လါယနူၤအါရံၤ ၅ သီႇ ၂၀၂၂ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ လၢ(၂၀၂၁)နံၣ် တနံၣ်အတီၢ်ပူၤ တၢ်ဒုးကဲထီာ်ပာ်ဖှိၣ်အိၣ်၀ဲအဘျီ(၂၆၉၂)ဘျီဒီး ဖဲန့ၣ်ပယီၤသုးသံခဲလၢာ်(၁၃၆၄)ဂၤႇဘၣ်ဒိ၀ဲ(၁၃၁၃)ဂၤအဂ့ၢ်န့ၣ် KNU မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲတနံၤအံၤ လါယနူၤအါရံၤ ၅ သီအနံၤန့ၣ်လီၤႉ
ဒ်ခ့ၣ်အဲၣ်ယူၣ်မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိးန့ၣ် (၂၀၂၁)နံၣ် စးထီၣ်လၢလါယနူၤအါရံၤတုၤလၢလါဒံၣ်စ့ဘၢၣ်န့ၣ် တၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးမီၤစိရိၤႇသုးခိးကီၢ်ဆၢ(BGF)သုးတဖၣ်အဘၢၣ်စၢၤ ခဲလၢာ်အိၣ်၀ဲ(၂၆၉၂)ဘျီဒီး ပယီၤသုးမီၤစိရိၤတကပၤသံ၀ဲ(၁၃၆၄)ဂၤႇဘၣ်ဒိ၀ဲ(၁၃၁၃)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
ပယီၤသုးမီၤစိရိၤသံတဖၣ်အကျါပၣ်ဃုာ်၀ဲသုးခိၣ်ဒိၣ်ဖိ(၁)ဂၤႇသုးရ့ၣ်ခိၣ်(၃)ဂၤႇသုးဒ့ခိၣ်(၁၄)ဂၤႇသုးဒ့ခိၣ်ခံ(၁)ဂၤႇသုးခိၣ်ဖိ(၁)ဂၤႇသုးစကီၤ(၁)ဂၤႇသုးစကီၤဖိ(၁)ဂၤဒီး ပယီၤသုးဘၣ်ဒိအကျါပၣ်ဃုာ်၀ဲသုးရ့ၣ်ခိၣ်(၃)ဂၤႇ သုးရ့ၣ်ခိၣ်ခံ(၂)ဂၤႇသုးဒ့ခိၣ်(၃)ဂၤႇသုးဒ့ခိၣ်ခံ(၄)ဂၤႇသုးခိၣ်ယီၤ(၁)ဂၤႇသုးစကီၤ(၄)ဂၤန့ၣ်လီၤႉ
လၢန့ၣ်အမဲာ်ညါသုးမီၤစိရိၤအသိလ့ၣ်ဟးဂီၤ၀ဲ(၄၇)ခိၣ်ႇကသ့ၣ်လၢအသူ၀ဲလၢတၢ်ဆှၢထီၣ်ဆှၢလီၤတၢ်အီၣ်တၢ်အီအဂီၢ်သံ၀ဲ(၈၀)ဒုဒီးဘၣ်ဒိ၀ဲ(၃၀)ဒုအဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ်ပာ်ဖျါ၀ဲဒၣ်န့ၣ်လီၤႉ
တၢ်ဒုးကဲထီၣ်လၢတနံၣ်အတီၢ်ပူၤ မ့မ့ၢ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်တကပၤ ဘၣ်ဟ့ၣ်လီၤကွံာ်အသးသမူ(၃၀)ဂၤအကျါပၣ်ဃုာ်၀ဲသုးဒ့ခိၣ်(၁)ဂၤႇသုးဒ့ခိၣ်ခံ(၁)ဂၤႇသုးခိၣ်ဖိခံ(၁)ဂၤႇ သုးစကီၤ(၂)ဂၤႇသုးစကီၤဖိ(၃)ဂၤဒီးဘၣ်ဒိ၀ဲခဲလၢာ်(၁၀၇)ဂၤအသိး ကမျၢၢ်သံ၀ဲ(၁၂)ဂၤႇ ဘၣ်ဒိ၀ဲ(၄၂)ဂၤဒီးသုးမီၤစိရိၤခးလီၤကျိဖးဒိၣ်ဆူကမျၢၢ်ထံဖိကီၢ်ဖိတၢ်ဖံးအီၣ်မၤအီၣ်လီၢ်ကျဲခဲလၢာ်အိၣ်၀ဲ(၂၁၃၆)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်မၤနီၣ်မၤဃါအသိး သ့ၣ်ညါဘၣ်န့ၣ်လီၤႉ
စးထီၣ်လၢ(၂၀၂၁)နံၣ် လါဖ့ၤဘြူၤအါရံၤ ၁ သီ သုးဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤ၀ံၤအလီၢ်ခံ တၢ်ဒုးဆူၣ်ထီၣ်၀ဲဒၣ်လၢခ့ၣ်အဲၣ်ယူၣ်သုးက့(၅)ဟီၣ်က၀ီၤအပူၤအဃိ ပယီၤသုးမီၤစိရိၤတကပၤသံဘၣ်ဒိဘၣ်ထံးအနီၣ်ဂံၢ်ဘၣ်ဟဲအါထီၣ်၀ဲဒ်အံၤန့ၣ်လီၤႉ
တကးဒံးဘၣ်တကီၢ်ခါခဲအံၤပယီၤသုးမီၤစိရိၤအံၤဟဲနုာ်လီၤဟူးဂဲၤအမဲာ်ညါဟဲအိးထီၣ်၀ဲဒၣ်တၢ်ဒုးမဲာ်သၣ်လၢခ့ၣ်အဲၣ်ယူၣ်သုးက့ကိးဘ့ၣ်ဒဲးပူၤအဃိ တၢ်ဒုးတၢ်ယၤဟဲအိၣ်ထီၣ်ကိးမုၢ်နံၤဒဲးဃၣ်ဃၣ်ညါန့ၣ်လီၤႉ ခီဖျိတၢ်ဒုးကဲထီၣ်ႇပယီၤသုးမီၤစိရိၤဟဲကွံာ်လီၤမ့ၣ်ပိၢ်လၢကဘီယူၤႇခးလီၤကျိဖးဒိၣ်တဖၣ်အဃိ လီၢ်က၀ီၤထံဖိကီၢ်ဖိကမျၢၢ်လၢအကလးဘၣ်ဃ့ၢ်မှံဟးဖျိး၀ဲဒၣ်န့ၣ်လီၤႉ
