Home တၢ်ကစီၣ် ကီးတရံးတၢ်ဒုးကဲထီၣ် ပယီၤသုးသံ(၄)ဂၤႇ ဘၣ်ဒိ(၃)ဂၤအကျါပၣ်ဃုာ်၀ဲ(G1)တဂၤႇ

ကီးတရံးတၢ်ဒုးကဲထီၣ် ပယီၤသုးသံ(၄)ဂၤႇ ဘၣ်ဒိ(၃)ဂၤအကျါပၣ်ဃုာ်၀ဲ(G1)တဂၤႇ

891
0
Photo: CJ

လါအီးကထိဘၢၣ် ၁ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲတနံၤအံၤ(လါအီးကထိဘၢၣ် ၁)သီ ဂီၤခီအဆၢကတီၢ် တၢ်ခးလိာ်သးကဲထီၣ်လၢ ကီးတရံး–ကၠဲးဒိကျဲဖးဒ့ဒီး ဖဲန့ၣ်ပယီၤသုးတကပၤသံ၀ဲ(၄)ဂၤႇ ဘၣ်ဒိ(၃)ဂၤအကျါပၣ်ဃုာ်၀ဲဒီးသုးရိၣ်မဲခိၣ်–၁(G1) တဂၤအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤတၢ်ကစီၣ်အအိၣ်န့ၣ်လီၤႉ

ဖဲပယီၤသုးဟံးန့ၢ်၀ဲကျဲတၢ်ဘံၣ်တၢ်ဘၢလၢမုၢ်ထီၣ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ်(ရတခ)သုးကီၢ်ခီအခိၣ်အတၢ်လဲၤဆူမၠၣ်၀တံၣ်တၢ်လဲၤကျဲအဂီၢ်အခါ ဖဲဂီၤခီ ၉ နၣ်ရံၣ်အဆၢကတီၢ် တၢ်ခးလိာ်သးကဲထီၣ်၀ဲဒီးဘူးဒးတၢ်ဘါတၢ်ဂုၤထီၣ်ပသီထီၣ်ကညီသုးမုၢ်ဒိၣ်(DKBA)ထုးဖးကရူၢ်အဃိ တၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ကီးတရံးလီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲလၢ “ဒ်ပသ့ၣ်ညါအသိးန့ၣ်အ၀ဲသ့ၣ်သုးကီၢ်ခီအခိၣ်ကလဲၤထီၣ်လၢမၠၣ်၀တံၣ်အဂီၢ် ဖဲအ၀ဲသ့ၣ်အိၣ်ခိးန့ၢ်၀ဲကျဲတၢ်ဘံၣ်တၢ်ဘၢအဆၢကတီၢ်န့ၣ် ဒံၣ်ခ့ၣ်ဘံၣ်အ့ၣ်ခးအ၀ဲသ့ၣ်လီၤႉ ခး၀ဲန့ၣ်ဘူးဘူးဖိလီၤအဃိ ပယီၤသုးတကပၤသံ(၄)ဂၤဘၣ်ဒိ(၃)ဂၤမီၤနီၤႉ ဖဲအကျါဘၣ်၀ဲသုးရိၣ်မဲခိၣ်(၁)တဂၤအကံၣ်ဒုၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

Photo: CJ

တၢ်ခးလိာ်သးအံၤကဲဘျီ၀ဲအံၤမ့ၢ်၀ဲ ပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ–၁၂)အဖီလာ် ခီၣ်ချ့သုးရ့ၣ်(ခမရ–၂၃၀ႇ၂၃၁)လၢအအိၣ်ဆီလီၤသးဖဲကီးတရံးအံၤဒီး သုးခိၣ်ကျၢၢ်စိ စီၤကၠီၤသဲၣ် တီခိၣ်ရိၣ်မဲ ဒံၣ်ခ့ၣ်ဘံၣ်အ့ၣ်(ထုးဖး)ကရူၢ်ခံဒူၣ်အံၤအဘၢၣ်စၢၤလီၤအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ကစီၣ်အအိၣ်န့ၣ်လီၤႉ

တၢ်ခးလိာ်သးကဲထီၣ်၀ံၤအလီၢ်ခံ ခီဖျိပယီၤသုးတဖၣ်ခးလီၤကျိဖးဒိၣ်ကျိဖိတဖၣ်ဆူကီးတရံးကလံၤထံးသ၀ီတဖၣ်အပူၤအဃိ ဘၣ်၀ဲဟံၣ်ဃီတဖၣ်အိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

တကီၢ်ခါခဲအံၤတုၤလၢမုၢ်ထူၣ် ၁၁ နၣ်ရံၣ်ဃၣ်ဃၣ်တစု ပယီၤသုးဆဲးခးလီၤဒံး၀ဲကျိဖးဒိၣ်တဖၣ်အသိး ခီဖျိပယီၤသုးတကပၤမၤအါထီၣ်သုးဂံၢ်ဘါအဃိ လီၢ်က၀ီၤဖိတဖၣ်ဘၣ်ယိၣ်၀ဲလၢတၢ်ဒုးကဟဲဆူၣ်ထီၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