Home တၢ်ကစီၣ် တချုး(KNU)ဟ့ၣ်ပလီၢ်ပာ်ပနီၣ်မုၢ်နံၤမုၢ်သီတုၤဒံးဘၣ်အကတီၢ် ဖၣ်ပူၣ်၀့ၢ်ပယီၤသုးမီၤစိရိၤ၀ဲၤကျိၤၦၤမၤတၢ်ဖိဟးထီၣ်ကွံာ်(၁၀၀)ဘျဲၣ်

တချုး(KNU)ဟ့ၣ်ပလီၢ်ပာ်ပနီၣ်မုၢ်နံၤမုၢ်သီတုၤဒံးဘၣ်အကတီၢ် ဖၣ်ပူၣ်၀့ၢ်ပယီၤသုးမီၤစိရိၤ၀ဲၤကျိၤၦၤမၤတၢ်ဖိဟးထီၣ်ကွံာ်(၁၀၀)ဘျဲၣ်

1040
0
Photo: KHRG

လါဖ့ၤဘြူၤအါရံၤ ၁၀ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲအပူၤကွံာ်လါယနူၤအါရံၤ ၂၉ သီအနံၤ ကညီဒီကလုာ်စၢဖှိၣ်ကရၢ(KNU)မုၢ်တြီၢ်ကီၢ်ရ့ၣ်(သုးက့ ၅)ထုးထီၣ်လံာ်ဒီးဟ့ၣ်ပလီၢ်၀ဲလၢ ပယီၤသုးမီၤစိရိၤအစုတီၤဖီလာ်၀ဲၤကျိၤၦၤမၤတၢ်ဖိလၢအအိၣ်ဖဲမုၢ်တြီၢ်ကီၢ်ရ့ၣ် ဖၣ်ပူၣ်၀့ၢ်ပူၤတဖၣ်ကဟးထီၣ်ကွံာ်လၢတၢ်ပာ်ပနီၣ်မုၢ်နံၤမုၢ်သီအတီၢ်ပူၤ၀ံၤအလီၢ်ခံ ကတီၢ်အံၤ၀ဲၤကျိၤၦၤမၤတၢ်ဖိဟးထီၣ်ကွံာ်ခဲလၢာ်အဂၤ(၁၀၀)ဘျဲၣ်လံအဂ့ၢ်န့ၣ် ခ့ၣ်အဲၣ်ယူၣ်ပာ်ဂၢၢ်ပာ်ကျၢၤစံး၀ဲန့ၣ်လီၤႉ

စးထီၣ်လၢခ့ၣ်အဲၣ်ယူၣ်ထုးထီၣ်ဟ့ၣ်ပလီၢ်၀ဲလၢတလါအံၤလါဖ့ၤဘြူၤအါရံၤ ၁ သီတုၤလၢ ၁၀ သီအနံၤ ၀ဲၤကျိၤၦၤမၤတၢ်ဖိလၢအမၤတၢ်လၢသုးမီၤစိရိၤအစုတီၤအဖီလာ်တဖၣ်ကဟးထီၣ်ကွံာ်လၢ၀့ၢ်ပူၤဒီး မ့မ့ၢ်ဖၣ်ပူၣ်၀့ၢ်ၦၤမၤတၢ်ဖိတဖၣ်ကဘၣ်ဟးဆှဲးသုးမီၤစိရိၤအတၢ်ဖံးတၢ်မၤပူၤ၀ံၤအလီၢ်ခံ ၀ဲၤကျိၤၦၤမၤတၢ်ဖိတဖၣ်ဘၣ်ဟးထီၣ်ကွံာ်၀ဲဒ်အံၤလီၤအဂ့ၢ်န့ၣ် (သုးက့ ၅)ဒုးယၤခိၣ် သုးခိၣ်ဒိၣ်စိ စီၤထူကဆှီ စံး၀ဲဒ်အံၤန့ၣ်လီၤႉ

“ဒ်ပဒိးန့ၢ်ဘၣ်စရီအသိးန့ၣ် ၦၤဟးထီၣ်တဖၣ်န့ၣ်အကျါပိာ်မုၣ်ပၣ်၀ဲ(၇၂)ဂၤႇပိာ်ခွါ(၆၂)ဂၤ ခဲလၢာ်န့ၣ်(၁၃၄)ဂၤလီၤ”အဂ့ၢ်န့ၣ် ဒုးယၤခိၣ် သုးခိၣ်ဒိၣ်စိ စီၤထူကဆှီစံးဘၣ်ခ့ၣ်အဲးစံၣ်န့ၣ်လီၤႉ

