လါအီးကထိဘၢၣ် ၁၉ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီကီၢ်စဲၣ် မၠၣ်၀တံၣ်၀့ၢ် ဖဲတနံၤအံၤ(လါအီးကထိဘၢၣ် ၁၉)သီ မုၢ်ထူၣ် ၁၂ နၣ်ရံၣ်အဆၢကတီၢ် ကီၢ်ဆၣ်စံၣ်ညီၣ်ကွီၢ်ဘျီၣ်အံၤထူးသံကွံာ်၀ဲတၢ်မူးတၢ်ရၢ်ဒီး ပျၢ်လီၤကွံာ်ၦၤလၢတၢ်ဖီၣ်လိာ်ဘၢလိာ်ကွီၢ်ဃာ်အီၤလၢကွီၢ်မ့ၣ် နီၣ်ဂံၢ် ၅၀၅(က)လၢအဘၣ်ထီၣ်တၢ်မူးတၢ်ရၢ်(၂၀)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
မၠၣ်၀တံၣ်၀့ၢ်ပူၤဖဲအပူၤကွံာ်လါဖ့ၤဘြူၤအါရံၤန့ၣ် ၦၤလၢအထီဒါသုးမီၤစိရိၤပာ်ဖျါထီၣ်သးတဖၣ် တၢ်တီၣ်ထီၣ်အ၀ဲသ့ၣ် ကွီၢ်မ့ၣ် နီၣ်ဂံၢ် ၅၀၅(က)ဒီး တၢ်ဖီၣ်ဒုးဃာ်၀ဲဖဲမၠၣ်၀တံၣ်ပၢၤကီၢ်၀ဲၤလီၢ်ယံၤ၀ဲ(၇)လါဃၣ်ဃၣ်န့ၣ်လီၤႉ ဖဲတနံၤညါအံၤ ကီၢ်ဆၣ်စံၣ်ညီၣ်ကွီၢ်ဘျီၣ်အံၤထူးသံကွံာ်၀ဲတၢ်မူးတၢ်ရၢ်ဒီး ၦၤလၢအဘၣ်ထီၣ်တၢ်မူးတၢ်ရၢ်(၅၈)ဂၤအကျါပျၢ်လီၤက့ၤ၀ဲ(၂၀)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
“တနံၤအံၤတၢ်ပျၢ်လီၤကွံာ်၀ဲပိာ်ခွါ(၁၅)ဂၤဒီးမိာ်မုၣ်(၅)ဂၤ ခဲလၢာ်အဂၤ(၂၀)မီၤနီၤႉ ဒ်ကီၢ်စၢဖှိၣ်အပတီၢ်ဆှၢဃီၤ၀ဲမံၤစရီအသိးန့ၣ်ပပျၢ်လီၤ၀ဲလီၤႉ တၢ်ပျၢ်ဖျဲးထီၣ်ကွံာ်တဘျီညါအံၤန့ၣ်ပၣ်၀ဲအဂၤ(၂၀) အိၣ်တ့ၢ်ဒံးလၢဃိာ်ပူၤစ့ၢ်ကီးအိၣ်လီၤႉ အ၀ဲသ့ၣ်ခီဒုန့ၣ်တၢ်ပျၢ်ဖျဲးကွံာ်အမံၤစရီမ့ပၣ်နီၢ်တဘျီမးပျၢ်လီၤအခွဲးကအိၣ်လီၤ”အဂ့ၢ်န့ၣ် ၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ
ဖဲလါဖ့ၤဘြူၤအါရံၤ ၁ သီ သုးဟံးန့ၢ်ကွံာ်တၢ်စိတၢ်ကမီၤ၀ံၤအလီၢ်ခံ မၠၣ်၀တံၣ်၀့ၢ် ၦၤလၢတၢ်တီၣ်ထီၣ်ဃာ်အီၤ ကွီၢ်မ့ၣ် နီၣ်ဂံၢ် ၅၀၅(က) တၢ်မူးတၢ်ရၢ်အိၣ်၀ဲအဂၤ(၁၀၀)ဘျဲၣ်ဒီး ဖဲန့ၣ်အကျါဖဲအပူၤကွံာ်ခံလါဘျဲၣ်အခါန့ၣ် တၢ်ပျၢ်လီၤကွံာ်၀ဲ ၃၅ ဂၤလံအသိး ဖဲတနံၤအံၤတၢ်ပျၢ်လီ၀ဲကဒီးအဂၤ(၂၀)န့ၣ်လီၤႉ
တကီၢ်ခါခဲအံၤ မၠၣ်၀တံၣ်ပၢၤကီၢ်၀ဲၤလီၢ် ၦၤလၢတၢ်အိးထီၣ်ဃာ်အီၤလၢ ကွီၢ်မ့ၣ် နီၣ်ဂံၢ် ၅၀၅(က) လၢအအိၣ်လၢဃိာ်ပူၤလၢအဘၣ်ထီၣ်တၢ်မူးတၢ်ရၢ်အိၣ်တ့ၢ်ဒံး၀ဲ(၃၈)ဂၤအသိး ဟးစံၣ်အိၣ်ခူသူၣ်အိၣ်၀ဲအဂၤ(၃၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲမဟါ(လါအီးကထိဘၢၣ် ၁၈)သီအနံၤ ပယီၤသုးဘိးဘၣ်ရၤလီၤ၀ဲလၢ ထံကီၢ်ဒီဘ့ၣ်တၢ်ကပျၢ်လီၤကွံာ်၀ဲထံရူၢ်ကီၢ်သဲးၦၤဃိာ်ဖိ(၁ႇ၃၁၆)ဂၤဒီး ၦၤလၢအဘၣ်ထီၣ်ရူထီၣ်တ့အဖၢမုၢ်(၄ႇ၃၂၀)ဂၤန့ၣ်လီၤႉ
ဖဲတၢ်ဘိးဘၣ်ရၤလီၤ၀ဲ၀ံၤအလီၢ်ခံ စးထီၣ်ဖဲမဟါမုၢ်ဟါခါအဆၢကတီၢ်န့ၣ် ထံကီၢ်ဒီတဘ့ၣ် ဃိာ်ကိးဖျၢၣ်ဒဲးဃၣ်ဃၣ်တၢ်ပျၢ်လီၤကွံာ်ထံရူၢ်ကီၢ်သဲးၦၤဃိာ်ဖိဒီးၦၤလၢတၢ်အိးထီၣ်ဃာ်၀ဲလၢသဲစးနီၣ်ဂံၢ်လၢအအိၣ်ဃိာ်ပူၤဒီးဘၣ်ထီၣ်ရူထီၣ်တ့အဖၢမုၢ်တဖၣ် တၢ်ထူးသံကွံာ်အ၀ဲသ့ၣ်တၢ်မူးတၢ်ရၢ်ဒီးပျၢ်လီၤကွံာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
