ပလီကီၢ်ဆၣ်ပူၤပယီၤသုးကူသိးထီၣ်ကမျၢၢ်ကူကၤအိၣ်ခိးသမံသမိးတၢ်လၢတၢ်သမံသမိးတြဲၤလီၢ်

လါမ့ၤ ၁ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် ပလီကီၢ်ဆၣ် တိၤတၢ်သမံသမိးတြဲၤလီၢ်ဒီးတၢ်သမံသမိးတြဲၤလီၢ်သ့ၣ်တဖၣ်န့ၣ် ပယီၤသုးကူသိးထီၣ်ကမျၢၢ်ကူကၤအိၣ်ခိးသမံသမိးတၢ်ဟဲအထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢသဂၢၢ်ဘၣ်တၢ်ကဲထီၣ်သးတဖၣ်အံၤစံး၀ဲန့ၣ်လီၤႉ

စးထီၣ်ဖဲအပူၤကွံာ်လါဖ့ၤဘြူၤအါရံၤအခါန့ၣ်ပယီၤသုးမၤဃံးထီၣ်၀ဲတၢ်သမံသမိးတကးဒံးဘၣ် လီၢ်ခံအံၤ အ၀ဲသ့ၣ်ကူသိးထီၣ်ကမျၢၢ်ကူကၤ,(PDF)သုးကူကၤအိၣ်ခိးသမံသမိးတၢ်ဟဲအါထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢအသဂၢၢ်ဘၣ်တၢ်ကဲထီၣ်သးလၢအနီၢ်ကစၢ်တဂၤ စံး၀ဲန့ၣ်လီၤႉ

အ၀ဲစံး၀ဲလၢ“အ၀ဲသ့ၣ်န့ၣ်တဘျီတခီၣ်ကူထီၣ်သိးထီၣ်ဒ်ကမျၢၢ်ႇဘၣ်တဘျီဘျီန့ၣ်ကူထီၣ်၀ဲ(PDF)သုးကူကၤဒီး မ့၀ံၤသိလ့ၣ်လၢအဟဲက့ၤတီၣ်ဟုသးတဖၣ်န့ၣ်အ၀ဲသ့ၣ်ဃ့အီၣ်လိး၀ဲစ့ႉအ၀ဲသ့ၣ်မၤ၀ဲဒ်အံၤန့ၣ်ၦၤလၢအဟးထီၣ်က့ၤလီၤဘၣ်ဖဲပလီတိၤအံၤသ့ၣ်ညါ၀ဲကိးဂၤဒဲးလီၤႉပယီၤသုးန့ၣ်အဲၣ်ဒိးမၤဟးဂီၤ(PDF)အမံၤဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ခီဖျိပယီၤသုးဆီလီၤတြဲၤအိၣ်ခိးသမံသမိးတၢ်ဟဲအါထီၣ်ဒီးပံးစ့ၢ်ကီး၀ဲကျဲတဖၣ်အဃိကမျၢၢ်လၢအလ့ၢ်လိၤလ့ၢ်ထီၣ်တဖၣ်အံၤလဲၤတၢ်နီၢ်ထီၣ်ဆဲးခံ၀ဲဒၣ်အဂ့ၢ်န့ၣ် လီၢ်က၀ီၤကမျၢၢ်လၢအလ့ၢ်ထီၣ်လ့ၢ်လိၤဖဲန့ၣ်တဂၤစံး၀ဲန့ၣ်လီၤႉ

အ၀ဲစံး၀ဲလၢ“ဖဲမဟါန့ၣ်ကယဲၢ်မ့ၢ်တြဲၤလၢအ၀ဲသ့ၣ်ဆ့ၣ်နီၤအိၣ်၀ဲတဖၣ်ပံး၀ဲခဲလၢာ်လီၤႉဘၣ်မနုၤအဃိပံး၀ဲလဲၣ်န့ၣ်ပတသ့ၣ်ညါဘၣ်ႉအ၀ဲသ့ၣ်အံၤတနံၤဘၣ်တနံၤန့ၣ်နးဒိၣ်ထီၣ်ကွ့ၢ်ကွ့ၢ်လီၤႉတမ့ၢ်တၢ်နီတမံၤဘၣ်နါက့အ၀ဲသ့ၣ်သမံသမိးတၢ်ဆူၣ်မးႉအ၀ဲသ့ၣ်မၤ၀ဲဒ်အံၤအဃိနကလဲၤတၢ်ဖဲအံၤဒီးဖဲန့ၣ်မးဘၣ်ဟ့ၣ်လီၤတၢ်ဆၢကတီၢ်ဖးယံၤညါႉလၢအ၀ဲသ့ၣ်အဲၣ်ဒိးမၤ၀ဲန့ၣ်မၤ၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ခါန့ၣ်လီၤႉ

ဒ်န့ၣ်အသိးဖဲအပူၤကွံာ်စှၤသီအခါစ့ၢ်ကီးလၢပလီကီၢ်ဆၣ် မကၠံကိ(မကျည်းကုန်း)တြဲၤႇ ပလၣ်၀့ၢ် ပၢၤကီၢ်၀ဲၤလီၢ်ကပၤ တြဲၤတၢ်သမံသမိးလီၢ်ဒီး မၠ့ၣ်ကီၢ်ဆၣ် သမိၣ်(သမုတ်)ကရူၢ် သမိၣ်တြဲၤတၢ်သမံသမိးလီၢ်န့ၣ် စးထီၣ်ဂီၤခီ ၉ နၣ်ရံၣ် တုၤလၢမုၢ်ဃ့ၢ်လီၤ ၂း၃၀ န့ၣ် ပယီၤသုးပံးဃာ်ကျဲအဃိ ကမျၢၢ်လၢအလဲၤတၢ်က့ၤတၢ်တဖၣ်အံၤလဲၤတၢ်တုၤနီၢ်ထီၣ်၀ဲ အဂ့ၢ်န့ၣ် လီၢ်က၀ီၤ မံၣ်ဒံၣ်ယၣ် ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါလၢပလီကီၢ်ဆၣ် ပလီ၀့ၢ်ဒီးဒူသ၀ီတနီၤအပူၤန့ၣ် ခီဖျိပယီၤသုးပံးဃာ်၀ဲတၢ်စိာ်ထီၣ်စိာ်လီၤဟုသး ဒီးဂံၢ်ခီၣ်ထံးတၢ်အီၣ်တၢ်အီအဃိဟီၣ်က၀ီၤဖဲန့ၣ်အပူၤဟုသးဒီးတၢ်အီၣ်တၢ်အီစးထီၣ်လီၤတူာ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

လၢပလီကီၢ်ဆၣ်အပူၤတၢ်ဒုးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးအဘၢၣ်စၢၤအိၣ်၀ဲခဲအံၤခဲအံၤဒီး ပယီၤသုးအံၤမၤတဲာ်ကွံာ်၀ဲတၢ်အီၣ်တၢ်အီအကျိၤဒ်တဲာ်လွံၢ်တဲာ်အစိၤခါအဂ့ၢ်န့ၣ် တၢ်ဒီသဒၢကမျၢၢ်သုးကရူၢ် ပာ်ဂၢၢ်ပာ်ကျၢၤစံး၀ဲန့ၣ်လီၤႉ