KNU ထုးထီၣ်ဒုးသ့ၣ်ညါဘၣ်ထွဲလီၢ်က၀ီၤဖိတၢ်ဟးထီၣ်က့ၤလီၤလၢဖၣ်အၣ်ကီၢ်ဆၣ်ပူၤ

လါဒံၣ်စ့ဘၢၣ် ၇ သီႇ ၂၀၂၁ နံၣ်ႇ ခ့ၣ်အဲးစံၣ်

ခီဖျိပယီၤသုးစုဒုၣ်တီၤအဖီလာ်သုးခိးကီၢ်ဆၢ(BGF)သုးဟူးဂဲၤဟဲအါထီၣ်လၢ KNU-ကညီဒီကလုာ်စၢဖှိၣ်ကရၢ သုးက့(၁)တၢ်ပၢဟီၣ်က၀ီၤဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ်ပူၤအဃိ လၢကမျၢၢ်တၢ်ဟးထီၣ်ဟးလီၤအဖီခိၣ် KNU ဖၣ်အၣ်ကီၢ်ဆၣ် ထုးထီၣ်၀ဲလံာ်ဟ့ၣ်ပလီၢ်တဘ့ၣ်ဖဲတလါအံၤလါဒံၣ်စ့ဘၢၣ် ၁ သီအနံၤန့ၣ်လီၤႉ

ခီဖျိသုးခိးကီၢ်ဆၢ(BGF)လၢအဟဲအိၣ်ဆီလီၤသးဖဲဃိၣ်လိာ်ကျိမုၢ်နုာ်ဖၣ်အၣ်ကီၢ်ဆၣ်ပူၤတဖၣ်ဟူးဂဲၤဟဲအါထီၣ်အဃိ KNU ဖၣ်အၣ်ကီၢ်ဆၣ်ပၢဆှၢတၢ်ခၢၣ်စးနဲၣ်ရွဲၣ်စီၤန့ၢ်ထူဆဲးလီၤစုပနီၣ်ထုးထီၣ်ဒုး သ့ၣ်ညါကမျၢၢ်ထံဖိကီၢ်ဖိတဖၣ်လၢ ကဘၣ်ဟးထီၣ်က့ၤလီၤစးထီၣ်ဖဲဂီၤခီ ၆ နၣ်ရံၣ်တုၤလၢဟါခီ ၆ နၣ်ရံၣ်လီၤဒီးတၢ်တဘၣ်ဟးထီၣ်က့ၤလီၤတလၢတၢ်ပာ်ပနီၣ်တၢ်ဆၢကတီၢ်ဘၣ်န့ၣ်လီၤႉ

KNU ဒူသထူၣ်ကီၢ်ရ့ၣ် တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤဒ့ နဲၣ်ရွဲၣ် စီၤလွါမိနဲၤ စံး၀ဲ “တၢ်လီၢ်ဖဲအံၤပယီၤသုးဒီး(BGF)ဟးထီၣ်ဟးလီၤအါမီၤနီၤႉ အ၀ဲသ့ၣ်လ့ၢ်လိၤ၀ဲဖဲဘီတပြိးႇကၠီၤက့ၣ်ခံႇဖှၣ်ဂီၤဒီးသ့ၣ်လၣ်ဘီသ၀ီတဖၣ်မီၤနီၤႉ တၢ်လဲၤတၢ်က့ၤမတဂၤမတဂၤခီန့ၣ်ပတသ့ၣ်ညါခဲလၢာ်ဘၣ်ႉတမံၤဂ့ၤတမၠိဂ့ၤကဘၣ်ဒိးသမံသမိးအသးလီၤ”အဂ့ၢ်န့ၣ် စံး၀ဲန့ၣ်လီၤႉ

လံာ်ဟ့ၣ်ပလီၢ်တဘ့ၣ်အံၤဘၣ်တၢ်ထုးထီၣ်ပာ်ဖျါ၀ဲဖဲအပူၤကွံာ်စှၤသီအခါလံဘၣ်ဆၣ်သနါက့ စးထီၣ်ဖဲမဟါလါဒံၣ်စ့ဘၢၣ် ၆ သီအနံၤန့ၣ် တၢ်ဟးတဲဒုးသ့ၣ်ညါ၀ဲလၢသ၀ီအပူၤအိၣ်၀ဲအမဲာ်ညါ သ၀ီသးၦၢ်ၦၤဘၣ်မူဘၣ်ဒါတဖၣ်စ့ၢ်ကီးကကိး၀ဲတၢ်အိၣ်ဖှိၣ်ဒီးကတဲနၢ်ပၢၢ်၀ဲအဂ့ၢ်န့ၣ် စီၤလွါမိနဲၤစံးအါထီၣ်၀ဲန့ၣ်လီၤႉ

