လါနိၣ်၀့ဘၢၣ် ၅ သီႇ ၂၀၂၁ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ််စၢဖှိၣ်ကရၢတၢ်ပၢဟီၣ်က၀ီၤသုးက့(၅)ဘ့ၣ်အပူၤ ဖဲအပူၤကွံာ်လါအီးကထိဘၢၣ်ဒီတလါအတီၢ်ပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇ ကညီဂၢၤသးကရၢ(KNDO)ဒီးပယီၤသုးႇသုးခိးကီၢ်ဆၢ(BGF)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်၀ဲ(၂၇၅)ဘျီဒီး ပယီၤသုးတကပၤသံ(၂၇၁)ဂၤႇဘၣ်ဒိ(၂၆၆)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲတနံၤအံၤလါနိၣ်၀့ဘၢၣ် ၅ သီအနံၤန့ၣ်လီၤႉ
ခ့ၣ်အဲၣ်ယူၣ်သုးက့(၇)ဘ့ၣ်အကျါ လၢသုးက့(၁)ဒူသထူၣ်ကီၢ်ရ့ၣ်ႇသုးက့(၂)တီအူကီၢ်ရ့ၣ်ႇ သုးက့(၃)ချၢၣ်လွံၢ်ထူၣ်ကီၢ်ရ့ၣ်ႇသုးက့(၅)မုၢ်တြီၢ်ကီၢ်ရ့ၣ်ဒီးသုးက့(၆)ဒူပျာ်ယာ်ကီၢ်ရ့ၣ်ဟီၣ်က၀ီၤတဖၣ်အပူၤတၢ်ဒုးကဲထီၣ်၀ဲဒီး ဖဲန့ၣ်အကျါလၢခ့ၣ်အဲၣ်ယူၣ်သုးက့(၅)ဟီၣ်က၀ီၤအပူၤန့ၣ်တၢ်ဒုးကဲထီၣ်အါကတၢၢ်ဒီး ပယီၤသုးတကပၤသံဘၣ်ဒိဘၣ်ထံးအိၣ်အါကတၢၢ်လီၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
ပယီၤသုးသံတဖၣ်အကျါပၣ်ဃုာ်၀ဲဒၣ်ဒီးသုးရ့ၣ်ခိၣ်တဂၤႇသုးဒ့ခိၣ်တဂၤႇသုးခိၣ်ဒိၣ်ဖိတဂၤႇသုးခိၣ်စိတဂၤႇသုးခိၣ်တဂၤဒီး လၢအဘၣ်ဒိ(၂၆၆)ဂၤအကျါပၣ်ဃုာ်၀ဲဒီးသုးရ့ၣ်ခိၣ်(၂)တဂၤႇသုးခိၣ်ဒိၣ်ဂီၢ်ဂ့ၢ်တဂၤႇသုးစကီၤတဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
မ့မ့ၢ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဂၢၤသးကရၢ(KNDO)တကပၤန့ၣ် သံ၀ဲ(၂)ဂၤဒီးဘၣ်ဒိ၀ဲ(၂၀)ဂၤအဂ့ၢ်န့ၣ် KNU စံး၀ဲန့ၣ်လီၤႉ
ဖဲအပူၤကွံာ်(လါစဲးပထ့ဘၢၣ် ၂၇)သီအနံၤ ပယီၤသုးမီၤစိရိၤဘိးဘၣ်ရၤလီၤ၀ဲလၢစးထီၣ်ဖဲ(၂၀၂၁)နံၣ် လါအီးကထိဘၢၣ် ၁ သီတုၤလၢ(၂၀၂၂)နံၣ် လါဖ့ၤဘြူၤအါရံၤ ၂၈ သီအနံၤ ကဆိကတီၢ်ဃာ်၀ဲတၢ်ဒုးတၢ်ယၤလၢယဲၢ်လါအတီၢ်ပူၤန့ၣ်လီၤႉ
