ခီဖျိပယီၤသုးမီၤစိရိၤမၤ၀ဲတၢ်ထီၣ်ဒုးအဃိ ကီၢ်သူလ့ၤကၠိတနီၤဘၣ်တၢ်ကးတံၢ်ဃာ်အီၤ

လါယနူၤအါရံၤ ၂၈ သီႇ ၂၀၂၂ နံၣ်ႇ ခၣ်အဲးစံၣ်

ဖဲစှၤသီအတီၢ်ပူၤခီဖျိပယီၤသုးမီၤစိရိၤနုာ်လီၤဟူးဂဲၤမၤ၀ဲဒုးယၤတၢ်ရဲၣ်တၢ်ကျဲၤလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်ပူၤအဃိ လီၢ်က၀ီၤဖိလၢအကလးဘၣ်ဟးစံၣ်ပလဲာ်သးတကးဒံးဘၣ်အမဲာ်ညါ ကၠိလၢကီၢ်သူလ့ၤကူၣ်သ့၀ဲၤကျိၤအိးထီၣ်ဃာ်၀ဲတနီၤဘၣ်တၢ်ကးတံၢ်ဃာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကီးတရံးကီၢ်ဆၣ်အပူၤ တကီၢ်ခါခဲအံၤခီဖျိပယီၤသုးမီၤစိရိၤဟဲနုာ်လီၤတလၢဟီၣ်က၀ီၤတၢ်ပာ်ပနီၣ်အလီၢ်ဒီး မၤ၀ဲတၢ်ထီၣ်ဒုးအဃိ သ၀ီ(၂၇)ဖျၢၣ်လီၢ်က၀ီၤဖိ(၂၀ႇ၀၀၀)ဃၣ်ဃၣ်ဘၣ်ဟးစံၣ်ပလဲာ်သးဒီး ကၠိလၢအိၣ်ကီၢ်သူလ့ၤကူၣ်သ့ဆဲးလၤ၀ဲၤကျိၤ(KECD)တၢ်ပၢအဖီလာ်တနီၤဘၣ်တၢ်ကးတံၢ်ဃာ်၀ဲအမဲာ်ညါ ကၠိလၢအဂၤတဖၣ်စ့ၢ်ကီးဘၣ်တၢ်ဒိးစဲးဆိအီၤအဂ့ၢ်န့ၣ် ဟီၣ်က၀ီၤကူၣ်သ့မူဒါခိၣ်စံး၀ဲအသိး သ့ၣ်ညါဘၣ်န့ၣ်လီၤႉ

ပူယ့တီၤထီကၠိ ကၠိခိၣ်သရၣ်စီၤဂ့ၤဒိၣ်စံး၀ဲလၢ“ပစးထီၣ်ပံးကၠိန့ၣ်ခီဖျိလၢဒုၣ်ဒါဟဲဘူးထီၣ်အဃိလီၤႉ မ့၀ံၤဟဲထီၣ်လၢကျဲန့ၣ်ၦၤအိၣ်ခိးခး၀ဲႉ ပကွၢ်က့ၤလၢပကၠိန့ၣ်ကၠိဖိန့ၣ်အိၣ်ဒီးလီၢ်ယံၤအိၣ်အဃိန့ၣ် တနီၤမိပါခီဒုဆှၢဖိခီသးတနၢၤစ့ၢ်ဘၣ်လီၤႉ ဒီးမ့၀ံၤကူၣ်သ့ခိၣ်ဆဲးထီၣ်လီတဲစိမၢပပံးဃာ်ကၠိတနွံဒီး တၢ်အိၣ်သးမ့ဂ့ၤထီၣ်မးကက့ၤအိးထီၣ်ကဒါက့ၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ခီဖျိဟီၣ်က၀ီၤပူၤတၢ်အိၣ်သးတဂၢၢ်တကျၢၤဘၣ်အဃိ တကီၢ်ခါခဲအံၤလၢခ့ၣ်အဲၣ်ယူၣ် ကီးတရံးကီၢ်ဆၣ်ပူၤ တၢ်ကးတံၢ်ဃာ်၀ဲကၠိခဲလၢာ်အိၣ်အဖျၢၣ်(၁၀)ဘျဲၣ်လံအသိး ကၠိလၢအဂၤတဖၣ်တၢ်အိးထီၣ်ဒံး၀ဲဘၣ်ဆၣ် ဘၣ်ထီၣ်ကၠိလၢတၢ်ပျံၤတၢ်ဖုးအပူၤလီၤအဂ့ၢ်န့ၣ် ကီးတရံးကီၢ်ဆၣ် ကီၢ်သူလ့ၤကူၣ်သ့ဆဲးလၤ၀ဲၤကျိၤ နဲၣ်ရွဲၣ်သဃဲၤ စီၤဟဲခုၣ် စံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ“ကၠိတနီၤန့ၣ်အိၣ်ဘူးဒီးပယီၤဟဲထီၣ်အဃိ ဆဲးအိးထီၣ်တသ့လၢၤဘၣ်အိၣ်လီၤႉ တနီၤန့ၣ်တဲ၀ဲလၢကဒုးဒိးစဲး၀ဲလၢအဆိအချ့လီၤႉ ကၠိတနီၤဒိးစဲး၀ံၤစ့ၢ်ကီးအိၣ်မီၤနီၤႉ ဒိးစဲး၀ံၤနါက့တၢ်အိၣ်သးမ့ဟဲက့ၤဂ့ၤထီၣ်န့ၣ်ကက့ၤအိးထီၣ်ကဒါ၀ဲလီၤႉ တသိၣ်လိဘၣ်လံာ်ဂ့ၤဂ့ၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ကီးတရံးကီၢ်ဆၣ်အပူၤ(၂၀၂၁-၂၀၂၂)တၢ်သိၣ်လိနံၣ်အပူၤ ကၠိလၢအဘၣ်တၢ်အိးထီၣ်၀ဲလၢကီၢ်သူလ့ၤကညီကူၣ်သ့ဆဲးလၤ၀ဲၤကျိၤ(KECD)တၢ်ပၢဖီလာ်ခဲလၢာ်အိၣ်၀ဲ(၄၆)ဖျၢၣ်အကျါ တီၤထီကၠိအိၣ်၀ဲ(၃)ဖျၢၣ်ႇတီၤခၢၣ်သးကၠိအိၣ်(၅)ဖျၢၣ်ႇတီၤဖုၣ်ကၠိအိၣ်၀ဲ(၃၈)ဖျၢၣ်ဒီး ခီလ့းတီၤတလၢကၠိအိၣ်၀ဲ(၂)ဖျၢၣ်အဂ့ၢ်န့ၣ် သ့ၣ်ညါဘၣ်လၢကီၢ်ဆၣ်ကူၣ်သ့၀ဲၤကျိၤၦၤဘၣ်မူဘၣ်ဒါအအိၣ်န့ၣ်လီၤႉ

