လါဒံၣ်စ့ဘၢၣ် ၂၄ သီႇ ၂၀၂၁ နံၣ်ႇ ခ့ၣ်အဲးစံၣ်
ပယီၤသုးမီၤစိရိၤမၤ၀ဲတၢ်ထီၣ်ဒုးလၢကညီကီၢ်စဲၣ်ထံဖိကီၢ်ဖိကမျၢၢ်တဖၣ်ဒ်အံၤအဖီခိၣ် ဖဲတနံၤအံၤလါဒံၣ်စ့ဘၢၣ် ၂၄ သီအနံၤ မီၢ်သီရူခိၣ်နၢ်ဒိၣ်ထီလၢအအိၣ်ဆီလီၤသးဖဲကီၢ်ပယီၤပူၤတဖၣ်ထုးထီၣ်သဃဲၤ၀ဲလံာ်တၢ်ပာ်ဖျါတဘ့ၣ်ဒီး ပဲာ်အၢပဲာ်သီ၀ဲတၢ်ဂ့ၢ်အံၤတဲာ်တဲာ်ဖျုဖျုန့ၣ်လီၤႉ
လံာ်တၢ်ပာ်ဖျါ၀ဲအံၤမ့ၢ်၀ဲဒၣ်အီးစထြ့လယါထံကီၢ်ႇခဲနဒၣ်ႇယူရပၤကီၢ်စၢဖှိၣ်မီၢ်သီရူဘၣ်ထွဲကီၢ်ပယီၤဒီးယူရပၤကီၢ်စၢဖှိၣ်ထံကီၢ်ကရူၢ်ဖိတဖၣ်အမီၢ်သီရူတဖၣ်လၢအမ့ၢ် ခၠဲၣ်ကီၢ်ခိၣ်ထံကီၢ်ႇဒ့မၣ်ႇဖ့ၤလဲၤႇပၠ့ၤသ့ၣ်ႇကၠၤမနံၤႇအံၤတလံၤႇနဲၤသလဲၤႇစပ့ၤဒီးစွံၤဒံၤထံကီၢ်တဖၣ်အမဲာ်ညါ ညူစံၤလဲၤႇနီၤ၀့ႇစွံၤစလဲၤႇယူၤက့ၤဒီးအမဲရံၣ်ကၤထံကီၢ်တဖၣ် အမီၢ်သီဒိၣ်ထီဘၣ်ထွဲကီၢ်ပယီၤတဖၣ်ႇတစိၢ်တလီၢ်မီၢ်သီရူမူဒါခိၣ်တဖၣ်ဒီးမီၢ်သီရူခိၣ်နၢ်ဒိၣ်ထီတဖၣ်ပာ်ဖှိၣ်ဆဲးလီၤ၀ဲစုမုၢ်ကျၢၢ်အံၤန့ၣ်လီၤႉ
တယံၤတမီၢ်ခီဖျိတၢ်ခးလီၤကျိဖးဒိၣ်လၢကညီကီၢ်စဲၣ်ဒူသ၀ီတဖၣ်အပူၤဃုာ်ဒီးတၢ်ထီၣ်ဒုးကမျၢၢ်ထံဖိကီၢ်ဖိတဖၣ်အဖီခိၣ်ဒ်အံၤ မ့ၢ်တၢ်မၤကမၣ်လုၢ်သ့ၣ်ခါပတာ်၀ဲဒၣ်ထံဂုၤကီၢ်ဂၤၦၤဂ့ၢ်၀ီခွဲးယာ်ဒီး တၢ်မၤဒ်အံၤသ့ၣ်တဖၣ်တၢ်ကဘၣ်ပတုာ်ကွံာ်၀ဲအဂ့ၢ်န့ၣ် မီၢ်သီရူခိၣ်နၢ်ဒိၣ်ထီတဖၣ်စံး၀ဲန့ၣ်လီၤႉ
ခီဖျိတၢ်ထီၣ်ဒုးတဖၣ်အဃိ ထံဖိကီၢ်ဖိကမျၢၢ်လၢအကထိဘၣ်ပာ်တ့ၢ်ကွံာ်အဟံၣ်အဃီဘၣ်ဃ့ၢ်မှံဟးဖျိး၀ဲဒၣ်ဒီး တကီၢ်ခါခဲအံၤလၢအ၀ဲသ့ၣ်တဖၣ်အဂီၢ်လိၣ်ဘၣ်၀ဲဒၣ်ဂ့ၢ်ဂီၢ်အူၦၤဂ့ၢ်၀ီတၢ်ဆီၣ်ထွဲမၤစၢၤတဖၣ်အဂ့ၢ်န့ၣ် စံး၀ဲန့ၣ်လီၤႉ
လၢတၢ်န့ၣ်အဃိ သုးမီၤစိရိၤအံၤပကတုာ်ကွံာ်တၢ်ထီၣ်ဒုးလၢကညီကီၢ်စဲၣ်အပူၤဒီး တၢ်ကပာ်ကမျၢၢ်ထံဖိကီၢ်ဖိတဖၣ်ခဲလၢာ်လၢတၢ်ပူၤဖျဲးအလီၢ်ဒ်ထံဂုၤကီၢ်ဂၤတၢ်သိၣ်တၢ်သီအိၣ်၀ဲအသိးအဂ့ၢ်န့ၣ် မီၢ်သီရူခိၣ်နၢ်ဒိၣ်ထီသ့ၣ်တဖၣ်အံၤဃ့ထီၣ်၀ဲဒၣ်န့ၣ်လီၤႉ
