KNU သုးက့(၁)အိၣ်ခိးခးပယီၤသုးခိၣ်သိလ့ၣ်အဃိ ပယီၤသုးခိၣ်ဒီးအမါသံ

လါအီးကထိဘၢၣ် ၂၆ သီႇ ၂၀၂၁ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်-ဒူသထူၣ်ကီၢ်ရ့ၣ် သထူၣ်ကီၢ်အပူၤ ဖဲမဟါ(လါအီးကထိဘၢၣ် ၂၅)သီ မုၢ်ဃ့ၢ်လီၤအဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့(၁)အိၣ်ခိးထုးပယီၤသုးခိၣ်အသိလ့ၣ်ဒီးမ့ၣ်ပိၢ်အဃိ ပယီၤသုးခိၣ်တဂၤဒီးအမါသံ၀ဲအသိးမၤန့ၢ်၀ဲကျိဖုၣ်တခိၣ်အဂ့ၢ်န့ၣ် KNU စံး၀ဲန့ၣ်လီၤႉ

ဖဲမဟါကၢာ် မုၢ်ဃ့ၢ်လီၤ ၃ နၣ်ရံၣ်တခီတဆၢကတီၢ်န့ၣ် ပယီၤသုးခိၣ်ဒီးအမါအသိလ့ၣ်လၢအိၣ်ဟဲထီၣ်လၢကၠဲၣ်ကီာ်ဆူပနွဲၢ်ကျါသုးကလၢၤအံၤအကတီၢ်န့ၣ် (KNLA)အိၣ်ခိးထုး၀ဲဒီးမ့ၣ်ပိၢ်ဖဲနိၣ်ဖးလဲၢ်သ၀ီဒီးတလၤအီဖိကျါသ၀ီအဘၢၣ်စၢၤအဂ့ၢ်န့ၣ် KNU သုးက့(၁)သုးခိၣ်တဂၤ ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်ဖဲမဟါ(လါအီးကထိဘၢၣ် ၂၅)သီအနံၤန့ၣ်လီၤႉ

အ၀ဲစံး၀ဲလၢ“ပမၤန့ၢ်တၢ်ကစီၣ်လီၤတံၢ်လီၤဆဲးအဃိ ပၦၤတဖၣ်လဲၤအိၣ်ခိးထုး၀ဲဒီးပိချံးမီၤနီၤႉ ဖဲန့ၣ်သုးခိၣ်ဒိၣ်ဖိတဂၤန့ၣ်သံ၀ဲတဘျီဃီလီၤႉ မ့မ့ၢ်အမါန့ၣ်ပနၢ်ဟူက့ၤလၢၦၤလဲၤဆှၢလၢတၢ်ဆါဟံၣ်ဘျီမးအသံလီၤႉ ပဟံးန့ၢ်၀ဲကျိဖုၣ်တခိၣ်လၢသုးခိၣ်တဂၤန့ၣ်ဖီၣ်၀ဲမီၤနီၤ”အဂ့ၢ်န့ၣ် စံး၀ဲန့ၣ်လီၤႉ

တၢ်ကဲထီၣ်သး၀ံၤအလီၢ်ခံ ပယီၤသုးအါအါဂီၢ်ဂီၢ်ဟဲတုၤ၀ဲဖဲတၢ်ကဲထီၣ်သးအလီၢ်န့ၣ်ဒီး ခးနါစိၤကျိဖးဒိၣ်ဖဲတၢ်လီၢ်အကပိၤကပၤဖဲန့ၣ်အဂ့ၢ်န့ၣ် KNU သုးခိၣ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

ဖဲအပူၤကွံာ်(လါအီးကထိဘၢၣ် ၂၄)သီအနံၤစ့ၢ်ကီး ဟီၣ်က၀ီၤဖဲန့ၣ်အပူၤ(KNLA)ဒီးပယီၤသုးတဖၣ်အဘၢၣ်စၢၤ တၢ်ခးလိာ်သးကဲထီၣ်ဒံး၀ဲ(၅)ဘျီဒီး ဖဲန့ၣ်ပယီၤသုးတကပၤသံ(၁၄)ဂၤႇဘၣ်ဒိ(၉)ဂၤအဂ့ၢ်န့ၣ် KNU ဒူသထူၣ်ကီၢ်ရ့ၣ်တကပၤ ထုးထီၣ်ပာ်ဖျါ၀ဲန့ၣ်လီၤႉ