ဖၣ်ပူၤ၀့ၢ်ပူၤ၀ဲၤကျိၤၦၤမၤတၢ်ဖိလၢအဟးထီၣ်တဖၣ်န့ၣ်မ့ၢ်၀ဲကူၣ်သ့၀ဲၤကျိၤႇစံာ်ၦဲၤသူၣ်ဖျး၀ဲၤကျိၤႇဘုၣ်ဖီၣ်မၤညၣ်၀ဲၤကျိၤသဲစး၀ဲၤကျိၤႇတၢ်ဆဲးကျိး၀ဲၤကျိၤႇတၢ်စဲးစ့စရီ၀ဲၤကျိၤၦၤမၤတၢ်ဖိတဖၣ်ဒီး ဒ်သိးအ၀ဲသ့ၣ်ကဟးထီၣ်ဘၣ်အဂီၢ်(ခ့ၣ်အဲၣ်ယူၣ်)တကပၤဟ့ၣ်၀ဲတၢ်မၤစၢၤတဖၣ်အဂ့ၢ်န့ၣ် သုးခိၣ်ဒိၣ်စိ စီၤထူကဆှီစံးအါထီၣ်၀ဲန့ၣ်လီၤႉ

တကီၢ်ခါခဲအံၤစ့ၢ်ကီးပယီၤသုးမီၤစိရိၤအံၤကအိးထီၣ်တၢ်ဒုးမဲာ်သၣ်အဂီၢ် အ၀ဲသ့ၣ်ဒုးယၤခိၣ်အနီၢ်ကစၢ်ဒၣ်၀ဲတီခိၣ်ရိၣ်မဲနီၤဖးလီၤ၀ဲသုးကျိၤဖးဒိၣ်ခံကျိၤဒီး လဲၤထီၣ်၀ဲဆူဖၣ်ပူၣ်မုၢ်ထီၣ်မဲးခုၣ်ထၣ်ဟီၣ်က၀ီၤတကျိၤဒီးလၢမုၢ်နုာ်ဘျၢၣ်ပၢၤဟီၣ်က၀ီၤတကျိၤန့ၣ်လီၤႉ တကးဒံးဘၣ်ခးပိၢ်ထီၣ်ကျိဖးဒိၣ်ႇကျိဖိတဖၣ်ကိးမုၢ်နံၤဒဲးအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)တကပၤစံး၀ဲန့ၣ်လီၤႉ

Photo: KHRG

တကီၢ်ခါခဲအံၤပယီၤသုးမီၤစိရိၤအၦၤနုာ်လီၤဟူးဂဲၤလၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤအံၤ အသုးရ့ၣ်လီၤလီၤ ဆီဆီအိၣ်၀ဲ(၉)ရ့ၣ်အသိး အ၀ဲသ့ၣ်စုဒုၣ်တီၤအဖီလာ်သုးခိးကီၢ်ဆၢ(BGF)တဖၣ်စ့ၢ်ကီးဟဲတုၤ၀ဲဒၣ်အါအါဂီၢ်ဂီၢ်ဒီး တၢ်ဒုးကဲထီၣ်၀ဲကိးမုၢ်နံၤဒဲးအဂ့ၢ်န့ၣ် ဟီၣ်က၀ီၤတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ

ဖဲအပူၤကွံာ်လါယနူၤအါရံၤ ၂၉ သီအနံၤ ခ့ၣ်အဲၣ်ယူၣ်(သုးက့ ၅)ထုးထီၣ်လံာ်ဒီးဟ့ၣ်ပလီၢ်၀ဲလၢ ၀ဲၤကျိၤၦၤမၤတၢ်ဖိလၢအမၤတၢ်လၢသုးမီၤစိရိၤစုတီၤအဖီလာ်လၢအအိၣ်ဖဲမုၢ်တြီၢ်ကီၢ်ရ့ၣ် ဖၣ်ပူၣ်ဟီၣ်က၀ီၤအပူၤတဖၣ် စးထီၣ်လၢလါဖ့ၤဘြူၤအါရံၤ ၁ သီတုၤလၢ ၁၀ သီအတီၢ်ပူၤ ကဟးထီၣ်ကွံာ်လၢဖၣ်ပူၣ်၀့ၢ်ပူၤဒီး မ့မ့ၢ်ဖၣ်ပူၣ်၀့ၢ်ၦၤမၤတၢ်ဖိတဖၣ်ကဘၣ်ဟးဆှဲးသုးမီၤစိရိၤအတၢ်ဖံးတၢ်မၤသ့ၣ်တဖၣ်န့ၣ်လီၤႉ

