လါဒံၣ်စ့ဘၢၣ် ၈ သီႇ ၂၀၂၁ နံၣ်ႇ ခ့ၣ်အဲးစံၣ်
သုးမီၤစိရိၤဘိးဘၣ်ရၤလီၤ၀ဲလၢကပတုာ်ဃာ်တၢ်ဒုးလၢ(၅)လါအတီၢ်ပူၤဘၣ်ဆၣ် လၢ(၂)လါအတီၢ်ပူၤတၢ်ဒုးကဲထီၣ်၀ဲဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ပာ်ဖှိၣ်ခဲလၢာ်အဘျီ(၄၀၀)ဘျဲၣ် ဖဲန့ၣ်ပယီၤသုးဒီးသုးခိးကီၢ်ဆၢ(BGF)သုးသံ၀ဲအဂၤ(၄၀၀)ဘျဲၣ်အဂ့ၢ်န့ၣ် KNU ကိးလါဒဲးတၢ်ထုးထီၣ်ပာ်ဖျါစရီအသိးသ့ၣ်ညါဘၣ်န့ၣ်လီၤႉ
သုးမီၤစိရိၤဘိးဘၣ်ရၤလီၤ၀ဲလၢကဆိကတီၢ်ဃာ်တၢ်ဒုးစးထီၣ်ဖဲ(၂၀၂၁)နံၣ် လါအီးကထိဘၢၣ် ၁ သီတုၤလၢ(၂၀၂၂)နံၣ် လါဖ့ၤ-ဘူၤအါရံၤလၢာ်ဘၣ်ဆၣ်သနါက့ ဖဲလါအီးကထိဘၢၣ်တလါအတီၢ်ပူၤ လၢ(KNU)တၢ်ပၢဟီၣ်က၀ီၤသုးက့(၅)ဘ့ၣ်အပူၤတၢ်ဒုးကဲထီၣ်၀ဲ(၂၇၅)ဘျီဒီး မ့မ့ၢ်လါနိၣ်၀့ဘၢၣ်န့ၣ်တၢ်ဒုးကဲထီၣ်(၂၀၆)ဘျီ တၢ်ဒုးကဲထီၣ်ပာ်ဖှိၣ်ခဲလၢာ်(၄၈၁)ဘျီန့ၣ်လီၤႉ
တၢ်ဒုးကဲထီၣ်(၄၈၁)ဘျီအံၤ လါအီးကထိဘၢၣ်အတီၢ်ပူၤပယီၤသုးသံ၀ဲ(၂၇၁)ဂၤႇဘၣ်ဒိ(၂၆၆)ဂၤဒီး မ့မ့ၢ်လါနိၣ်၀့ဘၢၣ်န့ၣ်ပယီၤသုးသံ၀ဲ(၁၉၀)ဂၤႇဘၣ်ဒိ(၁၅၉)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
တၢ်ဒုးကဲထီၣ်လၢခံလါအတီၢ်ပူၤပယီၤသုးဒီး(BGF)သံဘၣ်ဒိဘၣ်ထံးအကျါပၣ်ဃုာ်၀ဲသုးရ့ၣ်ခိၣ်(၂)ဂၤႇသုးရ့ၣ်ခိၣ်-၂ တဂၤႇသုးခိၣ်စိ(၆)ဂၤႇသုးဒ့ခိၣ်(၁)ဂၤႇသုးခိၣ်ဒိၣ်ဖိ(၁)ဂၤႇသုးခိၣ်(၂)ဂၤႇသုးစကီၤ(၂)ဂၤန့ၣ်လီၤႉ မ့မ့ၢ်(KNU)စုဒုၣ်တီၤအဖီလာ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဂၢၤသးကရၢ(KNDO)တကပၤသံ၀ဲ(၉)ဂၤႇဘၣ်ဒိ(၃၀)ဂၤန့ၣ်လီၤႉ
တကီၢ်ခါခဲအံၤပယီၤသုးဒီး(KNU)အဘၢၣ်စၢၤတၢ်ခးလိာ်သးကဲထီၣ်၀ဲဖဲ သုးက့(၅)ႇသုးက့(၁)ႇသုးက့(၃)ႇသုးက့(၂)ဒီးသုးက့(၆)ဟီၣ်က၀ီၤတဖၣ်အပူၤန့ၣ်လီၤႉ လၢသုးက့တဖၣ်အကျါကိးလါဒဲးတၢ်ဒုးကဲထီၣ်အါကတၢၢ်န့ၣ်မ့ၢ်၀ဲ(သုးက့ ၅)ဟီၣ်က၀ီၤပူၤန့ၣ်လီၤႉ
သုးမီၤစိရိၤအံၤထုးထီၣ်ဘိးဘၣ်ရၤလီၤ၀ဲလၢကပတုာ်ဃာ်တၢ်ဒုးလၢထံကီၢ်ဒီတဘ့ၣ်အပူၤဘၣ်ဆၣ် လၢကညီကီၢ်စဲၣ်ဃုာ်ဒီးကီၢ်ပယီၤထးခီတၢ်လီၢ်ႇခၠီကီၢ်စဲၣ်ဒီးကရ့ၣ်နံၣ်(ကယါ)ကီၢ်စဲၣ်အပူၤတဖၣ် ကိးမုၢ်နံၤဒဲးတၢ်ဒုးဆူၣ်ထီၣ်၀ဲဒီး တၢ်လီၢ်ဖဲန့ၣ်သ့ၣ်တဖၣ်စ့ၢ်ကီးပယီၤသုးမၤအါထီၣ်သုးဂံၢ်ဘါဟူးဂဲၤ၀ဲထီဘိအိၣ်၀ဲအသိး မၤကမၣ်စ့ၢ်ကီးၦၤဂ့ၢ်၀ီခွဲးယာ်ကိးမုၢ်နံၤဒဲးအဂ့ၢ်န့ၣ် လီၢ်က၀ီၤတၢ်ကစီၣ်သန့တဖၣ်ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါပယီၤသုးဒီးသုးခိးကီၢ်ဆၢ(BGF)အံၤကိးသူ၀ဲကမျၢၢ်ဒ်တၢ်ဒီသဒၢစုက၀ဲၤတခါဒီးကိးမၢဆူၣ်၀ဲပီၣ်တၣ်အသိး လီၢ်က၀ီၤကမျၢၢ်လၢအကလးဘၣ်စံၣ်မှံဟးဖျိး၀ဲဒၣ်န့ၣ်လီၤႉ တကီၢ်ခါခဲအံၤစ့ၢ်ကီးခီဖျိပယီၤသုးမၤ၀ဲသုးတၢ်ဟူးတၢ်ဂဲၤဟဲအါထီၣ်အဃိ တၢ်ဒုးကဟဲဆူၣ်ထီၣ်သ့၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ကစီၣ်အအိၣ်န့ၣ်လီၤႉ
တကီၢ်ခါခဲအံၤလၢ(KNU)တၢ်ပၢဟီၣ်က၀ီၤအပူၤတၢ်ဒုးဆူၣ်ထီၣ်အါန့ၢ်ဒံး တချုးလၢသုးမီၤစိရိၤဘိးဘၣ်ရၤလီၤလၢကပတုာ်ဃာ်တၢ်ဒုးအခါဒံးဘၣ်အဂ့ၢ်န့ၣ် KNU တကပၤစံး၀ဲန့ၣ်လီၤႉ
