Home တၢ်ကစီၣ် ပယီၤသုးဒွဲၣ်အူ၀ဲ ဘျံးဒ၀ဲၢ် သယဲၣ်ခၠီကီၢ်ဆၣ်ပူၤ ဒူသ၀ီလီၢ်က၀ီၤဖိတနီၤအဟံၣ်

ပယီၤသုးဒွဲၣ်အူ၀ဲ ဘျံးဒ၀ဲၢ် သယဲၣ်ခၠီကီၢ်ဆၣ်ပူၤ ဒူသ၀ီလီၢ်က၀ီၤဖိတနီၤအဟံၣ်

473
0
Photo: ေဒသခံ

လါအီးကထိဘၢၣ် ၁ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲစှၤသီအတီၢ်ပူၤအံၤ ပယီၤသုးဒွဲၣ်အူကွံာ်၀ဲဒူသ၀ီတနီၤလၢအအိၣ်ဖဲတနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ် သယဲၣ်ခၠီကီၢ်ဆၣ် လီၢ်က၀ီၤဖိအဟံၣ်တဖၣ်အဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤတၢ်ကစီၣ်အအိၣ်န့ၣ်လီၤႉ

ပယီၤသုးလၢအနုာ်လီၤအိၣ်ဆိး၀ဲဖဲသယဲၣ်ခၠီကီၢ်ဆၣ် သဲခၠီကၠံသ၀ီအပူၤတဖၣ် ဖဲအပူၤကွံာ်(လါစဲးပထ့ဘၢၣ် ၂၈)သီအနံၤန့ၣ် ဒွဲၣ်အူကွံာ်၀ဲသ၀ီဖဲန့ၣ်အပူၤဟံၣ်တဖျၢၣ်ဒီးတၢ်တ့တၢ်ဘှီတၢ်မၤလီၢ်တခါအမဲာ်ညါ ဟံးဆူၣ်၀ဲလီၢ်က၀ီၤဖိအသိလ့ၣ်တခိၣ်ဒီးသိလ့ၣ်ယီၢ်အခိၣ်(၃၀)ဃၣ်ဃၣ်စ့ၢ်ကီးအဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံးဘၣ်ခ့ၣ်အဲးစံၣ်ဖဲတနံၤအံၤလါအီးကထိဘၢၣ် ၁ သီအနံၤန့ၣ်လီၤႉ
လၢန့ၣ်အမဲာ်ညါဖဲလါစဲးပထ့ဘၢၣ် ၃၀ သီအနံၤစ့ၢ်ကီး ပယီၤသုးကရူၢ်၀ဲအံၤဒွဲၣ်အူကဒီး၀ဲ၀့ကဖီၤသ၀ီဖိအဟံၣ် ၁ ဖျၢၣ်အဂ့ၢ်န့ၣ် လီၢ်က၀ီၤဖိတဂၤဃီအ၀ဲန့ၣ်စံးအါထီၣ်၀ဲန့ၣ်လီၤႉ