ဒ်(KNU)ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ်ထုးထီၣ်ပာ်ဖျါ၀ဲလံာ်ဟ့ၣ်ပလီၢ်အသိးန့ၣ် တၢ်ကဟ့ၣ်ကမျၢၢ်တၢ်ဟးထီၣ်ဟးလီၤအခွဲးစးထီၣ်ဖဲဂီၤခီ ၆ နၣ်ရံၣ်တုၤလၢဟါခီ ၆ နၣ်ရံၣ်လီၤဒီး သိလ့ၣ်လၢအဟးထီၣ်က့ၤလီၤလၢဖၣ်အၣ်ကီၢ်ဆၣ် သုးရ့ၣ်(၁)တၢ်ပၢဟီၣ်က၀ီၤပူၤတဖၣ် ကဘၣ်ပာ်လီၤအသိလ့ၣ်အမဲာ်ထံကလၤအမဲာ်ညါ သိလ့ၣ်ႇဆဲးကဲးႇပယီၤသုးသိလ့ၣ်တဖၣ်မ့လဲၤတၢ်က့ၤတၢ်အခါ တၢ်မ့သမံသမိးအီၤန့ၣ်ကဘၣ်တူၢ်လိာ်ဒိးသမံသမိးသးအဂ့ၢ်န့ၣ် ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါကမျၢၢ်သ့ၣ်တဖၣ်ဂ့ၢ်ဂီၢ်အူတၢ်ဂ့ၢ်မ့ဟဲအိၣ်ထီၣ်တမံၤလၢ်လၢ်န့ၣ် ကဘၣ်ဒုးသ့ၣ်ညါၦၤဘၣ်မူဘၣ်ဒါတဖၣ်ဒီး တၢ်မ့တလူၤပိာ်မၤထွဲတၢ်သိၣ်တၢ်သီသ့ၣ်တဖၣ်အံၤဘၣ်န့ၣ် တၢ်ဂ့ၢ်ကီလၢကဟဲပိာ်ထွဲထီၣ်အခံသ့ၣ်တဖၣ်တဟံး၀ဲမူဒါဘၣ်အဂ့ၢ်န့ၣ် KNU ဖၣ်အၣ်ကီၢ်ဆၣ် လံာ်ဒုးသ့ၣ်ညါအပူၤပာ်ဖျါ၀ဲန့ၣ်လီၤႉ

ဖၣ်အၣ်ကီၢ်ဆၣ် သ၀ီဖိလၢအိၣ်ဃိၣ်လိာ်မုၢ်နုာ်တကပၤတဂၤစံး၀ဲ“ထုးထီၣ်၀ဲတၢ်သိၣ်တၢ်သီလၢဂီၤခီ ၆ နၣ်ရံၣ်တုၤလၢဟါခီ ၆ နၣ်ရံၣ်အဃိ မ့ဟဲထီၣ်လၢဂ့ၢ်ဂီၢ်အူတၢ်သံတၢ်ၦၢ်ဒုကကီတစဲးလီၤႉ တဲပာ်၀ဲလၢတဟံးမူဒါဘၣ်အဃိဘၣ်လဲၤဘၣ်က့ၤလၢတၢ်ပလီၢ်အပူၤလီၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ

သုးဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ လၢ(KNU)တၢ်ပၢဟီၣ်က၀ီၤအပူၤတဖၣ်အါဒၣ်တက့ၢ်န့ၣ် ပယီၤသုးဒီး(KNU)စုဒုၣ်တီၤအဖီလာ်(KNLA)တဖၣ်အဘၢၣ်စၢၤတၢ်ဒုးဟဲဆူၣ်ထီၣ်၀ဲအသိး လၢ(KNU)သုးက့(၁)ႇ(သုးက့ ၅)ႇ(သုးက့ ၃)ဒီး(သုးက့ ၂)ဟီၣ်က၀ီၤအပူၤတဖၣ်တၢ်ဒုးကဲထီၣ်အါကတၢၢ်န့ၣ်လီၤႉ ဟီၣ်က၀ီၤဖဲန့ၣ်အပူၤစ့ၢ်ကီးတုၤလၢခဲအံၤတစုပယီၤသုးဃုာ်ဒီးသုးခိးကီၢ်ဆၢ(BGF)သုးတဖၣ်မၤ၀ဲသုးတၢ်ဟူးတၢ်ဂဲၤအါထီၣ်၀ဲကွ့ၢ်ကွ့ၢ်အဂ့ၢ်န့ၣ် KNU ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