လါယနူၤအါရံၤ ၁၁ သီႇ ၂၀၂၂ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤဘျံးဒ၀ဲၢ်ကီၢ်ရ့ၣ် လၢၢ်မုၢ်လါကီၢ်ဆၣ်ပူၤ ပယီၤသုးဒွဲၣ်အူပ၀ိၣ်ကိသ၀ီဖိအဟံၣ်(၅)ဖျၢၣ်၀ံၤအလီၢ်ခံ တကီၢ်ခါခဲအံၤလီၢ်က၀ီၤဖိတဖၣ်ဘၣ်ဃ့ၢ်ပူၤဖျဲးသးသ၀ီဒီတဖျၢၣ်ညါအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
ပယီၤသုးလၢအဒွဲၣ်အူကွံာ်လီၢ်က၀ီၤဖိအဟံၣ်န့ၣ်မ့ၢ်၀ဲ(ခလရ-၂၈၅)သုးရ့ၣ်ဒီး ဖဲလါယနူၤအါရံၤ ၈ သီအနံၤန့ၣ် သုးကျိၤအနီၣ်ဂံၢ်ကအိၣ်အဂၤ(၂၀၀)ဃၣ်ဃၣ်ဟဲထီၣ်၀ဲဒီး ခးလီၤနါစိၤကျိဖိဒိၣ်တဖၣ်ဆူဒူသ၀ီပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
ခီဖျိပယီၤသုးခးလီၤကျိဖးဒိၣ်ဒီးဒွဲၣ်အူကွံာ်လီၢ်က၀ီၤဖိအဟံၣ်အဃီတဖၣ်အဃိ ခ့ၣ်အဲၣ်ယူၣ်ဘျံးဒ၀ဲၢ်ကီၢ်ရ့ၣ်(သုးက့ ၄) လၢၢ်မုၢ်လါကီၢ်ဆၣ်ပူၤ ပ၀ိၣ်ကိသ၀ီႇဒူယ့ပ့ၤစှီၤႇမၠိၣ်ဟီႇကဒဲႇမဒီဒီးမ့ထ့ၤသ၀ီဖိတဖၣ် အိၣ်လၢသ၀ီပူၤတဘူူၣ်လၢာ်ဘၣ်ဒီး ဘၣ်ဟးစံၣ်ပလဲာ်သးသ၀ီဒီတဖျၢၣ်ကဲထီၣ်သးန့ၣ်လီၤႉ
ဖဲလါယနူၤအါရံၤ ၈ သီအနံၤ လၢၢ်မုုၢ်လါ(PDF)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤ တၢ်ခးလိာ်သးကဲထီၣ်ဒံးဖဲပ၀ိၣ်ကိသ၀ီပူၤဒီး ခီဖျိတၢ်ခိးထုးပယီၤသုးဒီးမ့ၣ်ပိၢ်အဃိပယီၤသုးသံကွံာ်(၄)ဂၤႇ ဘၣ်ဒိအဂၤ(၂၀)အဖီခိၣ် ပယီၤသုးတဖၣ်အံၤက့ၤဒွဲၣ်အူကွံာ်ပ၀ိၣ်ကိသ၀ီဖိတဖၣ်အဟံၣ်အဃီအဂ့ၢ်န့ၣ် လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ
“ခီဖျိပယီၤသုးဘၣ်ဒီးမ့ၣ်ပိၢ်ႇဒွဲၣ်အူကမျၢၢ်အဟံၣ်တၢ်ဂ့ၢ်အံၤအဃိ သ၀ီဖိတဖၣ်အိၣ်လၢသ၀ီပူၤတဘူၣ်လၢၤဘၣ် စံၣ်ထီၣ်လၢၤလံႉ အနီၢ်နီၢ်ခီန့ၣ်ပယီၤသုးအံၤကဒွဲၣ်အူသ၀ီဒီတဖျၢၣ်ညါလီၤႉ ခီဖျိလၢ(PDF)ဟဲတုၤဆိအဃိ ဒွဲၣ်အူ၀ဲချုး(၅)ဖျၢၣ်လီၤႉ အ၀ဲသ့ၣ်အၦၤဘၣ်အဃိသးတမံ၀ဲဘၣ်ဒီးက့ၤမၤကဒါလၢလီၢ်က၀ီၤဖိလီၤ”အဂ့ၢ်န့ၣ် လီၢ်က၀ီၤဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ
လၢန့ၣ်အမဲာ်ညါဖဲအပူၤကွံာ်လါယနူၤအါရံၤ ၄ သီအနံၤစ့ၢ်ကီး တၢ်ခးလိာ်သးကဲထီၣ်ဖဲကဒဲသ၀ီပူၤတဘျီဒံးအသိး ပယီၤသုးကိးမၢဆူၣ်လီၢ်က၀ီၤသ၀ီဖိအဂၤ(၂၀)လၢကနဲၣ်ပၠးန့ၢ်အ၀ဲသ့ၣ်ကျဲအဂ့ၢ်န့ၣ် ၦၤလၢအထံၣ်ဒီးအမဲာ်တဖၣ်စံး၀ဲန့ၣ်လီၤႉ
လၢဘျံးတဒ၀ဲၢ်ကီၢ်ရ့ၣ် လၢၢ်မုၢ်လါကီၢ်ဆၣ်အပူၤ တကီၢ်ခါခဲအံၤၦၤဃ့ၢ်မှံဟးဖျိးခဲလၢာ်အိၣ်၀ဲ(၆ႇ၅၀၀)ဃၣ်ဃၣ်ဒီး လၢအ၀ဲသ့ၣ်အဂီၢ်လိၣ်ဘၣ်၀ဲတၢ်အီၣ်တၢ်အီႇတၢ်ဆီၣ်ထွဲမၤစၢၤတဖၣ်ဒံးအဂ့ၢ်န့ၣ် သ့ၣ်ညါဘၣ်လၢၦၤလၢအမၤစၢၤတၢ်တဖၣ်အအိၣ်န့ၣ်လီၤႉ
