Home တၢ်ကစီၣ် ပယီၤသုးမီၤစိရိၤအၦၤ(၃)ဂၤဟဲဟ့ၣ်လီၤသးဆူ(KNU)အအိၣ်ဃုာ်ဒီးစုက၀ဲၤတဖၣ်

ပယီၤသုးမီၤစိရိၤအၦၤ(၃)ဂၤဟဲဟ့ၣ်လီၤသးဆူ(KNU)အအိၣ်ဃုာ်ဒီးစုက၀ဲၤတဖၣ်

435
0
Photo: KNU Mutraw News

လါယနူၤအါရံၤ ၇ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲတနံၤအံၤလါယနူၤအါရံၤ ၆ သီအနံၤ လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်အပူၤ ပယီၤသုးမီၤစိရိၤအၦၤ(၃)ဂၤဟဲဟ့ၣ်လီၤသးဆူခ့ၣ်အဲၣ်ယူၣ်(သုးက့ ၅)အအိၣ်ဃုာ်ဒီးတၢ်စုက၀ဲၤတဖၣ်အဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်တၢ်ကစီၣ်ထုးထီၣ်ပာ်ဖျါ၀ဲန့ၣ်လီၤႉ

ပယီၤသုးခီၣ်ချ့သုးရ့ၣ်(ခမရ-၄၃၉)လၢအအိၣ်ဆီလီၤသးဖဲလူၢ်သီကီၢ်ဆၣ် စီၤမုၢ်ပျီပူၤ အီၤမ့ခဲၤ(၂၉)နံၣ်ႇ မ့သ့သါ(၂၂)နံၣ်ဒီးသါထွ့(၂၁)နံၣ်သ့ၣ်တဖၣ် ဆဲးကျိး၀ဲဟီၣ်က၀ီၤ KNU(သုးက့ ၅)ဒီး ဟဲဟ့ၣ်လီၤသးဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ

“ခီဖျိလၢအ၀ဲသ့ၣ်သုးကလၢၤန့ၣ်တၢ်အီၣ်တၢ်အီတကူတလၢလၢၤဘၣ်အဖီခိၣ် ကဆှၢထီၣ်တၢ်အီၣ်တၢ်အီအဂီၢ်စ့ၢ်ကီးဆှၢ၀ဲတညီလၢၤဘၣ်အဃိ လၢသုးကလၢၤပူၤအခိၣ်အနၢ်သ့ၣ်တဖၣ်ဆီၣ်တံၢ်မၤနၢၤအ၀ဲသ့ၣ်အဃိ တူၢ်၀ဲတကဲလၢာ်ဘၣ်ဒီးဟဲက့ၤပာ်ဖှိၣ်မၤသကိးတၢ်ဒီးၦၤလီၤ”အဂ့ၢ်န့ၣ် KNLA(သုးက့ ၅)ၦၤဘၣ်မူဘၣ်ဒါ စံးဘၣ်၀ဲမုၢ်တြီၢ်တၢ်ကစီၣ်န့ၣ်လီၤႉ

Photo: KNU Mutraw News

ဒ်မုၢ်တြီၢ်တၢ်ကစီၣ်ပာ်ဖျါ၀ဲလၢတၢ်ဂီၤပူၤအသိးန့ၣ် ပယီၤသုးမီၤစိရိၤအၦၤ(၃)ဂၤအံၤ ဟဲက့ၤစိာ်ဃုာ်၀ဲကျိ(၃)ခိၣ်ႇကျိမဲးကစံ(၁၂)ဘ့ၣ်ႇလီတဲစိ(၂)ဖျၢၣ်ႇစုကွံာ်မ့ၣ်ပိၢ်(၁)ဖျၢၣ်ဒီးကျိချံၦာ်သၣ်သ့ၣ်တဖၣ်န့ၣ်လီၤႉ

လၢန့ၣ်အမဲာ်ညါ KNU(သုးက့ ၅)ၦၤဘၣ်မူဘၣ်ဒါအံၤစံးအါထီၣ်၀ဲလၢ“အ၀ဲသ့ၣ်န့ၣ်အတၢ်ပညိၣ်အခိၣ်သ့ၣ်ခီန့ၣ် ဒ်သိးကက့ၤထံၣ်လိာ်ဘၣ်အသးဒီးအဟံၣ်ဖိဃီဖိသ့ၣ်တဖၣ်အဂီၢ်လီၤႉ ပ၀ဲလၢ(KNLA)တကပၤစ့ၢ်ကီးတသ့ဖဲအသ့န့ၣ်ကရဲၣ်ကျဲၤဒီးပကဟုကယာ်အ၀ဲသ့ၣ်ဂ့ၤဂ့ၤ၀ါ၀ါလီၤ”အဂ့ၢ်န့ၣ် စံးဘၣ်၀ဲခ့ၣ်အဲၣ်ယူၣ်မုၢ်တြီၢ်တၢ်ကစီၣ်န့ၣ်လီၤႉ

ပယီၤသုးမီၤစိရိၤအၦၤ(၃)ဂၤလၢအဟဲက့ၤပာ်ဖှိၣ်မၤသကိးတၢ်ဒီး(KNU)အကျါတဂၤစံး၀ဲလၢ ခီဖျိတၢ်ပာ်အ၀ဲသ့ၣ်ဂ့ၤဂ့ၤႇရ့အ၀ဲသ့ၣ်ဂ့ၤဂ့ၤအဃိ စံးဘျုးဘၣ်ခ့ၣ်အဲၣ်ယူၣ်ဒိၣ်မးအဂ့ၢ်န့ၣ် မုၢ်တြီၢ်တၢ်ကစီၣ်ပာ်ဖျါန့ၣ်လီၤႉ

စးထီၣ်လၢ ၂၀၂၁ နံၣ် လါဖ့ၤဘြူၤအါရံၤ ၁ သီ သုးဟံးန့ၢ်ဆူၣ်ကွံာ်တၢ်စိတၢ်ကမီၤန့ၣ် ပယီၤသုးမီၤစိရိၤအၦၤ ဟဲက့ၤပာ်ဖှိၣ်မၤသကိးတၢ်ဒီးခ့ၣ်အဲၣ်ယူၣ်(သုးက့ ၅)ဟဲအါထီၣ်၀ဲအသိး ဖဲ(၂၀၂၁)ထီၣ်သီတုၤလၢတနံၣ်အံၤလါယနူၤအါရံၤ ၆ သီအနံၤတစု ပယီၤသုးမီၤစိရိၤအၦၤဟဲက့ၤပာ်ဖှိၣ်မၤသကိးတၢ်ဒီးခ့ၣ်အဲၣ်ယူၣ်အိၣ်၀ဲ(၅၀)ဂၤလံန့ၣ်လီၤႉ ၦၤသ့ၣ်တဖၣ်အံၤအါဒၣ်တက့ၢ်န့ၣ်မ့ၢ်၀ဲဒၣ်ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၈)စုဒုၣ်တီၤအဖီလာ်သုးရ့ၣ်အၦၤသုးဖိသ့ၣ်တဖၣ်လီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)တၢ်မၤနီၣ်မၤဃါပူၤအသိး သ့ၣ်ညါဘၣ်န့ၣ်လီၤႉ