Home တၢ်ကစီၣ် ကီၢ်စဲၣ်ကိတိာ်ခိၣ်ကျၢၢ်နါခ့ၤထွ့မၠ့ၣ်ဒီး ကီၢ်စဲၣ်ကိတိာ်အူသါနဲၤ တၢ်စံၣ်ညီၣ်လၢကဘၣ်လီၤဃိာ်ပူၤလၢနံၣ်ယံၤ

ကီၢ်စဲၣ်ကိတိာ်ခိၣ်ကျၢၢ်နါခ့ၤထွ့မၠ့ၣ်ဒီး ကီၢ်စဲၣ်ကိတိာ်အူသါနဲၤ တၢ်စံၣ်ညီၣ်လၢကဘၣ်လီၤဃိာ်ပူၤလၢနံၣ်ယံၤ

1456
0
Photo_Ka Hsaw Wah

လါနိၣ်၀့ဘၢၣ် ၁၀ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲတလါအံၤလါနိၣ်၀့ဘၢၣ် ၉ သီအနံၤ ဖၣ်အၣ်၀့ၢ် ကွီၢ်ဘျီၣ်လီၤဆီီစံၣ်ညီၣ်၀ဲလၢကညီကီၢ်စဲၣ်ကိတိာ်ခိၣ်ကျၢၢ်နါခ့ၤထွ့မၠ့ၣ်အံၤ ကဘၣ်လီၤဃိာ်ပူၤ(၇၅)နံၣ်လၢကွီၢ်မ့ၣ်(၅)ခါဒီး တၢ်တိာ်ကျဲၤႇကျိၣ်စ့ဒီးတၢ်ပၢဆှၢရဲၣ်ကျဲၤခူ၀့ၢ်၀ဲၤကျိၤကိတိာ်အူသါနဲၤကဘၣ်လီၤလၢဃိာ်ပူၤအနံၣ်(၉၀)အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကိတိာ်ခိၣ်ကျၢၢ်နါခ့ၤထွ့မၠ့ၣ်လၢပယီၤသုးကီၣ်ကးလိာ်ဘၢလိာ်ကွီၢ်၀ဲလၢအအီၣ်ခိၣ်ဖးလာ်ဆှိးကွီၢ်မ့ၣ်အံၤ လၢကွီၢ်မ့ၣ်တခါစုာ်စုာ်အဂီၢ်ဘၣ်လီၤ၀ဲလၢဃိာ်ပူၤ(၁၅)နံၣ်ဒီး ကွီၢ်မ့ၣ်ပာ်ဖှိၣ်ခဲလၢာ်(၅)ခါဘၣ်လီၤ၀ဲလၢဃိာ်ပူၤ(၇၅)နံၣ်န့ၣ်လီၤႉ မ့မ့ၢ်အူသါနဲၣ်အကွီၢ်မ့ၣ်အဂီၢ်ဘၣ်လီၤ၀ဲဃိာ်ပူၤ(၁၅)နံၣ်ဒီးကွီၢ်မ့ၣ်ခဲလၢာ်(၆)ခါဘၣ်လီၤ၀ဲဃိာ်ပူၤအနံၣ်(၉၀)အဂ့ၢ်န့ၣ် ပီၢ်ရီအူစီၣ်မ့လဲၤလၢအမၤစၢၤ၀ဲတၢ်မူးတၢ်ရၢ်အံၤ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

