လါယူၤ ၁၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ(သုးက့-၄)ဘျံးဒဝဲၢ်ကီၢ်ရ့ၣ်,ထံမိၢ်ပှၢ်ဟီၣ်ကဝီၤအပူၤပယီၤသုးကလၢၤတဖျၢၣ် လၢအအိၣ်ဆီလီၤအသးဖဲကီၢ်ကၠီၣ်တဲၣ်-ကီၢ်ကီၢ်သူလ့ၤကီၢ်ဆၢလၢအမ့ၢ်(ညၣ်ပျၤ)ပယီၤသုးကလၢၤအံၤဖဲမဟါလါယူၤ(၁၂) သီအနံၤန့ၣ်ပယီၤသုး(၁၈)ဂၤထုးလီၤကွံၥ်အသးဒီးဃ့ၢ်ဖျိးကွံၥ်ဝဲဆူကီၢ်ကၠီၣ်တဲၣ်တကပၤအဂ့ၢ်သ့ၣ်ညါဘၣ်လၢသုးက့(၄)အပှၤဘၣ်မူဘၣ်ဒါအအိၣ်န့ၣ်လီၤ.
(ညၣ်ပျၤ)ပယီၤသုးအပှၤလၢဃ့ၢ်ဖျိးထီၣ်ကွံၥ်ဝဲဒၣ်ဆူကီၢ်ကၠီၣ်တဲၣ်သ့ၣ်တဖၣ်အံၤတၢ်သ့ၣ်ညါဘၣ်လၢတၢ်ဒုးတၢ်ယၤကဲထီၣ်အသးတအိၣ်နီမံၤဘၣ်ဆၣ်မ့ၢ်လၢပယီၤသုးသ့ၣ်တဖၣ်အံၤဘၣ်ယိၣ်ဝဲလၢတၢ်ကလဲၤထီၣ်ဒုးအဝဲသ့ၣ်အဃိဃ့ၢ်ဖျိးထီၣ်ကွံၥ်ဝဲဒ်အံၤလီၤအဂ့ၢ်(သုးက့-၄)ပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤစံးဝဲဒ်အံၤန့ၣ်လီၤ.
“တၢ်ဒုးကဲထီၣ်တအိၣ်ဘၣ်. ပဝဲပထီၣ်(အံသၣ်ဃ့ၢ်)သုးကလၢၤဝံၤဘျီပပှၤတခးဘၣ်ကျိနီတထံၣ်ဒီးပယီၤသုးအံၤဃ့ၢ် ဖျိးကွံၥ်ဝဲဒၣ်လီၤ. အဝဲသ့ၣ်သ့ၣ်ညါဝဲဒၣ်လၢ(ခ့ၣ်အဲၣ်ယူၣ်)ကလဲၤထီၣ်ဝဲတၢ်လီၢ်ဝဲန့ၣ်အဃိအဝဲသ့ၣ်ဃ့ၢ်ဖျိးကွံၥ်ဝဲဒၣ်ဒ် န့ၣ်မီၤနီၤ. မ့ၢ်ဝံၤန့ၣ်(ကီၤလၤဖိ)လဲၤထီၣ်မၤန့ၢ်က့ၤအဝဲသ့ၣ်ကျိချံပှၥ်သၣ်လၢသုးကလၢၤအပူၤန့ၣ်လီၤ. ပဝဲပလဲၤတတုၤ ဒံးဘၣ်မီၤနီၤ.” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါ(ညၣ်ပျၤ)သုးကလၢၤလၢအထုးလီၤကွံၥ်ဝဲအသးအံၤမ့ၢ်ဝဲပယီၤသုးခီၣ်သုးရ့ၣ်နီၣ်ဂံၢ်(ခလရ-၂၇၃)ဒီး သုးကလၢၤအပူၤပယီၤသုးအပှၤခဲလၢၥ်ထုးလီၤကွံၥ်အသး,ဃ့ၢ်ဖျိးကွံၥ်ဝဲဆူကီၢ်ကၠီၣ်တဲၣ်တကပၤဃုၥ်ဒီးတၢ်စုကဝဲၤအဂ့ၢ်န့ၣ်(သုးက့-၄)အပှၤဘၣ်မူဘၣ်ဒါတဂၤဃီဝဲန့ၣ်စံးအါထီၣ်ဝဲဒၣ်န့ၣ်လီၤ.
ဒ်န့ၣ်အသိးကီၢ်ဆၢ(အံသၣ်ဃ့ၢ်)ပယီၤသုးအကလၢၤလၢတၢ်ထီၣ်မၤန့ၢ်ကွံၥ်ဝဲဖဲလါယူၤအသီ(၁၀)အနံၤန့ၣ်ပယီၤသုးအပှၤကအိၣ်လၢ(၂၈)ဂၤ,(၃၀)အခိၣ်အဃၢၤသ့ၣ်တဖၣ်ဖဲလါယူၤ(၁၁)သီအနံၤန့ၣ်ဃ့ၢ်နုၥ်လီၤဝဲဒၣ်ဆူကီၢ်ကၠီၣ်တဲၣ်တကပၤဃုၥ်ဒီးတၢ်စုကဝဲၤသ့ၣ်တဖၣ်အဂ့ၢ်(သုးက့-၄)အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
မ့ၢ်ဘၣ်ကွၢ်က့ၤဝဲဖဲအပူၤကွံၥ်လါမ့ၤ(၂၄)သီအနံၤန့ၣ်စ့ၢ်ကီးထံခံပယီၤသုးကလၢၤအပှၤလၢအဃ့ၢ်ဖျိးထီၣ်ဆူကီၢ်ကၠီၣ်တဲၣ်ပူၤပှၤအဂၤ(၁၁၇)ဂၤသ့ၣ်တဖၣ်ကၠီၣ်တဲၣ်သုးဖီၣ်ဆှၢက့ၤအဝဲသ့ၣ်ဆူ(ရနီ-ကီၣ်သီ)ကီၢ်ဆၢတကပၤအဂ့ၢ်သ့ၣ်ညါ ဘၣ်စ့ၢ်ကီးန့ၣ်လီၤ.
ဘျံးဒဝဲၢ်ကီၢ်ရ့ၣ်ဟီၣ်ကဝီၤအပူၤအံၤတကီၢ်ခါခဲအံၤန့ၣ်ကီၢ်ဆၢဒီတကျိၤပယီၤသုကလၢၤအိၣ်တ့ၢ်က့ၤဝဲ(၂)ဖျၢၣ်လၢကလံၤစိးတကပၤဒ်အမ့ၢ်ဝဲ,သူၣ်ခၣ်ဒီးနၣ်အ့ၣ်တီၣ်ခံဖျၢၣ်အဂ့ၢ်သ့ၣ်ညါဘၣ်လၢသုးက့(၄)အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
