လါဒံၣ်စ့ဘၢၣ် ၂၄ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲမဟါလါဒံၣ်စ့ဘၢၣ် ၂၃ သီ မုၢ်နၤခီအဆၢကတီၢ် သုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်လၢမၠၣ်၀တံၣ် လ့က့ၣ်ကီာ်ဟီၣ်က၀ီၤဒီး ခးလီၤစ့ၢ်ကီးကျိဖးဒိၣ်အထံၣ်(၅၀)ဘျဲၣ်တပယူာ်ဃီန့ၣ်လီၤႉ
ဖဲမဟါလါဒံၣ်စ့ဘၢၣ် ၂၃ သီ မုၢ်နၤခီ ၁၀ နၣ်ရံၣ်တခီဃၣ်ဃၣ်အဆၢကတီၢ် ပယီၤသုးမီၤစိရိၤကဘီယူၤဟဲဆှၣ်တၢ်ကွံာ်လီၤ၀ဲမ့ၣ်ပိၢ်(၂)ဖျၢၣ်ဒီးတကတီၢ်ဃီခးလီၤစ့ၢ်ကီး၀ဲကျိဖးဒိၣ်အါအါဂီၢ်ဂီၢ်အဂ့ၢ်န့ၣ် လီၢ်က၀ီၤတၢ်ကစီၣ်ပာ်ဂၢၢ်ပာ်ကျၢၤစံး၀ဲအသိး သ့ၣ်ညါဘၣ်န့ၣ်လီၤႉ
“ဟဲကွံာ်လီၤမ့ၣ်ပိၢ်ဒီးကဘီယူၤန့ၣ် ၂ ဖျၢၣ်မီၤနီၤႉ လီၤတဲာ်၀ဲဒၣ်ဖဲထံလီၤဆှူဒီးထံကီာ်ထီၣ်ကစၢၢ်အဘၢၣ်စၢၤလီၤႉ တၢ်ဘၣ်ဒိဘၣ်ထံးခီဒုတအိၣ်ဘၣ်ႉ ၀ံၤဘျီန့ၣ်ခးလီၤ၀ဲဒီကျိဖးဒိၣ်တပယူၤဃီလီၤ”အဂ့ၢ်န့ၣ် ၦၤလၢအသ့ၣ်ညါတၢ်ကဲထီၣ်သးတဂၤ စံးဘၣ်ခ့ၣ်အဲးစံၣ်န့ၣ်လီၤႉ
လၢန့ၣ်အမဲာ်ညါပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် ခးလီၤကျိဖးဒိၣ်(၆၀-မမ)ႇ(၈၁-မမ)ႇ(၁၂၀-မမ)အဖျၢၣ်(၅၀)ဘျဲၣ်တပယူၤဃီလၢမဲၢ်ထီးတလ့ႇဖလူဖးဒိၣ်ႇထံမဲး၀ါခံဒီးယသ့ၣ်ကူၤသ၀ီတကပၤန့ၣ်လီၤႉ
ခီဖျိတၢ်ခးလီၤကျိဖးဒိၣ်အဃိ လီၢ်က၀ီၤအဟံၣ်တနီၤဟးဂူာ်ဟးဂီၤ၀ဲအသိး ဖလူဖိသ၀ီဖိတဖၣ်စ့ၢ်ကီးဘၣ်ဃ့ၢ်ထီၣ်၀ဲလၢကီၢ်ကၠီၣ်တဲၣ်တကပၤလၢမုၢ်နၤတၢ်ခံးဒီး ကၠီၣ်တဲၣ်သုးတဖၣ်လဲၤဆှၢအ၀ဲသ့ၣ်လၢတစိၢ်တလီၢ်ၦၤလီၢ်အိၣ်ကမှံအလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲမဟါတၢ်ဒုးကဲထီၣ်အပူၤခံခီခံကပၤသံဘၣ်ဒိဘၣ်ထံးဒီးကမျၢၢ်ထံဖိကီၢ်ဖိသံဘၣ်ဒိဘၣ်ထံးတၢ်အိၣ်သးခီန့ၣ် တၢ်ပာ်ဂၢၢ်ပာ်ကျၢၤ၀ဲတန့ၢ်ဒံးဘၣ်န့ၣ်လီၤႉ
ဒ်ပဒိးန့ၢ်ဘၣ်တၢ်ကစီၣ်လီၢ်ခံကတၢၢ်အသိး ဖဲတနံၤအံၤလါဒံၣ်စ့ဘၢၣ် ၂၄ သီ ဂီၤခီအဆၢကတီၢ် လၢကီးတရံးကီၢ်ဆၣ် ကီးနွဲၣ်သ၀ီတကပၤန့ၣ် တၢ်ခးလိာ်သးကဲထီၣ်ကဒီးစ့ၢ်ကီး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
