Home တၢ်ကစီၣ် ဘံလ့ကီၢ်ဆၣ်အပူၤ ပယီၤသုးမၤသံလီၢ်က၀ီၤပိာ်မုၣ်တဂၤ

ဘံလ့ကီၢ်ဆၣ်အပူၤ ပယီၤသုးမၤသံလီၢ်က၀ီၤပိာ်မုၣ်တဂၤ

574
0
Photo: CJ

လါဒံၣ်စ့ဘၢၣ် ၂၄ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲလါဒံၣ်စ့ဘၢၣ် ၂၁ သီ ဂီၤခီအဆၢကတီၢ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် ဘံလ့ကီၢ်ဆၣ် သုးက့(၁)ဟီၣ်က၀ီၤ နိၣ်ဘၢၣ်ဘီသ၀ီကရူၢ်အပူၤ တၢ်မၤသံ၀ဲထီးကျီးခံသ၀ီဖိ ပိာ်မုၣ်တဂၤလၢအအိၣ်ဖဲကျီးအခါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

ဖဲအပူၤကွံာ်လါဒံၣ်စ့ဘၢၣ် ၂၁ သီအနံၤ ဖဲပယီၤသုးတြိၤ(၂၂)စုဒုၣ်တီၤအဖီလာ်(ခမရ-၁၀၁)ဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် ကဟဲက့ၤနုာ်လီၤလၢယိၤကျါ(BGF)သုးကလၢၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့ ၁ မၤန့ၢ်၀ဲအံၤ ဖဲအဟဲတုၤလၢထီးကျီးခံသ၀ီအဆၢကတီၢ် တၢ်ခးလိာ်သးကဲထီၣ်၀ဲဒီးဟီၣ်က၀ီၤ(KNLA)အၦၤတဖၣ်ကအိၣ်တခီနၣ်ရံၣ်ဃၣ်ဃၣ်န့ၣ်လီၤႉ

တၢ်ခးလိာ်သးကဲထီၣ်၀ံၤအလီၢ်ခံ ဖီၣ်ဒီးမၤသံ၀ဲဒၣ်နီၢ်ခံး(၅၆)နံၣ်လၢအအိၣ်ဖဲကျီးပူၤလၢ တၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ

“လီၢ်က၀ီၤကညီသုးနုာ်လီၤအိၣ်ဘှံးသွီလီတဲစိအဂံၢ်လၢအဒဲပူၤဒုအိၣ်မီၤနီၤႉ ပယီၤသုးဟဲဘျီကညီသုးဃ့ၢ်ထီၣ်၀ဲလီၤႉ ဖဲအ၀ဲသ့ၣ်ဃ့ၢ်ထီၣ်အကတီၢ်ပယီၤသုးထံၣ်ထွဲ၀ဲအဃိ ပယီၤသုးဟဲသမံသမိးသံကွၢ်၀ဲဒဲကစၢ်ပိာ်မုၣ်အံၤဒီး မ့ၢ်အစံးဆၢ၀ဲတဘၣ်ဘၣ်ခီဧါဒုတသ့ၣ်ညါဘၣ်ႇပယီၤသုးခးသံကွံာ်အီၤလီၤ”အဂ့ၢ်န့ၣ် လီၢ်က၀ီၤသ၀ီဖိစံးဘၣ်ခ့ၣ်အဲးစံၣ်န့ၣ်လီၤႉ

ပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်လၢအမၤသံ၀ဲနီၢ်ခံးလၢအအိၣ်ဖဲထီးကျီးခံသ၀ီပူၤအံၤ တကီၢ်ခါခဲအံၤအ၀ဲသ့ၣ်ဆီလီၤအသုးဖဲယိၤကျါသ၀ီပူၤအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ

ဖဲမဟါလါဒံၣ်စ့ဘၢၣ် ၂၃ သီအနံၤ ဒ်ကညီဂ့ၢ်၀ီခွဲးယာ်ကရူၢ်(KHRG)အတၢ်မၤနီၣ်မၤဃါထုးထီၣ်ပာ်ဖျါ၀ဲအသိးန့ၣ် နီၢ်ဃံလၢအမၤတၢ်မၤတပူၤဃီဒီးအ၀ၤအံၤ ပယီၤသုးဖီၣ်အီၤဒီးမၤဒၢၣ်မၤလီၤ၀ဲ၀ံၤမးမၤသံ၀ဲဒၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ

“တၢ်ဒုးကဲထီၣ်အခါန့ၣ်နီၢ်ခံးဒီးအ၀ၤအံၤနီၤဖးလိာ်သးဒီးဃ့ၢ်ထီၣ်၀ဲလီၤႉ (နစက)သုးတဖၣ်ဖီၣ်ချုး ၀ဲနီၢ်ဃံဒီးမၤဒၢၣ်မၤလီၤ၀ဲ၀ံၤလီၢ်ခံကတၢၢ်မၤသံကွံာ်၀ဲလီၤ”အဂ့ၢ်န့ၣ် KHRG ထုးထီၣ်ပာ်ဖျါ၀ဲန့ၣ်လီၤႉ

တကီၢ်ခါခဲအံၤနီၢ်ခံးအ၀ၤအံၤလဲၤလၢကျီးပူၤတဘူၣ်လၢၤဘၣ်အသိး အဟံၣ်ဖိဃီဖိလၢအအိၣ်တ့ၢ်သ့ၣ်တဖၣ်စ့ၢ်ကီးသဂၢၢ်ဘၣ်၀ဲဒီးတၢ်လုၢ်အီၣ်နီၢ်ခိသးသမူတၢ်ဂ့ၢ်ကီတဖၣ်အဂ့ၢ်န့ၣ် ကညီဂ့ၢ်၀ီခွဲးယာ်ကရူၢ်စံးအထီၣ်၀ဲန့ၣ်လီၤႉ

ဖဲအပူၤကွံာ်လါဒံၣ်စ့ဘၢၣ် ၁၇ သီအနံၤ KNLA အၦၤလဲၤထီၣ်မၤန့ၢ်ယိၤကျါ(BGF)သုးကလၢၤ၀ံၤအလီၢ်ခံ ဘံလ့ကီၢ်ဆၣ်ပူၤ တၤပီ(BGF)သုးကလၢၤဒီးလ့က့ၣ်(BGF)သုးကလၢၤတဖၣ်တၢ်မၤအါထီၣ်သုးဂံၢ်ဘါကွ့ၢ်ကွ့ၢ်အဂ့ၢ်န့ၣ် KNU ဒူသထူၣ်ကီၢ်ရ့ၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤထုးထီၣ်ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါဖဲအပူၤကွံာ်လါဒံၣ်စ့ဘၢၣ် ၁၉ သီအနံၤ ဖဲပနွဲၢ်ကျါသုးကလၢၤပယီၤသုး(စကခ-၈)သုးတဖၣ် ဟဲထီၣ်လၢတၤပီ(BGF)သုးကလၢၤအဆၢကတီၢ် (KNLA)အၦၤခိးခးအ၀ဲသ့ၣ်လၢတၢ်ဘၢၣ်စၢၤဒီး ဖဲန့ၣ်ပယီၤသုးသံ၀ဲ(၂)ဂၤႇဘၣ်ဒိ(၃)ဂၤအဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်လံာ်တၢ်ထုးထီၣ်ပာ်ဖျါအပူၤ ပာ်ဖျါ၀ဲန့ၣ်လီၤႉ