“ကိတိာ်ခိၣ်ကျၢၢ်အကွီၢ်မ့ၣ်န့ၣ်မ့ၢ်၀ဲတၢ်အီၣ်ခိၣ်ဖးလာ်ဆှိးကွီၢ်မ့ၣ်ခဲလၢာ်(၅)ခါ မ့မ့ၢ်လၢတၢ်ပၢဆှၢရဲၣ်ကျဲၤခူ၀့ၢ်၀ဲၤကျိၤကိတိာ်အူသါနဲၤန့ၣ်ကွီၢ်မ့ၣ်ခဲလၢာ်အိၣ်၀ဲ(၆)ခါလီၤႉ ကညီကီၢ်စဲၣ်ဃိာ်ပူၤဘျီၣ်ဒိၣ်စံၣ်ညီၣ်ကွီၢ်ဘျီၣ်ရူစံၣ်ညီၣ်လီၤ၀ဲကွီၢ်မ့ၣ်(၁)ခါန့ၣ်ဘၣ်လီၤလၢဃိာ်ပူၤ(၁၅)နံၣ်ဒီး ကိတိာ်ခိၣ်ကျၢၢ်အဂီၢ်ကွီၢ်မ့ၣ်ခဲလၢာ်(၅)ခါဘၣ်လီၤလၢဃိာ်ပူၤ(၇၅)နံၣ်ႇ မ့မ့ၢ်လၢတၢ်ပၢဆှၢရဲၣ်ကျဲၤခူ၀့ၢ်၀ဲၤကျိၤကိတိာ်အူသါနဲၤကွီၢ်မ့ၣ်(၆)ခါအဂီၢ်ဘၣ်လီၤ၀ဲလၢဃိာ်ပူၤအနံၣ်(၉၀)လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ကိတိာ်ခိၣ်ကျၢၢ်ဒီးတၢ်ပၢဆှၢရဲၣ်ကျဲၤခူ၀့ၢ်၀ဲၤကျိၤကိတိာ်(၂)ဂၤအံၤ တဂၤစုာ်စုာ်န့ၣ်တၢ်လိာ်ကွီၢ်၀ဲလၢတၢ်အီၣ်ခိၣ်ဖး လာ်ဆှိးကွီၢ်မ့ၣ်(၃)ခါဒီး တၢ်လိာ်ကွီၢ်၀ဲကိတိာ်ခိၣ်ကျၢၢ်လၢကွီၢ်မ့ၣ်တခါဒီး တၢ်ပၢဆှၢရဲၣ်ကျဲၤခူ၀့ၢ်၀ဲၤကျိၤကိတိာ်န့ၣ်ကွီၢ်မ့ၣ်(၂)ခါန့ၣ်လီၤႉ ခီဖျိတၢ်လိာ်ကွီၢ်၀ဲပာ်ဖှိၣ်ခံဂၤလၢာ်ကွီၢ်မ့ၣ်(၄)ခါအဃိ ကွီၢ်မ့ၣ်ပာ်ဖှိၣ်ခဲလၢာ်(၇)ခါအံၤ ကီၢ်စဲၣ်ကိတိာ်ခိၣ်ကျၢၢ်အဂီၢ်ကွီၢ်မ့ၣ်ကဲထီၣ်က့ၤ၀ဲ(၅)ခါဒီး တၢ်ပၢဆှၢရဲၣ်ကျဲၤခူ၀့ၢ်၀ဲၤကျိၤကိတိာ်အဂီၢ်ကွီၢ်မ့ၣ်ကဲထီၣ်က့ၤ၀ဲ(၆)ခါဒီး ကွီၢ်မ့ၣ်တခါစုာ်စုာ်အဂီၢ်တၢ်စံၣ်ညီၣ်ဆၢတဲာ်လီၤလၢကဘၣ်လီၤလၢဃိာ်ပူၤ(၁၅)နံၣ်န့ၣ်လီၤႉ