လၢန့ၣ်အမဲာ်ညါမုၢ်နံၤမုၢ်သီလၢ(ခ့ၣ်အဲၣ်ယူၣ်)ဟ့ၣ်ပလီၢ်ပာ်ပနီၣ်၀ဲအတီၢ်ပူၤ တၢ်မ့တလူၤပိာ်မၤထွဲအီၤဘၣ်န့ၣ် တၢ်ကဟံးန့ၢ်အရ့တုၤလီၤတီၤလီၤအဂ့ၢ်န့ၣ် ခ့ၣ်အဲၣ်ယူၣ်ဟ့ၣ်ပလီၢ်ဃာ်၀ဲန့ၣ်လီၤႉ

ခီဖျိ(ခ့ၣ်အဲၣ်ယူၣ်)ထုးထီၣ်လံာ်ဟ့ၣ်ပလီၢ်အဃိ ပယီၤသုးမီၤစိရိၤဒုးယၤခိၣ်ကိးအိၣ်ဖှိၣ်၀ဲ၀ဲၤကျိၤၦၤမၤတၢ်ဖိလၢအမၤတၢ်လၢသုးမီၤစိရိၤအစုတီၤဖီလာ်လၢအအိၣ်ဖဲဖၣ်ပူၣ်၀့ၢ်ပူၤတဖၣ်ဒီး ဟ့ၣ်လီၢ်၀ဲလၢတဘၣ်ဟးထီၣ်ဘၣ်အသိး ကျဲလၢကဟးထီၣ်၀့ၢ်ပူၤတဖၣ်စ့ၢ်ကီးဖဲတၢ်မၤဃံးထီၣ်တၢ်ဘံၣ်တၢ်ဘၢအတီၢ်ပူၤအံၤ ၀ဲၤကျိၤၦၤမၤတၢ်ဖိအဂၤ(၁၀၀)ဘျဲၣ်ဘၣ်ဟးထီၣ်ကွံာ်၀ဲဒ်အံၤန့ၣ်လီၤႉ

ဒ်န့ၣ်အသိးဖဲလါဖ့ၤဘြူၤအါရံၤ ၈ သီအနံၤစ့ၢ်ကီး (KNU)ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် ထုးထီၣ်ဟ့ၣ်ပလီၢ်၀ဲလၢ သုးမီၤစိရိၤအစုတီၤအဖီလာ်အၦၤတဖၣ်ဒီး၀ဲၤကျိၤဘၣ်ထွဲၦၤမၤတၢ်ဖိတဖၣ်ခဲလၢာ် ကဟးထီၣ်ကွံာ်လၢတၢ်ဖံးတၢ်မၤမူဒါအပူၤန့ၣ်လီၤႉ

လံာ်တၢ်ဟ့ၣ်ပလီၢ်အပူၤစံး၀ဲလၢ လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ် သးရ့ၣ်(၁)တၢ်ပၢဟီၣ်က၀ီၤအပူၤ သုးခိးကီၢ်ဆၢ(BGF)ဒီးဂၢၤကီၢ်(ပသစ)တဖၣ်ကဘၣ်ဟးထီၣ်ကွံာ်လၢတၢ်ဖံးတၢ်မၤမူဒါပူၤဒီး တဘၣ်ပၣ်ဖှိၣ်မၤသကိးတၢ်ဒီးပယီၤသုးမီၤစိရိၤဘၣ်ႇ(BGF)ဟံၣ်ဖိဃီဖိလၢအအိၣ်ဖဲ(BGF)သုးကလၢၤပူၤသ့ၣ်တဖၣ်ခဲလၢာ်ကဟးထီၣ်ကွံာ်လၢသုးကလၢၤအပူၤဒီး ၀ဲၤကျိၤၦၤမၤတၢ်ဖိလၢအမၤတၢ်လၢသုးမီၤစိရိၤအစုတီၤဖီလာ်လၢအအိၣ်ဖဲဖၣ်အၣ်ကီၢ်ဆၣ်ပူၤတဖၣ်ခဲလၢာ် ကဟးထီၣ်ကွံာ်လၢမူဒါတၢ်ဖံးတၢ်မၤပူၤန့ၣ်လီၤႉ

တၢ်မ့တလူၤပိာ်မၤထွဲ၀ဲလံာ်ဟ့ၣ်ပလီၢ်အံၤဘၣ်န့ၣ် တၢ်ဂ့ၢ်ကီလၢအဟဲကဲထီၣ်သးသ့ၣ်တဖၣ်တဟံး၀ဲမူဒါဘၣ်အဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