အ၀ဲစံး၀ဲလၢ“ဒွဲၣ်အူဟံၣ်အမဲာ်ညါ မ့ထံၣ်၀ဲၦၤအိၣ်လၢသဲးကျီးပူၤတဖၣ်စံၣ်ထီၣ်န့ၣ်ကလူၤခး၀ဲလီၤႉ ဟးဃုတၢ်လၢဟံၣ်ပူၤစ့ၢ်ကီးအိၣ်လီၤႉ ခဲအံၤဟးနုာ်လီၤဃုတၢ်လၢသ၀ီတဖျၢၣ်၀ံၤတဖျၢၣ်လီၤႉ နၢ်ဟူလၢအ၀ဲသ့ၣ်ဟဲအံၤခီဖျိတၢ်ဒွဲၣ်အူ၀ဲသဲခၠီကၠံပၢၤကီၢ်တၢ်အိၣ်ခိးလီၢ်အဃိလီၤႉ အနီၢ်ကီၢ်ခီန့ၣ်တၢ်တဒွဲၣ်အူပၢၤကီၢ်တၢ်အိၣ်ခိးအလီၢ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ဖဲတနံၤအံၤ(လါအီးကထိဘၢၣ် ၁)သီ ဂီၤခီအဆၢကတီၢ်စ့ၢ်ကီး လၢသဲခၠီကၠံဒီး၀့ကဖီၤသ၀ီဘၢၣ်စၢၤ ကၠွဲခၠၤသ၀ီပူၤစ့ၢ်ကီး တၢ်လဲၤနုာ်လီၤသံဒိးသံကွၢ်၀ဲၦၤမံၤစရီတဖၣ်ဒီး နုာ်လီၤကွၢ်ဃုတၢ်ဖိတၢ်လံၤလၢဟံၣ်ပူၤအမဲာ်ညါ တီၢ်မၤဟးဂီၤ၀ဲသိလ့ၣ်လၢအိၣ်သီခါဖၠၣ်ကရၢၢ်ပူၤတဖၣ်စ့ၢ်ကီးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဖဲအပူၤကွံာ်(လါစဲးပထ့ဘၢၣ် ၂၇)သီအနံၤစ့ၢ်ကီး ပယီၤသုးဂံၢ်ဘါလၢကအိၣ်အဂၤ(၇၀)ဃၣ်ဃၣ်အံၤ ဆီလီၤသးအိၣ်ဆိး၀ဲဖဲသဲခၠီကၠံသ၀ီ ပၢၤကီၢ်တၢ်အိၣ်ခိးလီၢ်ႇကၠိကရၢၢ်ပူၤ၀ံၤ ဟးဖီၣ်ဒံး၀ဲသ၀ီဖိလၢအအိၣ်ဘူးဒီးသ၀ီဖဲန့ၣ်တဖျၢၣ်၀ံၤတဖျၢၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

Photo: ေဒသခံ

ခီဖျိပယီၤသုးနုာ်လီၤဃုတၢ်လၢသ၀ီပူၤဒ်အံၤအဃိ ၦၤလၢအထီဒါသုးမီၤစိရိၤသနူတဖၣ်ဒီးလီၢ်က၀ီၤဖိအါအါဂီၢ် ဘၣ်ဟးဃ့ၢ်အိၣ်ခူသူၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လီၢ်က၀ီၤဖိလၢအအိၣ်ဖဲဘျံးဒ၀ဲၢ်ကီၢ်ရ့ၣ် သယဲၣ်ခၠီကီၢ်ဆၣ်အပူၤတဖၣ်အါဒၣ်တက့ၢ်န့ၣ် လုၢ်အီၣ်အသးသမူလၢတၢ်သူၣ်သဲးတဖၣ်န့ၣ်လီၤႉ တကီၢ်ခါဆၢကတီၢ်ခဲအံၤမ့ၢ်လၢသဲးသၣ်တဖၣ်စးထီၣ်မံလံဒီး ကဘၣ်ထီၣ်ဒဲးအဆၢကတီၢ်လံဘၣ်ဆၣ် ခီဖျိပယီၤသုးတဖၣ်နုာ်လီၤအိၣ်ဆိး၀ဲလၢသဲးကျီးပူၤဒီး ခးလီၤကျိဖးဒိၣ်ကျိဖိတဖၣ်အဃိ လီၢ်က၀ီၤဖိတဖၣ်လဲၤလၢသဲးကျီးပူၤတဘူၣ်လၢၤဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

လၢန့ၣ်အမဲာ်ညါဖဲမဟါ(လါစဲးပထ့ဘၢၣ် ၃၀)သီ ဂီၤခီအဆၢကတီၢ်စ့ၢ်ကီး ပယီၤသုးတဖၣ်ဟဲနုာ်လီၤ၀ဲဒၣ်လၢ၀့ကဖီၤသ၀ီထံကျိ၀ၢ်ခီတကပၤဒီး ဖဲလူၤခး၀ဲလီၢ်က၀ီၤဖိလၢအဃ့ၢ်အိၣ်ခူသူၣ်တဖၣ်အခါ တၢ်ခးလိာ်သးကဲထီၣ်၀ဲဒီးလီၢ်က၀ီၤတၢ်ဒီသဒၢကမျၢၢ်သုး(PDF)ကရူၢ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