ကၠီၣ်တဲၣ်ပဒိၣ်ဆဲးန့ၢ်လီၢ်က၀ီၤဖိလၢအအိၣ်(KNU)တၢ်ပၢဟီၣ်က၀ီၤပူၤခိ၀ံၣ်ကသံၣ်ဒီသဒၢ

လါဒံၣ်စ့ဘၢၣ် ၂ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲတနံၤအံၤလါဒံၣ်စ့ဘၢၣ်ထီၣ် ၂ သီအနံၤ လီၢ်က၀ီၤကမျၢၢ်လၢအအိၣ်ဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ KNU-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤတဖၣ် ကီၢ်ကၠီၣ်တဲၣ်ပဒိၣ်လဲၤဆဲးန့ၢ်၀ဲခိ၀ံၣ်ကသံၣ်ဒီသဒၢန့ၣ်လီၤႉ

တၢ်ဆဲးန့ၢ်၀ဲကသံၣ်ဒီသဒၢအတၢ်ပညိၣ်မ့ၢ်၀ဲဒ်သိးတၢ်တြီဆၢဒီသဒၢတၢ်ဆါဘၣ်ကူဘၣ်ဂာ်လၢကီၢ်ဆၢကန့ၢ်အဂီၢ်ႇဒ်သိးဆါတၢ်ၦ့ၤတၢ်ကဘၣ်ဂီၢ်အဂီၢ်ဒီးမ့ဟဲကဲထီၣ်သးလၢဂ့ၢ်ဂီၢ်အူတၢ်အိၣ်ဆူၣ်အိၣ်ချ့န့ၣ် ကလဲၤကူစါယါဘျါသးလၢကၠီၣ်တဲၣ်တကပၤကသ့အဂီၢ် ဘၣ်တၢ်ဆဲးန့ၢ်၀ဲကသံၣ်ဒီသဒၢအံၤလီၤအဂ့ၢ်န့ၣ် ကၠီၣ်တဲၣ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

တၢ်ဆဲးကသံၣ်ဒီသဒၢတၢ်ရဲၣ်တၢ်ကျဲၤအံၤ တၢ်စးထီၣ်ဆဲး၀ဲဖဲတနံၤအံၤလၢကီၢ်ကၠီၣ်တဲၣ်မဲၢ်တရံးသူမှဲကျိကၢၢ်နံၤဒီး တိာ်ဃာ်ရဲၣ်ကျဲၤ၀ဲလၢကဆဲးကလီန့ၢ်၀ဲမဲၢ်တရံးထံ၀ၢ်ခီတကပၤသ၀ီလၢအမ့ၢ်ချၢၣ်ခိၣ်ႇချၢၣ်ကၤႇချၢၣ်ဒ့ဒီးမီီၤပဲၤခိၣ် သ၀ီဖိအဂၤ(၁၀၀၀)လၢအအိၣ်ဖဲ(KNU)တၢ်ပၢဟီၣ်က၀ီၤပူၤအဂ့ၢ်န့ၣ် မီၤပဲၤခိၣ်သ၀ီစံၣ်ညီၣ်ကွီၢ်စီၤနဲၤထူ စံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲ“မ့ဟဲထီၣ်လၢတၢ်ဆိးက့ဆါဘီမ့လဲၤထီၣ်တၢ်ဆါဟံၣ်လၢယိၤကီၢ်န့ၣ်မ့တဆဲးဘၣ်ခိ၀ံၣ်ကသံၣ်ဒီသဒၢဘၣ်န့ၣ်လဲၤတၢ်ဆါဟံၣ်တန့ၢ်ဘၣ်ႉ တၢ်ခွဲးတၢ်ယာ်ခီဒုကဆှူ၀ဲဖဲန့ၣ်တခါလီၤႉ တၢ်လ့ၢ်ထီၣ်လ့ၢ်လိၤၦၤတအိးထီၣ်ဒိၣ်ဒိၣ်မုၢ်မုၢ်ဒံးဘၣ်ႇနါက့ခီဒုဆဲးကသံၣ်ဒီသဒၢမ့၀ံၤန့ၣ် တၢ်နၢ်ပၢၢ်အီၤတဆံးတက့ၢ်ဖဲလဲၤၦ့ၤထီၣ်ၦ့ၤလီၤတၢ်အခါမီၤနီၤႉ ဒ်သိးယိၤကီၢ်တကပၤတၢ်ဆါသုတဟဲအါထီၣ်လၢၤတဂ့ၤဒီးလၢအံၤတကပၤသုတအါထီၣ်လၢၤတဂ့ၤအဂီၢ် ဘၣ်တၢ်ဆဲးန့ၢ်၀ဲဒ်အံၤလီၤႉ”အဂ့ၢ်န့ၣ် စံး၀ဲန့ၣ်လီၤႉ

ဘၣ်ထွဲဒီးတၢ်ဆဲးခိ၀ံၣ်ကသံၣ်ဒီသဒၢအံၤ ကီၢ်ကၠီၣ်တဲၣ်ဆူၣ်ချ့ကိတိာ်၀ဲၤကျိၤ အဆူၣ်ချ့ၦၤမၤတၢ်ဖိအကစၢ်ဒၣ်၀ဲဟဲဆဲးန့ၢ်၀ဲဒၣ်လီၤအဂ့ၢ်န့ၣ် မီၤပဲၤခိၣ်သ၀ီစံၣ်ညီကွီၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

လီၢ်က၀ီၤကမျၢၢ်လၢအအိၣ်ဖဲ(KNU)တၢ်ပၢဟီၣ်က၀ီၤအပူၤတဖၣ် ကီၢ်ကၠီၣ်တဲၣ်ပဒိၣ်ဟဲဆဲးန့ၢ်၀ဲကသံၣ်ဒီသဒၢတၢတဘျီအံၤမ့ၢ်၀ဲ(Sinopharm)ကသံၣ်ဒီး ကဘၣ်ဆဲးကဒီးခံဘျီတဘျီန့ၣ်ဖဲတလါအံၤလါဒံၣ်စ့ဘၢၣ် ၂၇ သီအနံၤအဂ့ၢ်န့ၣ် ၦၤဘၣ်မူဘၣ်ဒါစံး၀ဲန့ၣ်လီၤႉ

ဒ်န့ၣ်အသိးလၢမဲၢ်တၢ်ႇနိၤဘိႇမဲၢ်သ၀ီထံ၀ၢ်ခီလီၢ်က၀ီၤကမျၢၢ်လၢအအိၣ်ဖဲ(KNU)တၢ်ပၢဟီၣ်အပူၤတဖၣ်စ့ၢ်ကီး ကၠီၣ်တဲၣ်ပဒိၣ်ရဲၣ်ကျဲၤ၀ဲလၢကဆဲးန့ၢ်၀ဲခိ၀ံၣ်ကသံၣ်ဒီသဒၢအဂ့ၢ်န့ၣ် သ့ၣ်ညါဘၣ်န့ၣ်လီၤႉ