ဖဲအပူၤကွံာ်န့ၣ်ပယီၤသုးကီၣ်ကးထုးထီၣ်ပာ်ဖျါ၀ဲလၢ အ၀ဲသ့ၣ်ခံဂၤအံၤ ဒ်တၢ်အီၣ်ခိၣ်ဖးလာ်ဆှိးခီၣ်မံရှၢၣ်သမံသမိးအိၣ်ဖျါ၀ဲအသိးန့ၣ် ဖၣ်အိၣ်၀့ၢ်ႇကါနါလါကဖျါဃံဖျါလၤဒီး တၢ်ဂုၤထီၣ်ပသီထီၣ်တၢ်တိာ်ကျဲၤလၢတၢ်တဘၣ်ပျဲဟ့ၣ်အခွဲးလၢနီၢ်တဂၤအခီပနံၣ်ဘၣ်အံၤ ထုးထီၣ်န့ၢ်၀ဲဟီၣ်ခိၣ်လံာ်အုၣ်သးအဃိ ဟီၣ်ခိၣ်လၢထံကီၢ်ပၢ၀ဲအံၤဆှူ၀ဲဒီး ဘၣ်ဒိဘၣ်ထံး၀ဲဒၣ်ထံကီၢ်စ့တၢးစ့(၅ႇ၃၈၀)ကကွဲၢ်ဘျဲၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါ ဖဲအပူၤကွံာ် ၂၀၁၈ႇ လါမ့ၤ ၁၄ သီတုၤလၢ ၂၀၂၁ႇ လါယနူၤအါရံၤ ၃၁ သီအနံၤန့ၣ် ဟ့ၣ််ထီၣ်တၢ်ဂ့ၢ်လၢလီၢ်က၀ီၤတၢ်ဂုၤထီၣ်ပသီထီၣ်ဒီး စ့ပာ်ကီာ်လၢတၢ်ထၢ၀ဲလၢမုၢ်ကျိၤ၀ဲၤကွာ်တၢ်ဖံးတၢ်မၤလီၢ်အအိၣ်သ့ၣ်တဖၣ်အံၤ တဆှၢနုာ်၀ဲဆူထံကီၢ်ကျိၣ်စ့စရီပူၤဘၣ်ဒီး အိးထီၣ်၀ဲစ့စရီလၢနီၢ်တဂၤစ့တၢးတဖၣ်အပူၤလီၤလီၤဆီဆီဒီး ဟံးန့ၢ်၀ဲစ့(၉ႇ၆၉၇)ကကွဲၢ်ဘျဲၣ်အဂ့ၢ်ႇထံကီၢ်စ့တၢးစ့ဒီးလီၢ်က၀ီၤတၢ်ဂုၤထီၣ်ပသီထီၣ်စ့ပာ်ကီၤ(အကလီၢ် ၇ႇ၄၂၅)ကၠးအံၤထုးထီၣ်ဟ့ၣ်လိၢ်၀ဲၦၤ(၁၉)ဂၤအဂ့ၢ်၊ လၢတၢ်ကသူၣ်ထီၣ်တၢ်ဆါတၢ်ဖိတၢ်လံၤလီၢ်လၢအပတီၢ်ထီအဂီၢ် တၢ်ဖံးတၢ်မၤလၢတၢ်ဆဲးစုပနီၣ်တအိၣ်ဒံး၀ဲဘၣ်အံၤ တူၢ်လိာ်ဟံးန့ၢ်၀ဲစ့ခဲလၢာ်(၅၀၀၀)ကလီၢ်အိၣ်၀ဲအဂ့ၢ်န့ၣ် ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါ ကိတိာ်ခိၣ်ကျၢၢ်နါခ့ၤထွ့မၠ့ၣ်အံၤ ဖဲ ၂၀၁၇ နံၣ် လါယူၤလံအကတီၢ် ခီဖျိသိလ့ၣ်တၢ်ဘၣ်ဒိဘၣ်ထံးတၢ်ကဲထီၣ်သးအဃိ အခီၣ်ဒုၣ်သၣ်လၢအစ့ၣ်တကပၤကၢ်၀ဲဒီး ဖဲအလဲၤဘှီအသးလၢဖၣ်အၣ်၀့ၢ်ဒီး၀့ၢ်တကူၣ်၀့ၢ်တၢ်ဆါဟံၣ်အဆၢကတီၢ် သုးကီၣ်ကးလိာ်လၢလိာ်ကွီၢ်အီၤလၢ အဟံသူစ့(၁၆)ကကွဲၢ်ဘျဲၣ်လၢကီၢ်စဲၣ်တၢ်ဂုၤထီၣ်ပသီထီၣ်စ့ပာ်ကီာ်စရီအပူၤအဂ့ၢ်န့ၣ် တၢ်လိာ်ကွီၢ်ဃာ်၀ဲန့ၣ်လီၤႉ

