လါယနူၤအါရံၤ ၃၁ သီႇ ၂၀၂၂ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဒ်သိးသုးမီၤစိရိၤအတၢ်ပၢတၢ်ပြးလဲၤတရံးသးသုတသ့လၢၤတဂ့ၤအဂီၢ် ဖၣ်ပူၣ်၀့ၢ်ပူၤ၀ဲၤကျိၤဘၣ်ထွဲတခါစုာ်စုာ်လၢအလီၤဘၣ်မူဒါဖံးမၤတၢ်လၢသုးမီၤစိရိၤစုတီၤအဖီလာ်ခဲလၢာ် ကဟးထီၣ်ကွံာ်၀ဲလၢအသီတဆံအတီၢ်ပူၤအဂ့ၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၅)သုး၀ဲၤလီၢ်ခိၣ်သ့ၣ် ထုးထီၣ်ဟ့ၣ်ပလီၢ်၀ဲဖဲလါယနူၤအါရံၤ ၂၉ သီအနံၤန့ၣ်လီၤႉ
ဖၣ်ပူၣ်၀့ၢ်ပူၤဂံၢ်ခီၣ်ထံး၀ဲၤကျိၤတဖၣ်လၢအလီၤဘၣ်မူဒါဖံးမၤတၢ်လၢပယီၤသုးမီၤစိရိၤအစုတီၤအဖီလာ်ခဲလၢာ် တၢ်ကဟ့ၣ်ဒုက့ၤႇဒုးဟးထီၣ်အ၀ဲသ့ၣ်လၢထံကျဲတကပၤလၢကက့ၤဆူအတၢ်လီၢ်တၢ်ကျဲစးထီၣ်ဖဲလါဖ့ၤဘြူၤအါရံၤ(၁)သီတုၤလၢ(၁၀)သီအနံၤတစုအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါမ့မ့ၢ်ဖၣ်ပူၣ်၀့ၢ်ပူၤၦၤမၤတၢ်ဖိတဖၣ်န့ၣ် ကဘၣ်ဟးဆှဲးမၤတၢ်လၢသုးမီၤစိရိၤစုဒုၣ်တီၤအဖီလာ်အသိး ဘၣ်ဃးဒီးတၢ်ဟ့ၣ်ဒုးသ့ၣ်ညါတဖၣ်အံၤတၢ်မ့တလူၤပိာ်မၤထွဲအီၤဒီးမ့ဆဲးမၤဒံး၀ဲဒၣ်န့ၣ် တၢ်ကဟံးန့ၢ်အရ့တုၤလီၤတီၤလီၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
တကီၢ်ခါခဲအံၤကီၢ်ပယီၤအပူၤပယီၤသုးမီၤစိရိၤအတၢ်ဖံးတၢ်မၤတဖၣ်အဖီခိၣ် ထံကီၢ်ဒီတဘ့ၣ်အပူၤထံဖိကီၢ်ဖိကမျၢၢ်တဖၣ်ထီဒါဒီးပၢၢ်ဆၢ၀ဲအကျိၤအကျဲအကလုာ်ကလုာ်အံၤဟီၣ်ခိၣ်ဒီတဘ့ၣ်သ့ၣ်ညါ၀ဲအသိး ဒ်သိး KNU/KNLA(သုးက့ ၅)ဟီၣ်က၀ီၤအပူၤ ပယီၤသုးမီၤစိရိၤအတၢ်ပၢတၢ်ပြးလဲၤတရံးသးသုတန့ၢ်တဂ့ၤအဂီၢ် ဘၣ်ထုးထီၣ်ဟ့ၣ်ပလီၢ်၀ဲဒ်အံၤလီၤအဂ့ၢ်န့ၣ် စံး၀ဲန့ၣ်လီၤႉ
ခီဖျိပယီၤသုးကလၢၤလၢအအိၣ်ဖဲခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်အပူၤတဖၣ်တၢ်လဲၤဆှၢန့ၢ်အ၀ဲသ့ၣ်တၢ်အီၣ်တၢ်အီလၢသိလ့ၣ်ဒီးခီၣ်တန့ၢ်လၢၤဘၣ်အဃိ ပယီၤသုးမီၤစိရိၤအံၤသူ၀ဲဒၣ်ကဘီယူၤဒီးဟဲဆှၢ၀ဲတၢ်အီၣ်(၄)ဘျီဆူခ့ၣ်အဲၣ်ယူၣ်ဘုသိၣ်ကီၢ်ဆၣ်ပူၤပယီၤသုးခီပိၣ်သုးကလၢၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲမဟါန့ၣ်လီၤႉ
ဖဲအပူၤကွံာ်လါယနူၤအါရံၤ ၂၇ သီအနံၤစ့ၢ်ကီး ခီဖျိပယီၤသုးမီၤစိရိၤအၦၤလၢအအိၣ်ဖဲဖၣ်ပူၣ်၀့ၢ်သ၀ီမုၢ်နုာ်သီခါဖၠၣ်ကရၢၢ်ပူၤအံၤတဖၣ် ခးလီၤကျိဖးဒိၣ်ဆူသ၀ီပူၤအဃိ လီၢ်က၀ီၤသ၀ီဖိသံ၀ဲ(၃)ဂၤႇဟံၣ်ဟးဂီၤ၀ဲ(၂)ဖျၢၣ်အဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲန့ၣ်လီၤႉ
