ဖြ့ၣ် ၁၇ သီအနံၤ တၢ်ဒုးအိၣ်ထီၣ်(NUG)ပဒိၣ်အံၤန့ၣ်လီၤႉ ဖဲလါယူၤ ၇ သီအနံၤ (CRPH ဒီး NUG) ဘိးဘၣ်ရၤလီၤ တၢ်ကရၢကရိလၢအဘျးစဲလိာ်သးဒီးသုးမီၤစိရိၤအံၤ လၢအမ့ၢ်ကရူၢ်လၢအမၤတၢထီၣ်တၢလီၤတၢ်န့ၣ်လီၤႉ

ကလုာ်ဒူၣ်ဖီၣ်စုက၀ဲၤတၢ်ပၢၢ်ဆၢကရူၢ်ကရၢတဖၣ်ဒီးတၢ်ဒီသဒၢကမျၢၢ်သုး(PDF)ကရူၢ်အံၤ ဒ်သိးသုးမီၤစိရိၤသနူကလီၤၦၢ်ကွံာ်အဂီၢ်ဒီးတၢ်ကသူၣ်ထီၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်အဂီၢ် ကနုာ်လီၤပၢၢ်ဆၢသကိးဃူဃူဖိးဖိးအဂ့ၢ်န့ၣ် (KNU Concerned Group)ဆီၣ်တခူထီၣ်၀ဲန့ၣ်လီၤႉ