ဒူပျာ်ယာ်ကီၢ်ရ့ၣ်ခိၣ်စီၤစွ့ၤမီဃ့ကညး၀ဲလၢတဘၣ်တြီပယီၤသုးဆှၢထီၣ်ဆှၢလီၤတၢ်အီၣ်တၢ်အီဘၣ်

လါယနူၤအါရံၤ ၁၂ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲလါယနူၤအါရံၤ ၁၀ သီအနံၤ ဒူပျာ်ယာ်ကီၢ်ရ့ၣ်ခိၣ်ပဒိၣ်စီၤစွ့ၤမီကွဲးဒုးသ့ၣ်ညါကီၢ်ရ့ၣ်ၦၤဘၣ်မူဘၣ်ဒါတဖၣ်လၢ လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်ပူၤ တဘၣ်တြီပယီၤသုးအတၢ်ဆှၢထီၣ်ဆှၢလီၤတၢ်အီၣ်တၢ်အီဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲပယီၤသုးဆှၢတၢ်အီၣ်မ့ၢ်ဂ့ၤႇလဲၤက့ၤဒီးဘ့ၣ်၀ါ(ကမျၢၢ်ကူကၤ)လၢကျဲပူၤတဖၣ်မ့ၢ်ဂ့ၤ တကြၢးတြီဒီးဖီၣ်အီၤဘၣ် မ့ၢ်လၢခီကရဲးတၢ်ဆၢတဲာ်တၢ်တထူးသံမၤဟးဂီၤကွံာ်အီၤဒံးဘၣ်အဃိလီၤအဂ့ၢ်န့ၣ် လံာ်ဃ့ကညးအပူၤပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါပမ့ဖီၣ်ဒီးတြီအီၤဒ်အံၤလဲၤသးဒ်သိးပတွံၢ်နုာ်တၢ်ကိၢ်တၢ်ဂီၤဆူပအိၣ်ဆိးလီၢ်ကျဲဒီး ကမၤဒ်ခီကရဲးတၢ်ဆၢတဲာ်ဒီးခိၣ်နၢ်တၢ်အၢၣ်လီၤအီလီၤလိာ်သးအဖီခိၣ် လဲၤက့ၤဘ့ၣ်၀ါသ့ဒီးတမၤတံာ်တာ်လိာ်သးဘၣ်န့ၣ်ကဂ့ၤလၢကမျၢၢ်အဂီၢ်လီၤအဂ့ၢ်န့ၣ် စံး၀ဲန့ၣ်လီၤႉ

သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ ဒူပျာ်ယာ်ကီၢ်ရ့ၣ်ခိၣ်ပဒိၣ်စီၤစွ့ၤမီအံၤထုးထီၣ်၀ဲနီၢ်တဂၤလံာ်တၢ်ပာ်သးခဲအံၤခဲအံၤဒီး အ၀ဲဆီၣ်တခူစံး၀ဲလၢကလူၤပိာ်မၤထွဲ(NCA)လံာ်ဃံးဃာ်ဒီးကထံၣ်လိာ်တၢၣ်ပီၣ်ဘှါဆှဲသကိးလၢစီၤနီၢ်ခိၣ်န့ၣ်လီၤႉ

ၦၤဟူးဂဲၤထံရူၢ်ကီၢ်သဲးစီၤအဲလ်ဘၢၣ်ခၠိၤစံး၀ဲလၢ“တဲလၢအိၣ်ဆၢထၢၣ်လၢ(NCA)အဖီခိၣ်ႇသုးဟးထီၣ်ဟးလီၤကဘၣ်ဟ့ၣ်အခွဲးဒု တမ့ၢ်ဒံးဘၣ်မီၤနီၤႉ ပျဲ၀ဲဒ်သိးဒုၣ်ဒါဟဲ၀ဲကသ့အဂီၢ်ဒု လီၤဂာ်ဒ်သိးမၢ ၀ဲလၢတၢ်ဒုးကဆူၣ်ထီၣ်လၢပဟီၣ်က၀ီၤပူၤန့ၣ်လီၤႉ မ့အိၣ်ဆၢထၢၣ်လၢကညီကလုာ်အဂီၢ်န့ၣ် အဲၣ်ဒိးလၢကပဲာ်ထံနီၤဖးက့ၤတၢ်ဂ့ၢ်ကီလၢအကဲထီၣ်သးလၢအပူၤကွံာ်သ့ၣ်တဖၣ်န့ၣ်လီၤႉ ဘၣ်ယိၣ်လၢတၢ်ဒုးကကဲထီၣ်ဟ့ၣ်၀ဲအခွဲးဒ်အံၤဒု အကျိၤအကျဲတဘၣ်အါအါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ်ပူၤ ကီၢ်ဆၣ်သ့ၣ်တဖၣ်အပူၤ စးထီၣ်ဖဲအပူၤကွံာ်လါအီးကထိဘၢၣ်န့ၣ် ခီဖျိပယီၤသုးမၤအါထီၣ်သုးကလၢၤႇမၤ၀ဲတၢ်ထီၣ်ဒုးခးလီၤကျိဖးဒိၣ်လၢသ၀ီပူၤႇသူ၀ဲကဘီယူၤဒုးသုးဒီးကွံာ်လီၤကျိဖးဒိၣ်တဖၣ်အဃိ လီၢ်က၀ီၤကမျၢၢ်ထံဖိကီၢ်ဖိလၢအကလးဘၣ်ဃ့ၢ်မှံဟးဖျိး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