ဒ်န့ၣ်အသိးတၢ်ပၢဆှၢရဲၣ်ကျဲၤခူ၀့ၢ်၀ဲၤကျိၤကိတိာ်အူသါနဲၤအံၤ ဖဲ(၂၀၁၈)နံၣ် လါမးရှးအတီၢ်ပူၤန့ၣ် အ၀ဲလဲၤလၢကီၢ်ကၠီၣ်တဲၣ်ႇဘီကီး၀့ၢ် လဲၤကွဲးကါ၀ဲအပျိၢ်ဃံအခါ သုးကီၣ်ကးထုးထီၣ်ပာ်ဖျါ၀ဲလၢ အဟံးန့ၢ်၀ဲစ့ဒီၣ်လၣ်(၁၀ႇ၀၀၀)လၢၦၤမၤမုၢ်ကျိၤ၀ဲၤကွာ်ဖိတဂၤအအိၣ်အဂ့ၢ်ႇဖဲ(၂၀၂၀)နံၣ် လါအီးကထိဘၢၣ်အခါ တၢ်ဟးကရၢကရိတၢ်ဖးတၢ်လၢာ်ဘူၣ်လၢာ်စ့တဖၣ်အဂီၢ်ဟံးန့ၢ်၀ဲစ့အကလီၢ်(၅၀)လၢၦၤမၤမုၢ်ကျိၤ၀ဲၤကွာ်ဖိတဂၤ အအိၣ်အဂ့ၢ်န့ၣ်လီၤႉ

တၢ်စံၣ်ညီၣ်ဆၢတဲာ်လီၤ၀ဲကွီၢ်မ့ၣ်တဂၤစုာ်စုာ်(၃)ခါလၢအမ့ၢ်ကွီၢ်မ့ၣ်သဲစးနီၣ်ဂံၢ်(၅)(၆)(၇)အဂီၢ် ကီၢ်စဲၣ်ဘျီၣ်ဒိၣ်စံၣ်ညီၣ်ကွီၢ်ဒီၣ်ခ့ၤစွ့ၤထိစံၣ်ညီၣ်ဆၢတဲာ်လီၤ၀ဲန့ၣ်လီၤႉ မ့မ့ၢ်ခံဂၤလၢာ်ကွီၢ်မ့ၣ်သဲစးနီၣ်ဂံၢ်(၁)(၂)(၃)(၄)အဂီၢ် ကီၢ်စဲၣ်စံၣ်ညီၣ်ဘျီၣ်ဒိၣ်စံၣ်ညီၣ်ကွီၢ်ဒီၣ်ခ့ၣ်စ့၀့စံၣ်ညီၣ်ဆၢတဲာ်လီၤ၀ဲအဂ့ၢ်န့ၣ် သ့ၣ်ညါဘၣ်လၢပီၢ်ရီအအိၣ်န့ၣ်လီၤႉ

ဖဲလါဖ့ၤဘြူၤအါရံၤ ၁ သီ သုးဟံးန့ၢ်တၢ်စိတၢ်ကမီၤအခါန့ၣ် တၢ်လဲၤဖီၣ်၀ဲကညီကီၢ်စဲၣ်ကိတိာ်ခိၣ်ကျၢၢ် နါခ့ၤထွ့မၠ့ၣ်ဒီး ဖဲလါဖ့ၤဘြူၤအါရံၤ ၂ သီအနံၤ တၢ်ပျၢ်လီၤက့ၤအီၤဒီးတၢ်ဒုးဃာ်အီၤလၢဟံၣ်ပူၤ၀ံၤအလီၢ်ခံ ဖဲလါဖ့ၤဘြူၤအါရံၤ ၈ သီအနံၤ တၢ်က့ၤဖီၣ်ကဒီးအီၤအသီတဘျီဒီး ဖဲလါမ့ၤ ၃၀ သီအနံၤ အ၀ဲသ့ၣ်ခံဂၤအံၤတၢ်စံၣ်ညီၣ်လီၤ၀ဲလၢကဘၣ်ဘၣ်လီၤလၢဃိာ်ပူၤ(၂)နံၣ််လၢတၢ်မၤဟးဂီၤထံကီၢ်သူးသ့ၣ်လၤကပီၤကွီၢ်မ့ၣ်သဲစးနီၣ်ဂံၢ်(၅၀၅-ခ)ဒီး တကီၢ်ခါခဲအံၤကိတိာ်ခိၣ်ကျၢၢ်အံၤလီၤဘၣ်လၢဃိာ်ပူၤ(၇၇)နံၣ်ဒီး တၢ်ပၢဆှၢရဲၣ်ကျဲၤခူ၀့ၢ်၀ဲၤကျိၤကိတိာ်လီၤဘၣ်၀ဲဃိာ်ပူၤ(၉၂)နံၣ်စုာ်စုာ်န့ၣ်လီၤႉ