လါဒံၣ်စ့ဘၢၣ် ၂၉ သီႇ ၂၀၂၁ နံၣ်ႇ ခ့ၣ်အဲးစံၣ်
တကီၢ်ခါတၢ်ကဲထီၣ်သးလၢသုးမီၤစိရိၤအသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA အဘၢၣ်စၢၤတၢ်ဒုးကဲထီၣ်၀ဲဒၣ်ဖဲလ့က့ၣ်ကီာ်ဟီၣ်က၀ီၤအဖီခိၣ်အံၤ ကညီတၢ်မုာ်တၢ်ခုၣ်ကီၣ်ကး(KNU/KNLA-PC)ဒီးတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)တဖၣ်တတူၢ်လိာ်၀ဲဘၣ်အဂ့ၢ်န့ၣ် စံး၀ဲဒၣ်န့ၣ်လီၤႉ
ဖဲစှၤသီအတီၢ်ပူၤအံၤ ပယီၤသုးမီၤစိရိၤမၤ၀ဲတၢ်ထီၣ်ဒုးလၢကဘီယူၤဖဲ(KNU)သုးက့ ၆ ဟီၣ်က၀ီၤပူၤအဖိခိၣ်အံၤ အ၀ဲသ့ၣ်တကပၤတူၢ်လိာ်၀ဲတသ့ဘၣ်အဂ့ၢ်န့ၣ် ကညီတၢ်မုာ်တၢ်ခုၣ်ကီၣ်ကးအနဲၣ်ရွဲၣ်သဃဲၤ သုးခိၣ်ဒိၣ်စိစီၤကၠီၤညိၣ်စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်တခါအံၤပတထံၣ်လၢအကြၢးဘၣ်မီၤနီၤႉ ပတအဲၣ်ဒိးဘၣ်ႇပထီဒါ၀ဲဒၣ်လီၤႉ တမံၤဂ့ၤတမၠိဂ့ၤသုးမီၤစိရိၤမၤတၢ်ဖံးတၢ်မၤသ့ၣ်တဖၣ်အံၤပတဆီၣ်ထွဲအ၀ဲသ့ၣ်ဘၣ်ႉ မ့မ့ၢ်လၢကညီဘၣ်တူၢ်ဘၣ်ကီၤတၢ်ခဲလၢာ်ခဲစ့ခီန့ၣ်ဒ်သိးဒီးပတူၢ်ဘၣ်ကီၤဘၣ်စ့ၢ်ကီးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
လၢန့ၣ်အမဲာ်ညါ ပတဆၢမုၢ်လၢ်လၢတၢ်ဒုးကကဲထီၣ်ဘၣ်ႇဘၣ်ဆၣ်မ့မ့ၢ်ကစၢ်ဂီၢ်တၢ်ဒီသဒၢဒု တၢ်ရဲၣ်တၢ်ကျဲၤလၢသုးတကပၤန့ၣ်အိၣ်၀ဲဒၣ်အသိး ပသုးဂ့ၢ်၀ီတၢ်မၤန့ၣ်ပတဲပၠးတသ့ခဲလၢာ်ဘၣ်ဒီး တမံၤဂ့ၤတမၠိဂ့ၤကညီဖီၣ်စုက၀ဲၤတၢ်ဃူတၢ်ဖိးကရၢကအိၣ်ဖှိၣ်ကတၢၣ်ပီၣ်တဲသကိးတၢ်ဒုတၢ်ရဲၣ်တၢ်ကျဲၤအိၣ်၀ဲအဂ့ၢ်န့ၣ် သုးခိၣ်ဒိၣ်စိစီၤကၠီၤညိၣ်စံးအါထီၣ်၀ဲဒၣ်န့ၣ်လီၤႉ
ဘၣ်ထွဲဒီးသုးမီၤစိရိၤအကဘီယူၤဟဲကွံာ်လီၤမ့ၣ်ပိၢ်လၢလ့က့ၣ်ကီာ်ဟီၣ်က၀ီၤတၢ်ဂ့ၢ်အံၤအဖီခိၣ် (DKBA)သုးရိၣ်မဲခိၣ်-၂ သုးခိၣ်ဒိၣ်ဖိ စီၤဖါဘျဲၣ်စ့ၢ်ကီးစံး၀ဲလၢ“လၢယၤတဂၤယတၢ်ထံၣ်ခီဒုတၢ်တခါအံၤလ့ၤတက့ၤတကြၢးဘၣ်မီၤနီၤႉ မ့မၤလၢဒုၣ်ဒါန့ၣ်တဘၣ်နီမံၤဘၣ်မီၤနီၤႇ ခဲအံၤမၤဘၣ်ဒိဘၣ်ထံး၀ဲဟံၣ်ဃီႇကမျၢၢ်ႇတၢ်ဖံးအီၣ်မၤအီၣ်လီၢ်ကျဲခီန့ၣ်ပတူၢ်လိာ်တသ့ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
တကီၢ်ခါခဲအံၤလ့က့ၣ်ကီာ်တၢ်ကဲထီၣ်သးတၢ်ဂ့ၢ်အမဲာ်ညါတၢ်ဒုးကဲထီၣ်လၢကညီကီၢ်စဲၣ်ပူၤဒီး လီၢ်က၀ီၤကညီကမျၢၢ်ထံဖိကီၢ်ဖိလၢအကလးဘၣ်ဃ့ၢ်မှံဟးဖျိး၀ဲအဖီခိၣ်အံၤ ထံၣ်ဘၣ်လၢ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢဒီးလီၢ်က၀ီၤဂံၢ်ခီၣ်ထံးတၢ်ကရၢကရိတဖၣ်ပဲာ်အၢပဲာ်သီ၀ဲတၢ်ဂ့ၢ်အံၤတဲာ်တဲာ်ဖျုဖျုဒီး ထုးထီၣ်ပာ်ဖျါ၀ဲလံာ်တၢ်ပာ်သးတဖၣ်အိၣ်၀ဲဒၣ်ဘၣ်ဆၣ် မ့မ့ၢ်လၢကညီဖီၣ်စုက၀ဲၤတၢ်ကရၢကရိလၢအဂၤတဖၣ် ထုးထီၣ်ပာ်ဖျါလံာ်လၢအဖိးသဲစးတအိၣ်၀ဲဘၣ်န့ၣ်လီၤႉ
စးထီၣ်ဖဲအပူၤကွံာ်လါဒံၣ်စ့ဘၢၣ် ၁၅ သီအနံၤ ပယီၤသုးဂံၢ်ဘါအါအါဂီၢ်ဂီၢ်နုာ်လီၤသမံသမိးတၢ်လၢလ့က့ၣ်ကီာ်ဟီၣ်က၀ီၤအပူၤတကးဒံးဘၣ်အမဲာ်ညါ ခီဖျိမၤ၀ဲတၢ်ထီၣ်ဒုးလၢကဘီယူၤဒီးခးလီၤစ့ၢ်ကီးကျိဖးဒိၣ်အဖျၢၣ်လၢအကယၤအဃိ လီၢ်က၀ီၤကမျၢၢ်ထံဖိကီၢ်ဖိလၢအကလးဘၣ်လဲၤဃ့ၢ်အိၣ်ကဒု၀ဲလၢကီၢ်ကၠီၣ်တဲၣ်တကပၤန့ၣ်လီၤႉ
