လါအီးကထိဘၢၣ် ၂၀ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ် ကီးတရံး၀့ၢ် ကလံၤထံး သ၀ီသီလီၢ်က၀ီၤဖိတဖၣ်မ့ဟးစံၣ်အိၣ်ခူသူၣ်လၢတၢ်ချၢန့ၣ် ပယီၤသုးလၢအအိၣ်ဆိးဖဲသ၀ီပူၤတဖၣ်တဲပျံၤတဲဖုး၀ဲလၢကဒွဲၣ်အူကွံာ်အဟံၣ်အဃီအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၁၃)စုဒုၣ်တီၤအဖီလာ်ခီၣ်ချ့သုးရ့ၣ်(ခမရ-၅၅၆ႇ၅၆၀)လၢအနီၣ်ဂံၢ်ကအိၣ်၀ဲအဂၤ(၆၀)လၢအိၣ်ဆိး၀ဲဖဲသ၀ီသီပူၤသ့ၣ်တဖၣ် တဲပျံၤတဲဖုး၀ဲလီၢ်က၀ီၤဖိလၢ တၢ်ဒုးမ့ကဲထီၣ်သ၀ီဖိတဖၣ်မ့ဟးစံၣ်အိၣ်ခူသူၣ်လၢတၢ်ချၢန့ၣ် ကဒွဲၣ်အူကွံာ်၀ဲအဟံၣ်အဃီအဃိ သ၀ီဖိတဖၣ်ဘၣ်အိၣ်လၢတၢ်ပျံၤတၢ်ဖုးအပူၤအဂ့ၢ်န့ၣ် ၦၤလၢအဘူးဒီး(KNLA)တဂၤစံး၀ဲန့ၣ်လီၤႉ
“ခဲအံၤပယီၤသုးအိၣ်ဖဲသ၀ီသီမီၤနီၤႉ ဟံၣ်လၢအ၀ဲသ့ၣ်လဲၤအိၣ်၀ဲတဖၣ်န့ၣ်စ့ၢ်ကီး တဟ့ၣ်ဒုးဟး၀ဲဟံၣ်ကစၢ်တဖၣ်လၢတၢ်ချၢဘၣ်ႉ မ့ဟးထီၣ်န့ၣ်တဲပျံၤ၀ဲလၢကဒွဲၣ်အူဟံၣ်မီၤနီၤႉ ဖဲမဟါန့ၣ်စ့ၢ်ကီးဒွဲၣ်အူၦၤသိလ့ၣ်တခိၣ်လီၤႉ မ့၀ံၤဘျီန့ၣ်လူၤဖီၣ်အီၣ်၀ဲထိးဆီလၢသ၀ီပူၤအိၣ်လီၤႉ ခးလိာ်သးအိၣ်ကိးမုၢ်နံၤဒဲးလီၤ”အဂ့ၢ်န့ၣ် လီၢ်က၀ီၤဖိဖဲန့ၣ်စံးဘၣ်ခ့ၣ်အဲးစံၣ်ဖဲမဟါ(လါအီးကထိဘၢၣ် ၁၉)သီအနံၤန့ၣ်လီၤႉ
ပယီၤသုးတဖၣ်တက့ၤ၀ဲဒံးဘၣ်ႇဆဲးအိၣ်ဒံး၀ဲဖဲလီၢ်က၀ီၤ၀ဲန့ၣ်အပူၤဒီး ခီဖျိတၢ်ဒုးဆဲးကဲထီၣ်ဒံး၀ဲအဃိ တကီၢ်ခါခဲအံၤသ၀ီသီအမဲာ်ညါသ၀ီလၢအိၣ်ဘူးဖဲန့ၣ်သ့ၣ်တဖၣ်လၢအမ့ၢ် ၀့ၢ်လီၢ်လံၤဒီး အီကြီသ၀ီလီၢ်က၀ီၤဖိလၢအကယၤဘၣ်ဃ့ၢ်အိၣ်ခူသူၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
ပယီၤသုးတဖၣ်အံၤစးထီၣ်ဖဲအပူၤကွံာ်လါအီးကထိဘၢၣ် ၁ သီအနံၤန့ၣ် ဟဲနုာ်လီၤ၀ဲဒၣ်လၢကီးတရံး၀့ၢ် ကလံၤထံးတကပၤဒီး စးထီၣ်ဖဲလါအီးကထိဘၢၣ် ၁ သီတုၤလၢ ၁၈ သီန့ၣ် တၢ်ခးလိာ်သးကဲထီၣ်၀ဲဒီးဟီၣ်က၀ီၤ(KNLA)သုးရ့ၣ် ၁၈ ဒီး သုးရ့ၣ် ၂၇ တဖၣ်အဘၢၣ်စၢၤအိၣ်၀ဲကိးမုၢ်နံၤဒဲးဃၣ်ဃၣ်ညါဒီး ဖဲန့ၣ်ပယီၤသုးတကပၤသံ၀ဲအဂၤ(၂၀)ဘျဲၣ်ႇဘၣ်ဒိအဂၤ(၃၀)ဘျဲၣ်အဂ့ၢ်န့ၣ် KNLA တကပၤစံး၀ဲန့ၣ်လီၤႉ
ဖဲတၢ်ဒုးကဲထီၣ်အခါန့ၣ် ခီဖျိပယီၤသုးတကပၤသူ၀ဲကျိဖးဒိၣ်အဃိ ကျိဖးဒိၣ်လီၤတဲာ်ဘၣ်ဒိ၀ဲလီၢ်က၀ီၤဖိအဟံၣ်အဃီအါအါဂီၢ်ဂီၢ်အမဲာ်ညါ ဆၣ်ဖိကီၢ်ဖိလၢလီၢ်က၀ီၤဖိဘုၣ်၀ဲလၢဟံၣ်သ့ၣ်တဖၣ်စ့ၢ်ကီးဘၣ်ဒိဘၣ်ထံးသံ၀ဲအိၣ်န့ၣ်လီၤႉ
လၢန့ၣ်အမဲာ်ညါ ဖီၣ်ဒီးကိးသူ၀ဲလီၢ်က၀ီၤ သ၀ီဖိတနီၤလၢကနဲၣ်ပၠးန့ၢ်အ၀ဲသ့ၣ်ကျဲလၢသုးတၢ်ဟူးတၢ်ဂဲၤအဂီၢ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
