တၢ်ဒုးဆဲးကဲထီၣ်လၢလ့က့ၣ်ကီာ်၀့ၢ်သီႇဒူသ၀ီလီၢ်က၀ီၤဖိလၢအအိၣ်ဘူးဖဲန့ၣ်(၁၀၀၀)ဃၣ်ဃၣ်ဘၣ်ဃ့ၢ်မှံဟးဖျိး

လါဒံၣ်စ့ဘၢၣ် ၁၅ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲတနံၤအံၤလါဒံၣ်စ့ဘၢၣ် ၁၅ သီ ဟါခီ ၆ နၣ်ရံၣ်အဆၢကတီၢ်တၢ်ဒုးကဲထီၣ်ကဒီးဖဲလ့က့ၣ်ကီာ်၀့ၢ်သီပူၤဒီး ပယီၤသုးခးလီၤကျိဖးဒိၣ်တပယူာ်ဃီလၢကညီဖီၣ်စုက၀ဲၤအိၣ်တၢ်လီၢ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ခီဖျိတၢ်ဒုးဆဲးကဲထီၣ်အဃိ ကမျၢၢ်လၢအိၣ်လ့့က့ၣ်ကီာ်၀့ၢ်သီက၀ီၤဒ့ပူၤတဖၣ်ဒီး လီၢ်က၀ီၤဖိလၢအအိၣ်ဘူးဖဲန့ၣ်သ့ၣ်တဖၣ်အဂၤ(၁၀၀၀)ဃၣ်ဃၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကမျၢၢ်လၢအအိၣ်ဖဲလ့က့ၣ်ကီာ်၀့ၢ်သီက၀ီၤဒ့(၆)ဘ့ၣ်လၢာ်အပူၤတဖၣ်ဃုာ်ဒီးဖလူသ၀ီႇယသ့ၣ်ကူၤႇထံမဲး၀ါခံသ၀ီဖိတဖၣ် နီၤဖးလိာ်သးလဲၤအိၣ်၀ဲဒၣ်လၢသီခါဖၠၣ်ဒီးတၢ်ဘါယွၤသရိာ်တၢ်သူၣ်ထီၣ်အလီၢ်အဂ့ၢ်န့ၣ် လီၢ်က၀ီၤသးစၢ်တဖၣ်စံး၀ဲန့ၣ်လီၤႉ

“က၀ီၤဒ့ပူၤကမျၢၢ်တဖၣ်အါဒၣ်တက့ၢ်န့ၣ်လဲၤစံၣ်အိၣ်ခူသူၣ်၀ဲဒၣ်လၢတၢ်လီၢ်လၢအပူၤဖျဲးအလီၢ်လံန့ၣ်လီၤႉ အိၣ်တ့ၢ်ထဲတနီၤလီၤႉ ယၤဒီးယဒံၣ်သဖိသ့ၣ်တဖၣ်ဒုပတုၤလၢတၢ်လီၢ်လၢအပူၤဖျဲးအလီၢ်လံ”အဂ့ၢ်န့ၣ် လီၢ်က၀ီၤပိာ်မုၣ်တဂၤစံး၀ဲန့ၣ်လီၤႉ

ဖဲတနံၤအံၤ ၁၁ နၣ်ရံၣ်တခီအဆၢကတီၢ်စ့ၢ်ကီး ပယီီၤသုးကျိၤလၢအကဟဲသမံသမိးတၢ်လၢလ့က့ၣ်ကီာ်က၀ီၤဒ့(၆)တဖၣ်အံၤ ခီဖျိလဲၤတလၢ၀ဲကညီ ဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဂၢၤသးကရၢ(KNDO)သုးကလၢၤတၢ်လီၢ်အဃိ တၢ်ဒုးကဲထီၣ်၀ဲတစှၤန့ၢ်ဒံးတၢ်လီၢ်(၃)တီၤဘၣ်ညါန့ၣ်လီၤႉ

တၢ်ဒုးကဲထီၣ်ဘျီ၀ဲအံၤအပူၤပယီၤသုးတကပၤသံ၀ဲ(၆)ဂၤဒီးတၢ်ဖီၣ်ချုးသမူန့ၢ်၀ဲတစှၤန့ၢ်ဒံး(၈)ဂၤဘၣ်အဂ့ၢ်န့ၣ် သ့ၣ်ညါဘၣ်လၢၦၤလၢအဘူးဒီးကညီဖီၣ်စုက၀ဲၤကရူၢ်အအိၣ်ဘၣ်ဆၣ် ခ့ၣ်အဲးစံၣ်-ကညီတၢ်ကစီၣ်၀ဲၤလီၢ်ခိၣ်သ့ၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံးဘၣ်န့ၣ်လီၤႉ

ဖဲတနံၤအံၤမုၢ်ဃ့ၢ်လီၤန့ၣ် ပယီၤသုးလၢအဘၣ်ဒိလၢတၢ်ဒုးပူၤသ့ၣ်တဖၣ် သိလ့ၣ်တီၣ်ၦၤဆါ(၄)ခိၣ်က့ၤစိာ်အ၀ဲသ့ၣ်ဆူမၠၣ်၀တံၣ်၀့ၢ်တကပၤန့ၣ်လီၤႉ လၢန့ၣ်အမဲာ်ညါပယီၤသုးသိလ့ၣ်အခိၣ်(၁၀)ဃၣ်ဃၣ်ဟဲထီၣ်၀ဲလၢမဲၢ်ထီးသလ့ဒီးလ့က့ၣ်ကီာ်တကပၤအဂ့ၢ်န့ၣ် ၦၤလၢအထံၣ်၀ဲဒီးအမဲာ်တဖၣ်စံး၀ဲန့ၣ်လီၤႉ