လၢၢ်မုၢ်လါကီၢ်ဆၣ်ပူၤ ခီဖျိပယီၤသုးဒီး(PDF)အဘၢၣ်စၢၤတၢ်ခးလိာ်သးကဲထီၣ်အဃိ လီၢ်က၀ီၤဖိလၢအဃ့ၢ်မှံဟးဖျိးတဖၣ်က့ၤလၢဟံၣ်တဘူၣ်ဒံးဘၣ်

လါအီးကထိဘၢၣ် ၂၆ သီႇ ၂၀၂၁ နံၣ်ႇ ခ့ၣ်အဲးစံၣ်

ဘျံးဒ၀ဲၢ်ကီၢ်ရ့ၣ် လၢၢ်မုၢ်လါကီၢ်ဆၣ် မံကၠီသ့းဒီးခၠီလၣ်သ၀ီအဘၢၣ်စၢၤ ဖဲအပူၤကွံာ်လါအီးကထိဘၢၣ် ၂၂ သီ ဒီး ၂၃ သီအနံၤ ခီဖျိပယီၤသုးဒီးတၢ်ဒီသဒၢကမျၢၢ်သုးမုၢ်(PRDF)တဖၣ်အဘၢၣ်စၢၤတၢ်ဒုးကဲထီၣ်အဃိ လီၢ်က၀ီၤဖိလၢအဃ့ၢ်မှံဟးဖျိးသ့ၣ်တဖၣ်တုၤလၢခဲအံၤတစု တက့ၤဘၣ်လၢအဟံၣ်အဃီဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

ဘၣ်ထွဲဒီး(PDF)ကရူၢ်မၤန့ၢ်ကျိလၢဂၢၤကီၢ်သုးတဖၣ်အအိၣ်တၢ်ဂ့ၢ်အံၤ ခီဖျိပယီၤသုးဂံၢ်ဘါဟဲနုာ်လီၤ ၀ဲအါအါဂီၢ်ဂီၢ်အဃိ ခံခီခံကပၤတၢ်ခးလိာ်သးကဲထီၣ်ဒီး ဖဲန့ၣ်လီၢ်က၀ီၤသ၀ီဖိလၢအကယၤဘၣ်ဃ့ၢ်မှံဟးဖျိး၀ဲဒၣ်န့ၣ််လီၤႉ

“လၢမံကၠီသ့းသ၀ီန့ၣ်ၦၤစံၣ်အိၣ်ခူသူၣ်လၢတၢ်ချၢကအိၣ်အဂၤ(၅၀၀)ဃၣ်ဃၣ်ညါႉ ၦၤအိၣ်တ့ၢ်လၢသ၀ီပူၤ(၄၀၀) ဘျဲၣ်အံၤအိၣ်ဖှိၣ်၀ဲလၢသီခါဖၠၣ်လီၤႉ မ့မ့ၢ်ခၠီလၣ်သ၀ီန့ၣ်အိၣ်ဖှိၣ်၀ဲဖဲသီခါဖၠၣ်န့ၣ်(၁၅၀)ဂၤညါလီၤႉ မ့မ့ၢ်ၦၤစံၣ်ထီၣ်လၢသ၀ီချၢန့ၣ်တသ့ၣ်ညါစရီလီၤတံၢ်လီၤဆဲးဒံးဘၣ်ႉ ၦၤခဲလၢာ်န့ၣ်က့ၤဟံၣ်တဘူၣ်ဒံးဘၣ်ႉ ဘၣ်မနုၤအဃိလဲၣ်န့ၣ်ဘၣ်ယိၣ်၀ဲလၢပယီၤကဖီၣ်မၤဒၢၣ်အ၀ဲသ့ၣ်လီၤ”အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံးဘၣ်ခ့ၣ်အဲးစံၣ်န့ၣ်လီၤႉ

မံကၠီသ့းသ၀ီလၢသ၀ီဖိဟးဃ့ၢ်အိၣ်ခူသူၣ်၀ဲအံၤ ဟံၣ်ခိၣ်ကအိၣ်၀ဲအဖျၢၣ်(၂၀၀)ဃၣ်ဃၣ်ဒီး မ့မ့ၢ်ခၠီလၣ်သ၀ီန့ၣ်ဟံၣ်အိၣ်၀ဲ(၄၀)ဘျဲၣ်ဒီးတကီၢ်ခါခဲအံၤၦၤလၢအဃ့ၢ်အိၣ်ခူသူၣ်လၢၦၢ်ပူၤတနီၤဟဲက့ၤလၢဟံၣ်တဘူၣ်ဒံးဘၣ်ဒီးလၢတၢ်အိၣ်တၢ်ဆိးတၢ်အီၣ်တၢ်အီအဂီၢ်တၢ်ကီတၢ်ခဲအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဖဲအပူၤကွံာ်(လါအီးကထိဘၢၣ် ၂၂)သီ ဟါခီ ၄ နၣ်ရံၣ်ဃၣ်ဃၣ်အဆၢကတီၢ်န့ၣ် တၢ်ခးလိာ်သးကဲထီၣ်လၢခၠီလၣ်သ၀ီပူၤ၀ံၤ မုၢ်ဆ့ၣ်ထီၣ်တနံၤ ၂၃ သီ မုၢ်နၤခီ ၉ နၣ်ရံၣ်အဆၢကတီၢ် တၢ်ခးလိာ်သးကဲထီၣ်ကဒီး၀ဲဒီး ပယီၤသုးလၢအဟဲတလၢဟီၣ်က၀ီၤတၢ်ပာ်ပနီၣ်လီၢ်သ့ၣ်တဖၣ် ခီဖျိလီၢ်က၀ီၤ(PRDF)အိၣ်ခိးထုး၀ဲဒီးမ့ၣ်ပိၢ်အဃိ ပယီၤသုးတကပၤသံဘၣ်ဒိတစှၤန့ၢ်ဒံး(၁၈)ဂၤဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

“ပယီၤသုးဟဲထီၣ်အံၤဘၣ်ထွဲဒီးတၢ်ဟံကျိတၢ်ဂ့ၢ်အဃိ ဟဲတလၢ၀ဲၦၤဟီၣ်က၀ီၤဒီးတၢ်ကဲထီၣ်သးလီၤႉ ပယီၤသုးတကပၤသံ(၁၈)ဂၤညါလီၤႉ တၢ်ထုးအ၀ဲသ့ၣ်ဒီးမ့ၣ်ပိၢ်ခံဖျၢၣ်ႉ ဘၣ်ဆၣ်မ့ၢ်အဘၣ်ဒိဘၣ်ထံးၦဲၤ ဂၤလဲၣ်ဒုတသ့ၣ်ညါလီၤတံၢ်ဒံးဘၣ်ႉ ခီဖျိက့ၤစိာ်ဟုၣ်ၦၤသံအစိၣ်လၢမုၢ်နၤခီအဃိ မတၤတဂၤမးတသ့ၣ်ညါလီၤတံၢ်ဘၣ်ႉ ဘၣ်ဆၣ်ဖဲ(PDF)ထီၣ်ရှဲ၀ဲတၢ်လီၢ်န့ၣ် ထံၣ်၀ဲၦၤသံစိၣ်(၁၈)စိၣ်လီၤ”အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

လၢန့ၣ်အမဲာ်ညါပယီၤသုးတဲပျံၤလီၢ်က၀ီၤသ၀ီဖိတဖၣ်လၢမ့တန့ၢ်က့ၤကျိလၢ(PDF)ဟံ၀ဲတဖၣ်ဘၣ်န့ၣ် ကနီဟးထီၣ်ကွံာ်၀သီဖိလၢသ၀ီပူၤအိၣ်၀ဲဒီး ခီဖျိတၢ်ခးလိာ်သးကဲထီၣ်အခါ ပယီၤသုးတကပၤသံဘၣ်ဒိအါအဃိ က့ၤဂုၤကဒါအလီၢ်ခံတစိၢ်တလီၢ်ဒီး တၢ်အိၣ်သးအိၣ်လၢတၢ်ဖ့ၣ်ဆၢအံၤအိၣ်ဒံး၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဖဲအပူၤကွံာ်(လါအီးကထိဘၢၣ် ၂၁)သီအနံၤစ့ၢ်ကီး လီၢ်က၀ီၤ(PDF)ကရူၢ်တဖၣ် နုာ်လီၤဖီၣ်၀ဲမံကၠီသ့းသ၀ီပူၤဂၢၤကီၢ်သုးတဖၣ်ဒီးလီၢ်က၀ီၤသ၀ီၦၤဘၣ်မူဘၣ်ဒါ(၁၂)ဂၤဒီး မၤန့ၢ်၀ဲကျိ(၆)ခိၣ်လၢဂၢၤကီၢ်သုးအအိၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ကစီၣ်အအိၣ်န့ၣ်လီၤႉ