တကးဒံးဘၣ်လၢန့ၣ်အမဲာ်ညါ ခီဖျိပယီၤသုးမီၤစိရိၤမၤအါထီၣ်သုးဂံၢ်ဘါလၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤအဃိ (သုးက့ ၆)ဒူပျာ်ယာ်ကီၢ်ရ့ၣ်ပူၤကၠိသ့ၣ်တဖၣ်အမဲာ်ညါ (သုးက့ ၁)ဒူသထူၣ်ကီၢ်ရ့ၣ်ပူၤ ကၠိတစှၤန့ၢ်(၂)ဖျၢၣ်ဘၣ်တၢ်ကးတံၢ်ဃာ်၀ဲအဂ့ၢ်န့ၣ် သ့ၣ်ညါဘၣ်လၢကီၢ်သူလ့ၤကူၣ်သ့ဆဲးလၤ၀ဲၤကျိၤၦၤဘၣ်မူဘၣ်ဒါအအိၣ်န့ၣ်လီၤႉ

သုးဟံးန့ၢ်ကွံာ်တၢ်စိတၢ်ကမီၤ၀ံၤအလီၢ်ခံခီဖျိထံရူၢ်ကီၢ်သဲးတၢ်အိၣ်သးအဃိ ပဒိၣ်အကၠိတဖၣ်အါဒၣ်တက့ၢ်ဘၣ်တၢ်ကးတံၢ်ဃာ်၀ဲအဃိ ကၠိဖိမိၢ်ပၢ်တနီၤလဲၤပာ်က့ၤအဒံၣ်အဖိလၢခ့ၣ်အဲၣ်ယူၣ်တၢ်ပၢဟီၣ်က၀ီၤကီၢ်သူလ့ၤကူၣ်သ့ဆဲးလၤအိးထီၣ်၀ဲကၠိအံၤအိၣ်၀ဲအဃိ ကီၢ်သူလ့ၤကၠိတဖၣ်တနံၣ်အံၤကၠိဖိအနီၣ်ဂံၢ်ဘၣ်ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ်(၂၀၂၀-၂၀၂၁)တၢ်သိနံၣ်အပူၤ ကၠိလၢအိၣ်ကီၢ်သူလ့ၤကညီကူၣ်သ့ဆဲးလၤ၀ဲၤကျိၤ(KECD) တၢ်ပၢဖီလာ်အိၣ်၀ဲ(၁၃၆၁)ဖျၢၣ်ဒီး ကၠိဖိအနီၣ်ဂံၢ်အိၣ်၀ဲတကလီၢ်ဘျဲၣ်ဒီး မ့မ့ၢ်(၂၀၂၁-၂၀၂၂) တၢ်သိၣ်လိနံၣ်အပူၤကၠိဖိအနီၣ်ဂံၢ်ဟဲအါထီၣ်၀ဲ(၅၀၀၀)ဘျဲၣ်အဂ့ၢ်န့ၣ် (KECD)တၢ်မၤနီၣ်စရီအသိး သ့ၣ်ညါဘၣ်န့ၣ်လီၤႉ